ວັນທີ 26 ມີນານີ້, ກະຊວງການຕ່າງປະເທດແລະກົມຄຸ້ມຄອງຊາວຍົກຍ້າຍແຫ່ງຊາດ ສປ ຈີນໄດ້ປະກາດແຈ້ງການກ່ຽວກັບການບໍ່ໃຫ້ຊາວຕ່າງປະເທດທີ່ຖືວິຊາຈີນພາຍໃນອາຍຸນຳໃຊ້ແລະໃບອະນຸຍາດພັກເຊົາຢູ່ຈີນເຂົ້າເມືອງເປັນຊົ່ວຄາວ. ແຈ້ງການດັ່ງກ່າວລະບຸໄວ້ວ່າ, ຈີນຕົກລົງນັບແຕ່ເວລາ 0 ໂມງວັນທີ 28 ມີນານີ້ເປັນຕົ້ນໄປ, ຢຸດຕິການອະນຸຍາດໃຫ້ຊາວຕ່າງປະເທດທີ່ຖືວິຊາເຂົ້າເມືອງຈີນພາຍໃນອາຍຸນຳໃຊ້ແລະໃບອະນຸຍາດພັກເຊົາຢູ່ຈີນເຂົ້າເມືອງເປັນຊົ່ວຄາວ. ຢຸດຕິການອະນຸຍາດໃຫ້ຊາວຕ່າງປະເທດທີ່ຖືບັດການທ່ອງທ່ຽວທຸລະກິດ APEC ເຂົ້າເມືອງເປັນຊົ່ວຄາວ. ຢຸດຕິນະໂຍບາຍຕ່າງໆເຊັ່ນ ວິຊາກັບດ່ານ ການປອດວິຊາຜ່ານແດນພາຍໃນເວລາ 24/72/144 ຊົ່ວໂມງ ການປອດວິຊາເຂົ້າເມືອງຂອງແຂວງໄຫຫຼຳ ການປອດວິຊາສຳລັບກຳປັ່ນທ່ອງທ່ຽວຈອດຢູ່ຊຽງໄຮ້ ການປອດວິຊາພາຍໃນ 144 ຊົ່ວໂມງສຳລັບຊາວຕ່າງປະເທດທີ່ຢູ່ເຂດຮົງກົງແລະມາກາວເຂົ້າແຂວງກວາງຕຸ້ງເປັນຄະນະ ການປອດວິຊາສຳລັບຄະນະນັກທ່ອງທ່ຽວອາຊຽນເຂົ້າເຂດກວາງຊີ ແລະອື່ນໆ. ສຳລັບຜູ້ທີ່ຖືວິຊາການທູດ ລັດຖະການ ບູລິມະສິດ ແລະເລກ C ຈະບໍ່ຖືກກະທົບໃນເວລາເຂົ້າເມືອງ. ຖ້າແມ່ນເພື່ອດຳເນີນການເຄື່ອນໄຫວເສດຖະກິດການຄ້າ ວິທະຍາສາດເຕັກໂນໂລຊີ ຫຼືເພື່ອຕອບສະໜອງຄວາມຕ້ອງການດ້ານມະນຸດສະທຳຢ່າງສຸກເສີນ, ຊາວຕ່າງປະເທດສາມາດຂໍວິຊານຳສະຖານທູດຫຼືກົງສຸນຈີນປະຈຳປະເທດຕົນ. ສຳລັບຊາວຕ່າງປະເທດຜູ້ທີ່ໄດ້ຮັບວິຊາຫຼັງເວລາປະກາດແຈ້ງການດັ່ງກ່າວຈະບໍ່ຖືກກະທົບໃນເວລາເຂົ້າເມືອງຈີນ.
ທັງນີ້ແມ່ນມາດຕະການຊົ່ວຄາວທີ່ຈີນຈຳເປັນຕ້ອງໃຊ້ເພື່ອຮັບມືກັບພະຍາດໃນປະຈຸບັນ ໂດຍໄດ້ພິຈາລະນາເຖິງມາດຕະການຂອງຫຼາຍປະເທດ. ຈີນຍິນດີຮັກສາການຕິດຕໍ່ພົວພັນຢ່າງແໜ້ນແຟ້ນກັບຝ່າຍຕ່າງໆ, ເຮັດວຽກງານໄປມາຫາສູ່ກັນລະຫວ່າງຄົນຈີນແລະຄົນຕ່າງປະເທດໃຫ້ດີ. ຈີນຈະປັບປຸງມາດຕະການດັ່ງກ່າວແລະປະກາດແຈ້ງການຕ່າງຫາກໂດຍອີງຕາມສະພາບຕົວຈິງຂອງການລະບາດພະຍາດ.