ວັນທີ 24 ກຸມພານີ້, ກະຊວງການຄ້າຈີນຖະແຫຼງວ່າ, ຈະໃຫ້ບູລິມະສິດຮັບປະກັນວິສາຫະກິດທຶນຕ່າງປະເທດ ແລະວິສາຫະກິດທີ່ເປັນການສົມທົບການຜະລິດ ທີ່ມີບົດບາດສຳຄັນໃນຕ່ອງໂສ້ການສະໜອງທົ່ວໂລກ ຟື້ນຟູການຜະລິດແລະເຮັດວຽກຄືນໃໝ່, ແລະຈະປະສານງານຊຸກຍູ້ໃຫ້ວິສາຫະກິດທຶນຕ່າງປະເທດແລະວິສາຫະກິດຕ່າງໆທີ່ສົມທົບການຜະລິດໃນຂົງເຂດເອເລັກໂຕຼນິກແລະລົດຍົນເປັນຕົ້ນຟື້ນຟູການເຮັດວຽກພ້ອມກັນ.
ຕາມການສະຖິຕິຝ່າຍທາງການສະແດງໃຫ້ເຫັນວ່າ, ໃນເດືອນມັງກອນປີນີ້, ທົ່ວປະເທດຈີນໄດ້ມີວິສາຫະກິດທຶນຕ່າງປະເທດທີ່ສ້າງຕັ້ງໃໝ່ 3485 ແຫ່ງ, ການນຳໃຊ້ທຶນຕ່າງປະເທດຕົວຈິງ 87,57 ຕື້ຢວນ, ເພີ່ມຂຶ້ນຫຼາຍກວ່າໄລຍະດຽວກັນຂອງປີກາຍ 4%. ເພື່ອສ້າງຄວາມໝັ້ນທ່ຽງແກ່ການຄາດຄະເນຂອງນັກລົງທຶນ, ຫວ່າງມໍ່ໆນີ້, ຈີນໄດ້ວາງມາດຕະການຕ່າງໆເພື່ອຊ່ວຍວິສາຫະກິດທຶນຕ່າງປະເທດຟື້ນຟູການຜະລິດແລະການທຸລະກິດເປັນປົກກະຕິ, ເຊິ່ງລວມທັງຊ່ວຍວິສາຫະກິດຈັດຊື້ວັດຖຸອຸປະກອນປ້ອງກັນພະຍາດທີ່ຈຳເປັນ, ຊຸກຍູ້ການກໍ່ສ້າງໂຄງການໃຫຍ່ຂອງທຶນຕ່າງປະເທດທີ່ກຳລັງສ້າງ, ແລະຮັບປະກັນໃຫ້ວິສາຫະກິດໄດ້ລົງທຶນຕາມແຜນ.