ຕອນຄ່ຳວັນທີ 26 ມີນານີ້, ທ່ານສີຈິ້ນຜິງ ປະທານປະເທດຈີນໄດ້ເຂົ້າຮ່ວມກອງປະຊຸມສຸດຍອດວິສາມັນ G20 ເພື່ອຮັບມືກັບພະຍາດໂຄວິດ-19. ທ່ານສີຈິ້ນຜິງໄດ້ປະກອບຄຳເຫັນ ໂດຍກ່າວເນັ້ນວ່າ: ພະຍາດໂຄວິດ-19 ກຳລັງແຜ່ລະບາດໃນທົ່ວໂລກ, ສິ່ງທີ່ປະຊາຄົມໂລກຕ້ອງການທີ່ສຸດແມ່ນການຍຶດໝັ້ນຄວາມໝັ້ນໃຈ, ຮ່ວມໃຈຮ່ວມແຮງກັນ, ຮັບມືດ້ວຍຄວາມສາມັກຄີ, ເພີ່ມທະວີການຮ່ວມມືສາກົນຢ່າງຮອບດ້ານ, ເຕົ້າໂຮມກຳລັງທີ່ເຂັ້ມແຂງຮ່ວມກັນຍາດເອົາໄຊຊະນະໃນຕໍ່ຕ້ານພະຍາດຕິດແປດອັນຮ້າຍແຮງຂອງມວນມະນຸດຄັ້ງນີ້.
ທ່ານສີຈິ້ນຜິງກ່າວເນັ້ນວ່າ, ປະຊາຄົມໂລກຄວນເລັ່ງລັດເຄື່ອນໄຫວ ເດັດດ່ຽວເຂົ້າຮ່ວມບັ້ນຮົບປ້ອງກັນຄວບຄຸມແລະຕໍ່ຕ້ານພະຍາດໂຄວິດ-19ໃນຄັ້ງນີ້, ສະກັດກັ້ນທ່ວງທ່າການລະບາດຂອງພະຍາດ. ຈີນຈະຍຶດໝັ້ນທັດສະນະປະຊາຄົມຮ່ວມຊາຕາກຳມວນມະນຸດ, ຍິນດີແບ່ງປັນບົດຮຽນທີ່ດີທີ່ໄດ້ຮັບຈາກການປ້ອງກັນແລະຄວບຄຸມພະຍາດກັບບັນດາປະເທດທີ່ກ່ຽວຂ້ອງ, ດຳເນີນການຄົ້ນຄວ້າພັດທະນາຢາປົວແລະວັກແຊກຂອງພະຍາດນີ້, ແລະໃຫ້ຄວາມຊ່ວຍເຫຼືອແກ່ປະເທດທີ່ມີພະຍາດໂຄວິດ-19 ລະບາດຕາມຄວາມສາມາດຂອງຕົນ.
ທ່ານສີຈິ້ນຜິງກ່າວເນັ້ນວ່າ, ໃນໄລຍະທີ່ຈີນຜະເຊີນກັບຄວາມຫຍຸ້ງຍາກຫຼາຍທີ່ສຸດ, ສະມາຊິກສ່ວນຫຼາຍໃນປະຊາຄົມໂລກໄດ້ໃຫ້ການຊ່ວຍເຫຼືອແລະສະໜັບສະໜູນຈີນຢ່າງຈິງໃຈ, ພວກເຮົາຈະຈື່ຈໍາ ແລະຖະນຸຖະໜອມມິດຕະພາບນີ້ຈົນຊົ່ວກາລະນານ.
ທ່ານສີຈິ້ນຜິງກ່າວເນັ້ນວ່າ,ເຊື້ອໄວຣັດໄຮ້ພູມແດນ,ພະຍາດທີ່ແຜ່ລະບາດອອກນັ້ນເປັນສັດຕູຮ່ວມຂອງພວກເຮົາ.ປະເທດຕ່າງໆຕ້ອງຮ່ວມມືກັນສ້າງເຄືອຂ່າຍປ້ອງກັນແລະຄວບຄຸມພະຍາດທີ່ແໜ້ນແຟ້ນທີ່ສຸດ. ເຊິ່ງຈີນໄດ້ສ້າງສູນຄວາມຮູ້ກ່ຽວກັບການປ້ອງກັນແລະຄວບຄຸມພະຍາດໂຄວິດ-19 ຜ່ານທາງອິນເຕີເນັດແລ້ວ, ແລະໄດ້ເປີດເຜີຍຕໍ່ແຕ່ລະປະເທດ.
ທ່ານສີຈິ້ນຜີງກ່າວເນັ້ນວ່າ, ຈີນສະໜັບສະໜູນໃຫ້ອົງການອະນາໄມໂລກເສີມຂະຫຍາຍບົດບາດ ນຳພາໃນການວາງມາດຕະການປ້ອງກັນແລະຄວບຄຸມພະຍາດທີ່ເໝະສົມຕາມຫຼັກວິທະຍາສາດ, ພະຍາຍາມສະກັດກັ້ນບໍ່ໃຫ້ພະຍາດແຜ່ລະບາດຂ້າມຊາຍແດນ. ກຸ່ມG20 ປະເທດຄວນ ເພີ່ມທະວີການຊົມໃຊ້ຂໍ້ມູນຂ່າວສານດ້ານການປ້ອງກັນແລະຄວບຄຸມພະຍາດນຳກັນ,ເຜີຍແຜ່ໂຄສະນາຄວາມຮູ້ດ້ານການປ້ອງກັນແລະຄວບຄຸມຢ່າງຮອບດ້ານ, ມີລະບົບ ແລະບັງເກີດຜົນ, ຈັດກອງ ປະຊຸມລະດັບສູງດ້ານຄວາມປອດໄພສາທາລະນະສຸກທົ່ວໂລກໃນເວລາທີ່ເໝາະສົມ.ຈີນຈະ ຮ່ວມກັບປະເທດຕ່າງໆ ເພີ່ມທະວີການສະໜັບສະໜູນຕໍ່ອົງການສາກົນ ແລະພາກພື້ນທີ່ກ່ຽວ ຂ້ອງ.
ທ່ານສີຈິ້ນຜິງຊີ້ໃຫ້ເຫັນວ່າ: ຈີນຈະເພີ່ມຄວາມແຮງໃນການສະໜອງຢາທີ່ເປັນວັດຖຸດິບ ເຄື່ອງໃຊ້ປະຈໍາວັນ ອຸປະກອນຕ້ານພະຍາດ ແລະຜະລິດຕະພັນອື່ນໆໃຫ້ຕະຫຼາດສາກົນ. ສືບຕໍ່ປະຕິບັດນະໂຍບາຍການເງິນທີ່ຕັ້ງໜ້າ ແລະນະໂຍບາຍເງິນຕາທີ່ໜັກແໜ້ນ, ຂະຫຍາຍການປະຕິຮູບ ແລະເປີດປະຕູສູ່ພາຍນອກຢ່າງເດັດດ່ຽວໜຽວແໜ້ນ, ຜ່ອນຄາຍການອະນຸມັດເຂົ້າຕະຫຼາດ, ສືບຕໍ່ປັບປຸງສະພາບແວດລ້ອມການທຸລະກິດໃຫ້ດີຂຶ້ນ, ເປີດກວ້າງການນໍາເຂົ້າ ແລະການລົງທຶນຕໍ່ພາຍນອກຢ່າງຕັ້ງໜ້າ, ປະກອບສ່ວນເຂົ້າໃນການຮັກສາຄວາມໝັ້ນຄົງຂອງເສດຖະກິດໂລກ.
ທ່ານສີຈິ້ນຜິງກ່າວເນັ້ນວ່າ, ພະຍາດໃນຄັ້ງນີ້ໄດ້ກະທົບຕໍ່ການຜະລິດແລະຄວາມຕ້ອງການ ຂອງທົ່ວໂລກຢ່າງຮອບດ້ານ, ປະເທດຕ່າງໆຄວນຮ່ວມມືກັນເພີ່ມທະວີການຄວບຄຸມດ້ານນະໂຍບາຍມະຫາພາກ, ປ້ອງກັນບໍ່ໃຫ້ເສດຖະກິດໂລກຊຸດໂຊມລົງ. ຕ້ອງປະຕິບັດນະໂຍບາຍການເງິນ ແລະເງິນຕາທີ່ແຂງແຮງແລະບັງເກີດຜົນ, ເພີ່ມທະວີການຕິດຕາມຄວບຄຸມແລະສານສົມທົບທາງດ້ານການທະນາຄານ, ຮ່ວມກັນປົກປັກຮັກສາຄວາມໝັ້ນຄົງຂອງຕ່ອງໂສ້ການສະໜອງຜະລິດຕະພັນຂອງທົ່ວໂລກ.
ທ່ານສີຈິ້ນຜີງຮຽກຮ້ອງໃຫ້ບັນດາປະເທດສະມາຊິກຂອງ G20 ຈົ່ງປະຕິບັດຕາມມາດຕະການ ພ້ອມກັນ, ຫຼຸດພາສີໃຫ້ໜ້ອຍລົງ, ຍຸບເລີກກຳແພງການຄ້າ, ເຮັດໃຫ້ການຄ້າມີຄວາມ ສະດວກ, ສົ່ງສັນຍານຢ່າງແຂງແຮງອອກມາ ເພື່ອເພີ່ມກຳລັງໃຈໃຫ້ແກ່ການຟື້ນຟູເສດຖະກິດຂອງໂລກ.