ລັດຖະມົນຕີສາທາລະນະສຸກລາວກ່າວວ່າ, ມາດຕະການປ້ອງກັນຄວບຄຸມພະຍາດອັກເສບປອດ covid-19 ຂອງຈີນເປັນແບບຢ່າງຂອງໂລກ
ຫວ່າງມໍ່ໆນີ້, ໃນເວລາໃຫ້ສຳພາດຕໍ່ນັກຂ່າວ CMG, ທ່ານ ບຸນກອງ ສີຫາວົງລັດຖະມົນຕີກະຊວງສາທາລະນະສຸກສປປລາວກ່າວວ່າ, ມາດຕະການປ້ອງກັນຄວບຄຸມພະຍາດອັກເສບປອດ covid-19 ຂອງຈີນເປັນແບບຢ່າງຂອງໂລກ, ບົດຮຽນຂອງຈີນເປັນຕາຖອດຖອນ. ລາວຍິນດີເພີ່ມທະວີການແລກປ່ຽນ ແລະ ການຮ່ວມມືກັບຈີນຕື່ມອີກ.
ທ່ານບຸນກອງກ່າວວ່າ, ປັດຈຸບັນ, ຈຳນວນກໍລະນີທີ່ບົ່ງມະຕິເປັນພະຍາດອັກເສບປອດ covid-19 ຂອງຈີນໄດ້ຫຼຸດລົງໂດຍຕະຫຼອດມາ, ຜູ້ອອກໂຮງໝໍນັບມື້ນັບຫຼາຍຂຶ້ນ, ນີ້ສະແດງໃຫ້ເຫັນວ່າ, ມາດຕະການປ້ອງກັນຄວບຄຸມພະຍາດຂອງຈີນໄດ້ມີປະສິດທິຜົນສູງ.
ທ່ານບຸນກອງເຫັນວ່າ, ນອກຈາກການປ້ອງກັນ ແລະ ຄວບຄຸມຂອງປະເທດຕົນ, ຈີນຍັງຕັ້ງໜ້າແບ່ງປັນບົດຮຽນປ້ອງກັນຄວບຄຸມພະຍາດໃຫ້ປະເທດອື່ນໆ, ປະກອບສ່ວນອັນຕັ້ງໜ້າເພື່ອປ້ອງກັນພະຍາດແຜ່ລະບາດລະຫວ່າງຊາດຢ່າງບັງເກີດຜົນ, ມີຄວາມໝາຍສຳຄັນຕໍ່ປະເທດຕ່າງໆໃນໂລກ.
ໃນຖານະທີ່ເປັນສະມາຊິກໜ່ວຍງານປ້ອງກັນຄວບຄຸມພະຍາດອັກເສບປອດ covid-19 ຂອງລາວ, ທ່ານບຸນກອງບອກນັກຂ່າວວ່າ, ໜ່ວຍຊ່ຽວຊານຂອງລາວ ກັບ ຄະນະກຳມະການສາທາລະນະສຸກແລະອະນາໄມແຫ່ງຊາດຈີນໄດ້ແລກປ່ຽນຢ່າງໃກ້ຊິດ ເພື່ອຖອດຖອນບົດຮຽນຂອງຈີນ. ລາວທັງໄດ້ສ້າງສາຍດ່ວນເພື່ອຕິດຕໍ່ພົວພັນກັບສະຖານທູດຈີນປະຈຳລາວ, ມາດຕະການເຫຼົ່ານີ້ໄດ້ຮັບຜົນຢ່າງເດັ່ນຊັດ, ຈົນຮອດປັດຈຸບັນ, ຢູ່ລາວຍັງບໍ່ໄດ້ພົບຜູ້ຖືກບົ່ງມະຕິຜູ້ເປັນພະຍາດອັກເສບປອດ covid-19 ຈັກກໍລະນີ. ລາວຍິນດີສືບຕໍ່ຮັກສາການແລກປ່ຽນ ແລະ ການຮ່ວມມືກັບຈີນ.
ປັດຈຸບັນ, ວິສາຫະກິດ ແລະ ໂຮງງານຂອງຈີນຈຳນວນຫຼາຍໄດ້ເລີ່ມຟື້ນຟູການຜະລິດຢ່າງເປັນລະບຽບຮຽບຮ້ອຍແລ້ວ, ທ່ານບຸນກອງສະແດງຄວາມເຊື່ອວ່າ, ຫຼັງຈາກພະຍາດອັກເສບປອດ covid-19 ເທື່ອນີ້ຖືກຄວບຄຸມໄວ້ແລ້ວ, ເສດຖະກິດຈີນກໍ່ຈະໄດ້ຮັບການຟື້ນຟູໂດຍໄວ.