ຕອນຄ່ຳວັນທີ 16 ມີນານີ້, ທ່ານສີຈິ້ນຜິງ ປະທານປະເທດຈີນໄດ້ສົນທະນາຜ່ານທາງໂທລະສັບກັບທ່ານຈູເຊບເປ ກອນເຕ ນາຍົກລັດຖະມົນຕີອີຕາລີຕາມນັດໝາຍ.
ທ່ານສີຈິ້ນຜິງກ່າວວ່າ, ຈີນເດັດດ່ຽວສະໜັບສະໜູນມາດຕະການປ້ອງກັນແລະຄວບຄຸມພະຍາດໂຄວິດ-19 ຂອງອີຕາລີ ແລະ ມີຄວາມໝັ້ນໃຈອັນເຕັມປ່ຽມວ່າ ອີຕາລີຈະສາມາດເອົາຊະນະການແຜ່ລະບາດຂອງພະຍາດໄດ້. ຈີນຈະສົ່ງໜ່ວຍຊ່ຽວຊານການແພດໄປອີຕາລີອີກ ແລະ ຈະໃຫ້ການຊ່ວຍເຫຼືອວັດຖຸອຸປະກອນການແພດແກ່ອີລາຕີຕາມຄວາມສາມາດຂອງຕົນ. ຈີນຍິນດີຮ່ວມກັນກັບອີຕາລີ, ປະກອບສ່ວນເຂົ້າໃນການຮ່ວມມືສາກົນເພື່ອຕ້ານກັບການແຜ່ລະບາດຂອງພະຍາດ ແລະ ສ້າງ “ເສັ້ນທາງສາຍໄໝສຸຂະພາບ”.
ທ່ານຈູເຊບເປ ກອນເຕກ່າວວ່າ, ລັດຖະບານຈີນໄດ້ໃຊ້ມາດຕະການທີ່ເດັດຂາດ ແລະ ໄດ້ຄວບຄຸມການແຜ່ລະບາດຂອງພະຍາດຢ່າງບັງເກີດຜົນ ເຊິ່ງໄດ້ເປັນກຳລັງໃຈໃຫ້ອີຕາລີ ແລະ ຫຼາຍປະເທດໄດ້ເປັນຢ່າງດີ ແລະ ເປັນບົດຮຽນທີ່ດີສຳລັບອີຕາລີ. ອີຕາລີຂໍສະແດງຄວາມຊົມເຊີຍຕໍ່ເລື່ອງນີ້ ແລະ ຂອບໃຈປະເທດຈີນທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອອັນລ້ຳຄ່າໃຫ້ແກ່ອີຕາລີ ໃນໄລຍະທີ່ອີຕາລີຕົກຢູ່ໃນສະພາບຫຍຸ້ງຍາກທີ່ສຸດ ເຊິ່ງໄດ້ພິສູດໃຫ້ເຫັນເຖິງມິດຕະພາບອັນເລິກເຊິ່ງລະຫວ່າງສອງປະເທດອີກຄັ້ງໜຶ່ງ. ຂ້າພະເຈົ້າຂໍຕາງໜ້າໃຫ້ລັດຖະບານ ແລະ ປະຊາຊົນອີຕາລີ, ຂໍສະແດງຄວາມຂອບໃຈຢ່າງຈິງໃຈຕໍ່ຈີນ ແລະ ເຊື່ອໝັ້ນວ່າ, ພາຍຫຼັງສາມາດຜ່ານຜ່າການແຜ່ລະບາດຂອງພະຍາດຄັ້ງນີ້ແລ້ວ, ການພົວພັນລະຫວ່າງອີຕາລີ-ຈີນຍ່ອມຈະໝັ້ນຄົງຄະໜົງແກ່ນກວ່າເກົ່າ.