ວັນທີ 26 ກຸມພານີ້, ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນກ່າວວ່າ, ສະຖານະການປ້ອງກັນແລະຄວບຄຸມສະພາບພະຍາດຂອງຈີນພວມມີການຂະຫຍາຍຕົວເປັນຢ່າງດີ, ເສດຖະກິດສັງຄົມເລັ່ງລັດຟື້ນຟູການພັດທະນາ, ຂະນະດຽວກັນ, ສະພາບການພະຍາດຢູ່ແຂວງຫູເປີຍແລະນະຄອນອູຮັ້ນຍັງຄົງສັບສົນແລະເຄັ່ງຄັດຢູ່, ບໍ່ຄວນປະໝາດຄວາມສ່ຽງທີ່ສະພາບພະຍາດອາດຈະຮ້າຍແຮງຄືນໃນນາງເຂດອື່ນ. ປັດຈຸບັນ, ຈີນບໍ່ພຽງແຕ່ຕ້ອງສືບຕໍ່ເພີ່ມທະວີການປ້ອງກັນແລະຄວບຄຸມພະຍາດ, ຍັງຕ້ອງເລັ່ງລັດກຳແໜ້ນວຽກງານຕ່າງໆກ່ຽວກັບການພັດທະນາເສດຖະກິດສັງຄົມ.
ກອງປະຊຸມກ່າວເນັ້ນວ່າ, ຕ້ອງສືບຕໍ່ເຕົ້າໂຮມກຳລັງແລະຊັບພະຍາກອນ ເພື່ອເພີ່ມທະວີການປ້ອງກັນແລະຄວບຄຸມພະຍາດຢູ່ແຂວງຫູເປີຍແລະນະຄອນອູຮັ້ນຢ່າງຮອບດ້ານ, ເພີ່ມທະວີມາດຕະການປ້ອງກັນຕໍ່ກຸ່ມຄົນທີ່ອ່ອນແອ ທີ່ຕ້ອງການການບໍລິການຕ່າງໆຈາກໂຮງລ້ຽງຜູ້ເຖົ້າ, ໂຮງຊ່ວຍເຫຼືອ, ໂຮງລ້ຽງເດັກ, ແລະອົງການປິ່ນປົວພະຍາດໂລກຈິດເປັນຕົ້ນ ພ້ອມດ້ວຍພະນັກງານທີ່ເຮັດວຽກຢູ່ແນວໜ້າການປ້ອງກັນແລະຄວບຄຸມພະຍາດ.
ກອງປະຊຸມຊີ້ອອກວ່າ, ຕ້ອງຊຸກຍູ້ການຟື້ນຟູເຮັດວຽກແລະການຜະລິດຢ່າງໝັ້ນທ່ຽງໜັກແໜ້ນ, ຈັດຕັ້ງປະຕິບັດນະໂຍບາຍຕ່າງໆທີ່ໃຫ້ບູລິມະສິດຕໍ່ວິສາຫະກິດ; ຕ້ອງສືບຕໍ່ຮ່ວມມືຢ່າງໃກ້ຊິດກັບອົງການອະນາໄມໂລກ, ແລກປ່ຽນແລະແບ່ງປັນບົດຮຽນປ້ອງກັນພະຍາດກັບປະເທດທີ່ກ່ຽວຂ້ອງ, ປະສານສົມທົບມາດຕະການຕ່າງໆ, ພ້ອມກັນປົກປັກຮັກສາຄວາມປອດໄພດ້ານສາທາລະນະສຸກຂອງພາກພື້ນກໍຄືຂອງໂລກ.