ຕາມຂ່າວCRI：ຕອນແລງວັນທີ 23 ມີນານີ້, ທ່ານສີຈິ້ນຜີງ, ປະທານປະເທດຈີນໄດ້ໂອ້ລົມກັນທາງໂທລະສັບກັບທ່ານໂບຣິສ ຈອນຊັນ, ນາຍົກລັດຖະມົນຕີອັງກິດ, ທ່ານເອມານູເອນ ມາໂຄຼນ, ປະທານາທິບໍດີຝຣັ່ງແລະທ່ານອັບເດນ ຟາດາ ອາ ສິສ, ປະທານາທິບໍດີເອຢິບ.
ໃນເວລໂອ້ລົມກັນທາງໂທລະສັບກັບທ່ານໂບຣິສ ຈອນຊົນ, ນາຍົກລັດຖະມົນຕີອັງກິດ, ທ່ານສີຈິ້ນຜີງໄດ້ຕອບຄຳຖາມຂອງຝ່າຍອັງກິດໂດຍແນະນຳກ່ຽວກັບມາດຕະການຂອງຈີນທີ່ໃຊ້ໃນການປ້ອງກັນແລະຄວບຄຸມສະພາບພະຍາດໂຄວິດ-19, ແລະກ່າວວ່າຈີນຍິນດີໃຫ້ການສະໜັບສະໜູນແລະຊ່ວຍເຫຼືອອັງກິດ, ຫວັງວ່າອັງກິດຈະປົກປັກຮັກສາຄວາມປອດໄພດ້ານສຸຂະພາບແລະສິດຜົນປະໂຫຍດຢ່າງຊອບດ້ວຍກົດໝາຍຂອງພົນລະເມືອງຈີນທີ່ຢູ່ອັງກິດໂດຍສະເພາະແມ່ນນັກສຶກສາຈີນທີ່ຮຽນຢູ່ອັງກິດຢ່າງແທ້ຈິງ.
ທ່ານໂບຣິສ ຈອນຊັນກ່າວວ່າ, ລັດຖະບານຈີນແລະປະຊາຊົນຈີນໄດ້ທູ່ມເທຄວາມພະຍາຍາມຢ່າງລຳບາກແລະມີການເສຍສະຫຼະຢ່າງມະຫາສານ, ຈິ່ງໄດ້ຮັບຜົນສຳເລັດຢ່າງຍິ່ງໃຫຍ່ໃນການປ້ອງກັນແລະຄວບຄຸມພະຍາດໃນຄັ້ງນີ້. ອັງກິດຂອບໃຈຈີນທີ່ໄດ້ໃຫ້ການສະໜັບສະໜູນແລະຊ່ວຍເຫຼືອຢ່າງມີຄ່າຕໍ່ອັງກິດ, ອັງກິດຈະພະຍາຍາມຢ່າງສຸດຂີດເພື່ອເບິ່ງແຍງດູແລສຸຂະພາບແລະຄວາມປອດໄພຂອງພົນລະເມືອງຈີນຢູ່ອັງກິດກໍ່ຄືນັກສຶກສາຈີນທີ່ຮຽນຢູ່ອັງກິດ.
ໃນເວລາໂອ້ລົມກັນທາງໂທລະສັບກັບທ່ານເອມານູເອນ ມາໂຄຼນ, ປະທານາທິບໍດີຝຣັ່ງ, ທ່ານສີຈິ້ນຜີງກ່າວເນັ້ນວ່າ, ຈີນຍິນດີສືບຕໍ່ສະໜັບສະໜູນແລະການຊ່ວຍເຫຼືອຝຣັ່ງຕາມຄວາມສາມາດຂອງຕົນ. ທ່ານເອມານູເອນ ມາໂຄຼນໄດ້ແນະນຳສະພາບພະຍາດພາຍໃນຝຣັ່ງແລະມາດຕະການທີ່ກ່ຽວຂ້ອງທີ່ຝຣັ່ງໄດ້ປະຕິບັດ. ເຊິ່ງປະມຸກລັດສອງປະເທດຕົກລົງຮັກສາການແລກປ່ຽນຢ່າງແໜ້ນແຟ້ນ, ຊຸກຍູ້ການໄປມາຫາສູ່ກັນແລະການຮ່ວມມືໃນແຕ່ລະຂົງເຂດລະຫວ່າງສອງຝ່າຍ, ຮັບປະກັນໃຫ້ການພົວພັນລະຫ່ວາງຈີນ-ຝຣັ່ງໄດ້ຮັບການພັດທະນາໄປໜ້າໃນລະດັບສູງຢ່າງຕໍ່ເນື່ອງ.
ໃນເວລາໂອ້ລົມກັນທາງໂທລະສັບກັບທ່ານອັບເດນ ຟາດາ ອາ ສິສ, ປະທານາທິບໍດີເອຢິບ, ທ່ານສີຈິ້ນຜີງຊີ້ອອກວ່າ, ພາຍຫຼັງສະພາບພະຍາດໄດ້ເກີດຂຶ້ນ, ເອຢິບໄດ້ສະແດງການສະໜັບສະໜູນການຕໍ່ຕ້ານພະຍາດຂອງຈີນ, ເຊິ່ງໄດ້ສະແດງໃຫ້ເຫັນເຖິງມິດຕະພາບຢ່າງເລິກເຊິ່ງທີ່ທົນຕໍ່ຟ້າຝົນລົມແດງຮ່ວມກັນແລະການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຈີນ-ເອຢິບທີ່ມີລະດັບສູງ. ເອຢິບກໍໄດ້ພະເຊີນໜ້າກັບໜ້າທີ່ຮີບດ່ວນໃນການຕໍ່ຕ້ານພະຍາດໃນປັດຈຸບັນນີ້, ຈີນຍິນດີແບ່ງປັນຂໍ້ມູນຂ່າວສານກ່ຽວກັບພະຍາດ, ບົດຮຽນຂອງການປ້ອງກັນຄວບຄຸມແລະການປິ່ນປົວພະຍາດ, ຜົນງານການຄົ້ນຄວ້າທາງແພດສາດ, ສະໜອງວັດຖຸອຸປະກອນດ້ານການແພດ, ເພື່ອສະໜັບສະໜູນຕໍ່ວຽກງານການປ້ອງກັນແລະຄວບຄຸມພະຍາດຂອງເອຢິບ, ຮ່ວມກັນຕໍ່ຕ້ານກັບພະຍາດ.
ທ່ານ ອັບເດນ ຟາດາ ອາ ສິສກ່າວວ່າ, ການຕໍ່ຕ້ານພະຍາດຂອງຈີນໄດ້ຮັບຄວາມຄືບໜ້າຢ່າງຕັ້ງໜ້າ, ເຊິ່ງໄດ້ຢືນຢັນອີກເທື່ອໃໝ່ວ່າການນຳພາຢ່າງສະຫຼາດສ່ອງໃສຂອງທ່ານປະທານແມ່ມີຄວາມເຂັ້ມແຂງທີ່ສຸດ, ປະຊາຊົນຈີນມີຄວາມສາມັກຄີກັນແລະມີຄວາມຍິ່ງໃຫຍ່. ເອຢິບກັບຈີນແມ່ນຄູ່ຮ່ວມຢ່າງມີໄມຕີຈິດມິດຕະພາບເປັນພິເສດ. ຂ້າພະເຈົ້າໃຫ້ຄວາມສຳຄັນຢ່າງສູງຕໍ່ການພົວພັນລະຫວ່າງເອຢິບ-ຈີນ, ຍິນດີພະຍາຍາມຮ່ວມກັບຈີນ, ຊຸກຍູ້ການຮ່ວມມືແທ້ຈິງທີ່ມີຜົນປະໂຫຍດຕໍ່ກັນໃນທຸກຂົງເຂດລະຫວ່າງສອງປະເທດ, ເພີ່ມທະວີການແລກປ່ຽນແລະການປະສານງານກັນໃນວຽກງານສາກົນ.