ຕອນຄ່ຳວັນທີ 25 ມີນານີ້, ທ່ານສີຈິ້ນຜິງ ປະທານປະເທດຈີນໄດ້ໂທລະສັບລົມກັບທ່ານນາງອັນເກລາ ໂດໂຣເຊຍ ເມີເຄວ ນາຍົກລັດຖະມົນຕີເຢຍລະມັນ.
ທ່ານສີຈິ້ນຜິງເນັ້ນວ່າ: ຈີນເດັດດ່ຽວສະໜັບສະໜູນເຢຍລະມັນຕໍ່ຕ້ານກັບພະຍາດ, ຍິນດີສືບຕໍ່ໃຫ້ຄວາມຊ່ວຍເຫຼືອຕາມຄວາມສາມາດຂອງຕົນ. ຜູ້ຊ່ຽວຊານຂອງສອງປະເທດໄດ້ແລກປ່ຽນກັນອອນລາຍ, ຈີນຍິນດີແບ່ງປັນບົດຮຽນດ້ານການປ້ອງກັນ ການຄວບຄຸມແລະການປິ່ນປົວໃຫ້ເຢຍລະມັນ, ເພີ່ມທະວີການຮ່ວມມືດ້ານການຄົ້ນຄວ້າຜະລິດຢາວັກແຊນແລະຢາຕ້ານພະຍາດ, ປະກອບສ່ວນເຂົ້າໃນການຮັກສາສຸຂະພາບຂອງປະຊາຊົນສອງຊາດແລະຄວາມປອດໄພດ້ານສາທາລະນະສຸກທົ່ວໂລກ.
ທ່ານນາງເມີເຄວກ່າວວ່າ: ປະຈຸບັນ, ສະພາບພະຍາດຢູ່ເອີຣົບຂ້ຽວຂາດຫຼາຍ, ເຢຍລະມັນກຳລັງໃຊ້ມາດຕະການປ້ອງກັນແລະຄວບຄຸມຢ່າງເດັດຂາດ ແລະຂອບໃຈນຳຈີນທີ່ໄດ້ໃຫ້ຄວາມຊ່ວຍເຫຼືອຢ່າງທັນການແລະລ້ຳຄ່າ, ຫວັງວ່າຈະດຳເນີນການຮ່ວມມືກັບຈີນໃນຂົງເຂດການຄົ້ນຄວ້າພັດທະນາຢາວັກແຊນແລະຢາຕ້ານພະຍາດ, ສ້າງແບບຢ່າງທີ່ດີໃນການສາມັກຄີກັນຕ້ານພະຍາດ. ເຢຍລະມັນຫວັງວ່າ, ຫຼັງຈາກພະຍາດໄດ້ຜ່ານພົ້ນໄປແລ້ວ, ຈະສືບຕໍ່ຊຸກຍູ້ການໄປມາຫາສູ່ກັນແລະຮ່ວມມືທີ່ສຳຄັນລະຫວ່າງເຢຍລະມັນ-ຈີນ ແລະ ເອີຣົບ-ຈີນ.