ວັນທີ 3 ມີນານີ້, ທ່ານຫຼີເຄິ້ສຽງ ນາຍົກລັດຖະມົນຕີຈີນໄດ້ເປັນປະທານຈັດກອງປະຊຸມລັດຖະບານຈີນ ເຊິ່ງໄດ້ວາງແຜນປັບປຸງກົນໄກປະສານງານວຽກງານ “6 ຄວາມໝັ້ນຄົງ”, ຮັບມືກັບຜົນກະທົບຈາກພະຍາດ COVID-19 ຢ່າງມີປະສິດທິຜົນ ແລະຊຸກຍູ້ເສດຖະກິດ-ສັງຄົມໃຫ້ມີຄວາມໝັ້ນຄົງ; ກອງປະຊຸມໄດ້ຕົກລົງສະໜັບສະໜູນມາດຕະການຂອງຂະແໜງການການຄົມມະນາຄົມ, ການຂົນສົ່ງ ແລະການຈັດສົ່ງສິນຄ້າດ່ວນ ແລະອື່ນໆໃນການຜ່ານຜ່າຄວາມຫຍຸ້ງຍາກເພື່ອເລັ່ງລັດຟື້ນຟູພັດທະນາຄືນໃໝ່; ໄດ້ຕົກລົງເພີ່ມທະວີງົບປະມານໃຫ້ແກ່ທ້ອງຖິ່ນ, ຍົກສູງຄວາມສາມາດຮັບປະກັນຊີວິດການເປັນຢູ່ພື້ນຖານຂອງປະຊາຊົນ, ຮັບປະກັນເງິນເດືອນ ແລະການດຳເນີນງານຂອງວິສາຫະກິດຕ່າງໆ.
ກອງປະຊຸມດັ່ງກ່າວຍັງໄດ້ຊີ້ໃຫ້ເຫັນວ່າ: ຕາມການວາງແຜນຂອງສູນກາງພັກກອມມູນິດຈີນ ແລະລັດຖະບານຈີນ ເພື່ອຊຸກຍູ້ການປ້ອງກັນ ແລະຄວບຄຸມພະຍາດ COVID-19 ແລະການພັດທະນາທາງເສດຖະກິດ-ສັງຄົມ, ແມ່ນຕ້ອງເພີ່ມຄວາມເຂັ້ມແຂງໃນການປະຕິບັດວຽກງານສະເພາະສືບຕໍ່ເຮັດໃຫ້ການປະກອບອາຊີບ, ຂະແໜງການເງິນ, ການຄ້າຕ່າງປະເທດ, ການລົງທຶນທັງພາຍໃນ ແລະຕ່າງປະເທດ ແລະສິ່ງທີ່ຄາດຫວັງໄວ້ໃຫ້ມີຄວາມໝັ້ນຄົງ, ຮັບມືກັບຜົນກະທົບຈາກພະຍາດ COVID-19 ທີ່ມີຕໍ່ເສດຖະກິດໃຫ້ມີປະສິດທິຜົນ. ຕ້ອງເສີມຂະຫຍາຍບົດບາດຂອງນະໂຍບາຍມະຫາພາກ, ການຄ້າ ແລະການລົງທຶນຂອງຕ່າງປະເທດ ກໍຄືກົນໄກປະສານງານຮັກສາຄວາມໝັ້ນຄົງຂອງຂະແໜງການເງິນ, ອອກມາດຕະການຮັບມືທີ່ມີເຂັ້ມແຂງ ແລະມີປະສິດທິຜົນຢ່າງທັນການ, ເພີ່ມທະວີກຳລັງຂັບເຄື່ອນພາຍໃນ ແລະຮັກສາການເຄື່ອນໄຫວຂອງເສດຖະກິດສຳລັບໝົດປີ 2020 ໃຫ້ຢູ່ໃນລະດັບທີ່ສົມເຫດສົມຜົນ.