ກອງປະຊຸມລັດຖະມົນຕີຕ່າງປະເທດຈີນ-ອາຊຽນສະໄໝພິເສດ ກ່ຽວກັບພະຍາດອັກເສບປອດສາຍພັນໃໝ່ໄດ້ຈັດຂຶ້ນຢູ່ນະຄອນຫຼວງວຽງຈັນ
ວັນທີ 20 ກຸມພານີ້, ກອງປະຊຸມວິສາມັນລັດຖະມົນຕີກະຊວງການຕ່າງປະເທດຈີນ-ອາຊຽນກ່ຽວກັບບັນຫາພະຍາດອັກເສບປອດສາຍພັນໃໝ່ໄດ້ຈັດຂຶ້ນຢູ່ນະຄອນຫຼວງວຽງຈັນ ແຫ່ງ ສປປ ລາວ. ທ່ານຫວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນ ແລະ ທ່ານລອກຊິນ ລັດຖະມົນຕີກະຊວງການຕ່າງປະເທດຟີລິບປິນ ປະເທດປະສານງານການພົວພັນອາຊຽນ-ຈີນ ໄດ້ຮ່ວມກັນເປັນປະທານຈັດກອງປະຊຸມ ໂດຍມີລັດຖະມົນຕີກະຊວງການຕ່າງປະເທດຂອງບັນດາປະເທດອາຊຽນເຂົ້າຮ່ວມ.
ກ່ອນອື່ນ, ກອງປະຊຸມໄດ້ສາຍວິດີໂອທີ່ປະທັບໃຈແລະຊາບຊຶ້ງໃຈຕອນໜຶ່ງ ທີ່ໄດ້ເວົ້າເຖິງປະຊາຊົນຈີນໄດ້ຮ່ວມແຮງຮ່ວມໃຈກັນ ເພື່ອຕ້ານກັບການແຜ່ລະບາດຂອງພະຍາດ ແລະ ຜູ້ນຳ 10 ປະເທດອາຊຽນໄດ້ໃຫ້ການສະໜັບສະໜູນຢ່າງໝັ້ນໜຽວຕໍ່ຈີນ. ກ່ອນໄຂກອງປະຊຸມ, ລັດຖະມົນຕີກະຊວງການຕ່າງປະເທດບັນດາທ່ານໄດ້ຮ່ວມກັນຂຶ້ນເວທີ, ຈັບມືກັນ, ໃຫ້ກຳລັງໃຈແກ່ນະຄອນອູຮັ້ນ ກໍຄືຈີນໃນຮູບແບບອາຊຽນ.
ໃນເວລາກ່າວຄຳປາໄສ, ທ່ານຫວາງຢີ້ໄດ້ແນະນຳມາດຕະການທີ່ເຂັ້ມແຂງ ແລະ ຜົນສຳເລັດຂອງຈີນໃນການຕ້ານກັບການແຜ່ລະບາດຂອງພະຍາດ. ທ່ານຫວາງຢີ້ກ່າວວ່າ, ພາຍໃຕ້ການຊີ້ນຳນຳພາຂອງທ່ານປະທານສີຈິ້ນຜິງ, ປະຊາຊົນຈີນ 1,4 ຕື້ຄົນໄດ້ສາມັກຄີເປັນຈິດໜຶ່ງໃຈດຽວກັນ ເພື່ອຕໍ່ສູ້ກັບເຊື້ອພະຍາດ. ພວກເຮົາໄດ້ໃຊ້ມາດຕະການປ້ອງກັນແລະຄວບຄຸມທີ່ຮອບດ້ານທີ່ສຸດ, ເຂັ້ມງວດທີ່ສຸດ ແລະ ເຖິງຖອງທີ່ສຸດ, ໄດ້ສ້າງລະບົບປ້ອງກັນແລະຄວບຄຸມທີ່ໄດ້ສະກັດກັ້ນການແຜ່ລະບາດຂອງພະຍາດຢ່າງບັງເກີດຜົນ, ຈີນມີຄວາມໄວໃນການອອກແຮງສຸດຂີດເພື່ອກອບກູ້ຊ່ວຍເຫຼືອຜູ້ເປັນພະຍາດ, ແລະຍາດໄດ້ເວລາອັນລ້ຳຄ່າໃຫ້ໂລກໃນການປ້ອງກັນແລະຄວບຄຸມພະຍາດ ເຊິ່ງໄດ້ສ່ອງແສງໃຫ້ເຫັນເຖິງນ້ຳໃຈຮັບຜິດຊອບໃນຖານະເປັນປະເທດໃຫຍ່ໃນໂລກ. ພວກເຮົາເຊື່ອໝັ້ນວ່າ, ພາຍໃຕ້ການນຳພາທີ່ເຂັ້ມແຂງຂອງພັກກອມມູນິດຈີນ, ພາຍໃຕ້ການປຸກລະດົມຂົນຂວາຍອັນແຂງແຮງຂອງລັດຖະບານຈີນ, ໂດຍອີງອາໄສທ່າແຮງດ້ານລະບອບສັງຄົມນິຍົມ ແລະ ກຳລັງສັງລວມແຫ່ງຊາດທີ່ເຂັ້ມແຂງກວ່າແຕ່ກ່ອນຫຼາຍ, ຈີນມີຄວາມໝັ້ນໃຈ ແລະ ມີຄວາມສາມາດທີ່ຈະເອົາຊະນະການແຜ່ລະບາດຂອງພະຍາດຢ່າງເຖິງຖອງໂດຍໄວ.
ທ່ານຫວາງຢີ້ກ່າວຕື່ມວ່າ, ການແຜ່ລະບາດຂອງພະຍາດໄດ້ເປັນສິ່ງທ້າທາຍຕໍ່ການພັດທະນາເສດຖະກິດສັງຄົມຈີນ, ແຕ່ເປັນສິ່ງທ້າທາຍຊົ່ວຄາວ ແລະ ມີຄວາມຈຳກັດ. ທ່ວງທ່າເສດຖະກິດຈີນທີ່ມີຄວາມໜັກແໜ້ນ, ມີຊີວິດຊີວາ ແລະ ມີທ່ວງທ່າກ້າວໄປໃນທິດທາງທີ່ດີນັ້ນ ຈະບໍ່ມີການປ່ຽນແປງ. ຈີນໄດ້ຜ່ານຜ່າຄວາມທຸກຍາກລຳບາກຕ່າງໆນານາ, ໄດ້ປ່ຽນແປງສິ່ງທ້າທາຍໃຫ້ເປັນກາລະໂອກາດ ແລະ ປ່ຽນທິດທາງດ້ານລົບເປັນບວກ ເລື້ອຍໆ. ພວກເຮົາບໍ່ພຽງແຕ່ຈະປະສົບຜົນສຳເລັດໃນການຕ້ານກັບການແຜ່ລະບາດຂອງພະຍາດໃນຂັ້ນສຸດທ້າຍເທົ່ານັ້ນ, ຫາກຍັງໄດ້ພະຍາຍາມບັນລຸເປົ້າໝາຍພັດທະນາເສດຖະກິດສັງຄົມທີ່ກຳນົດໄວ້ເຊັ່ນກັນ.
ທ່ານຫວາງຢີ້ກ່າວວ່າ: ຈີນແລະປະເທດອາຊຽນຄວນປ້ອງກັນການແຜ່ລະບາດຂອງພະຍາດອັກເສບປອດສາຍພັນໃໝ່ຢ່າງມີປະສິດທິຜົນໂດຍຜ່ານການຮ່ວມມືທີ່ແໜ້ນແຟ້ນແລະຕັ້ງໜ້າກວ່າເກົ່າ, ພ້ອມກັນນັ້ນກໍຖືການຕ້ານການແຜ່ລະບາດຂອງພະຍາດຮ່ວມກັນເທື່ອນີ້ເປັນໂອກາດ, ຍົກສູງການປັບປຸງລະດັບດ້ານສາທາລະນະສຸກຂອງພາກພື້ນ, ເພື່ອປະກອບສ່ວນຄັ້ງໃໝ່ເຂົ້າໃນພາລະກິດສາທາລະນະສຸກຂອງພາກພື້ນກໍຄືຂອງໂລກ. ທ່ານຫວາງຢີ້ໄດ້ສະເໜີຂໍ້ລິເລີ່ມການຮ່ວມມື 4 ຂໍ້ຄື: ໜຶ່ງ, ຊຸກຍູ້ການຮ່ວມມືແລະປະສານງານຢ່າງມີປະສິດທິຜົນລະຫວ່າງພາກສ່ວນຕ່າງໆເຊັ່ນ: ພາກສ່ວນອະນາໄມ, ການກວດກາພະຍາດ, ຄົມມະນາຄົມ, ການເຂົ້າອອກເມືອງແລະອື່ນໆ. ສອງ, ສ້າງກົນໄກຕິດຕໍ່ສຸກເສີນດ້ານສາທາລະນະສຸກຈີນ-ອາຊຽນ, ເພື່ອຍົກສູງຄວາມໄວໃນການຮັບມືສຸກເສີນກ່ຽວກັບເຫດການສາທາລະນະສຸກ. ສ້າງສູນສະສົມອຸປະກອນປ້ອງກັນການແຜ່ລະບາດຂອງພະຍາດຈີນ-ອາຊຽນ. ສາມ, ຮັບມືກັບເຫດການສາທາລະນະສຸກຢ່າງສຸຂຸມຮອບຄອບ, ເອົາຊະນະຄວາມຢ້ານກົວ. ຟື້ນຟູການໄປມາສູ່ກັນແລກປ່ຽນການພົວພັນດ້ານເສດຖະກິດການຄ້າແລະການຮ່ວມມືໃຫ້ເປັນປົກກະຕິໂດຍໄວ. ສີ່, ປ່ຽນວິກິດການໃຫ້ເປັນໂອກາດ, ສ້າງຈຸດເຕີບໂຕໃໝ່ດ້ານການຮ່ວມມື. ຍົກສູງລະດັບການຄຸ້ມຄອງຕົວເມືອງ, ຍົກສູງຄວາມສາມາດດ້ານການຮັບມື, ການຕັດສິນແລະແກ້ໄຂເຫດກາສາທາລະນະສຸກເສີນ.
ລັດຖະມົນຕີກະຊວງການຕ່າງປະເທດອາຊຽນທຸກທ່ານລ້ວນແຕ່ຍ້ອງຍໍຊົມເຊີຍຈີນທີ່ໄດ້ປະຕິບັດມາດຕະການຢ່າງເຂັ້ມແຂງເພື່ອຕ້ານການແຜ່ລະບາດຂອງພະຍາດອັກເສບປອດສາຍພັນໃໝ່ແລະມີທ່າທີເປີດເຜີຍ ໂປ່ງໃສແລະມີຄວາມຮັບຜິດຊອບລະດັບສູງ, ຕີລາຄາສູງຕໍ່ການປະກອບສ່ວນສຳຄັນຂອງຈີນໃນການຮັກສາຄວາມປອດໄພດ້ານສາທາລະນະສຸກຂອງພາກພື້ນກໍຄືຂອງໂລກ, ເຊື່ອວ່າຈີນຈະເອົາຊະນະໃນການຕ້ານການແຜ່ລະບາດຂອງພະຍາດໂດຍໄວໄດ້ຢ່າງແນ່ນອນ. ອາຊຽນແລະຈີນຄວນເພີ່ມຄວາມສາມັກຄີແລະການຮ່ວມມື, ຕໍ່ຕ້ານຂ່າວລືແລະປ້ອງກັນບໍ່ໃຫ້ເກີດຄວາມວຸ້ນວາຍ, ອອກແຮງຢ່າງສຸດຂີດເພື່ອຫຼີກເວັ້ນບໍ່ໃຫ້ການຮ່ວມມືແລະການພົວພັນປົກກະຕິໄດ້ຮັບຜົນສະທ້ອນ, ເຮັດໃຫ້ການຕ້ານການແຜ່ລະບາດຂອງພະຍາດອັກເສບປອດສາຍພັນໃໝ່ກາຍເປັນເລື່ອງທີ່ປະສົບຜົນສຳເລັດອີກດ້ານໜຶ່ງຂອງການຮ່ວມມືລະຫວ່າງອາຊຽນກັບຈີນ. ປະເທດອາຊຽນຍິນດີເພີ່ມທະວີການແລກປ່ຽນແລະຖອດຖອນບົດຮຽນນຳຈີນ, ຮ່ວມກັນຍົກສູງຄວາມສາມາດປ້ອງກັນແລະຄວບຄຸມຄວາມປອດໄພດ້ານສາທາລະນະສຸກຂອງພາກພື້ນ.
ກອງປະຊຸມລັດຖະມົນຕີກະຊວງການຕ່າງປະເທດຍັງໄດ້ອອກ “ຖະແຫຼງການຮ່ວມຂອງກອງປະຊຸມລັດຖະມົນຕີຕ່າງປະເທດຈີນ-ອາຊຽນສະໄໝພິເສດກ່ຽວກັບບັນຫາພະຍາດອັກເສບປອດຈາກໄວຣັສໂຄໂຣນາສາຍພັນໃໝ່” ອີກດ້ວຍ.