ວັນທີ 23 ກຸມພານີ້, ກອງປະຊຸມວາງແຜນເອກະພາບເພື່ອຊຸກຍູ້ການປ້ອງກັນແລະຄວບຄຸມສະພາບພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ແລະຈັດວາງວຽກງານພັດທະນາເສດຖະກິດສັງຄົມໄດ້ໄຂຂຶ້ນຢູ່ທີ່ປັກກິ່ງ. ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ ປະທານປະເທດ ປະທານຄະນະກຳມະການການທະຫານສູນກາງຈີນໄດ້ເຂົ້າຮ່ວມກອງປະຊຸມແລະກ່າວຄຳປາໄສອັນສຳຄັນ. ໂດຍເນັ້ນວ່າ, ຊົນຊາດຈີນໄດ້ຜ່ານຜ່າຄວາມທຸກຍາກລຳບາກຫຼາຍຫຼົບຫຼາຍຕ່າວ, ແຕ່ບໍ່ເຄີຍຖືກທຳລາຍແຕກແຍກຈັກເທື່ອ, ຫາກໄດ້ເຕີບໃຫຍ່ຂະຫຍາຍຕົວແລະບຸກບຶນກ້າວໄປໜ້າທ່າມກາງຄວາມຫຍຸ້ງຍາກລຳບາກກາກກຳ. ປັດຈຸບັນ, ວຽກງານປ້ອງກັນແລະຄວບຄຸມສະພາບພະຍາດພວມຢູ່ໃນໄລຍະຂໍກະແຈທີ່ສຸດ, ອົງການປົກຄອງທຸກຂັ້ນຕ້ອງເລັ່ງລັດກຳແໜ້ນວຽກງານປ້ອງກັນແລະຄວບຄຸມຢ່າງລະອຽດເດັດຂາດ, ຟື້ນຟູການຜະລິດແລະການດຳລົງຊີວິດຢ່າງເປັນລະບຽບຮຽບຮ້ອຍ, ເພີ່ມທະວີການປັບປຸງນະໂຍບາຍ, ພະຍາຍາມບັນລຸເປົ້າໝາຍພັດທະນາເສດຖະກິດສັງຄົມຈີນໃນປີນີ້ໃຫ້ດີ.
ທ່ານສີຈິ້ນຜິງກ່າວເນັ້ນວ່າ, ສະພາບພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ຄັ້ງນີ້ ແມ່ນເຫດການສຸກເສີນດ້ານສາທາລະນະສຸກທີ່ໜັກໜ່ວງທີ່ເກີດຂຶ້ນຫຼັງການສະຖາປະນາ ສປ ຈີນ ເປັນຕົ້ນມາ ເຊິ່ງມີຈຸດພິເສດທີ່ແຜ່ລະບາດອອກຢ່າງວ່ອງໄວທີ່ສຸດ, ຂອບເຂດການຕິດເຊື້ອກວ້າງຂວາງທີ່ສຸດ ແລະ ການປ້ອງກັນແລະຄວບຄຸມມີຄວາມຫຍຸ້ງຍາກຫຼາຍທີ່ສຸດ. ໂດຍຜ່ານການທຳຄວາມພະຍາຍາມຢ່າງລຳບາກ, ສະຖານະການປ້ອງກັນແລະຄວບຄຸມພະຍາດໃນປັດຈຸບັນໄດ້ມີທ່ວງທ່າຂະຫຍາຍຕົວໄປທາງທີ່ດີຢ່າງຕັ້ງໜ້າ, ໄດ້ສະແດງໃຫ້ເຫັນອີກເທື່ອໜຶ່ງເຖິງທ່າແຮງພົ້ນເດັ່ນຂອງການນຳພາໂດຍພັກກອມມູນິດຈີນແລະລະບອບສັງຄົມນິຍົມທີ່ມີສີສັນພິເສດຂອງຈີນ.
ທ່ານສີຈິ້ນຜິງກ່າວເນັ້ນວ່າ, ສະພາບພື້ນຖານຂອງເສດຖະກິດຈີນທີ່ພັດທະນາເປັນຢ່າງດີໃນໄລຍະຍາວ ບໍ່ມີການປ່ຽນແປງ, ການກະທົບຈາກສະພາບພະຍາດແມ່ນເປັນໄລຍະສັ້ນ, ສາມາດຄວບຄຸມໄດ້ໃນດ້ານກວມລວມ.