ສັງເກດການຂອງວາລະສານຈຳປາ丨ພູຜາ ແລະ ແມ່ນໍ້າຕິດຈອດກັນ ຊ່ວຍເຫຼືອເຊິ່ງກັນແລະກັນ
ພູຜາ ແລະ ແມ່ນໍ້າຕິດຈອດກັນ ຊ່ວຍເຫຼືອເຊິ່ງກັນແລະກັນ
--ເນື່ອງໃນໂອກາດໜ່ວຍຊ່ຽວຊານແພດໝໍຈີນເດີນທາງໄປຮອດນະຄອນຫຼວງວຽງຈັນ
(ໂດຍ ທ່ານຈ່ຽງຈ້າຍຕົ່ງ
ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງສປ ຈີນປະຈຳ ສປປ ລາວ)
ໂດຍປະຕິບັດຕາມເນື້ອໃນຈິດໃຈທິດຊີ້ນຳທີ່ສຳຄັນຂອງທ່ານສີຈິ້ນຜິງ ເລຂາທິ ການໃຫຍ່ຄະນະກຳມະການສູນກາງພັກກອມມູນິດຈີນ,ປະທານປະເທດຈີນ, ວັນທີ 29 ມີນານີ້, ໜ່ວຍຊ່ຽວຊານແພດໝໍຕ້ານພະຍາດອອັກເສບປອດເຊື້ອໂຄວິດ-19 ຂອງຈີນປະກອບດ້ວຍ 11 ທ່ານໄດ້ນຳເອົາເຄື່ອງມືອຸປະກອນປິ່ນປົວທີ່ມີມູນຄ່າ 4,17 ລ້ານຢວນເດີນທາງໄປຮອດນະຄອນຫຼວງວຽງຈັນຈາກແຂວງຢຸນນານຂອງຈີນ. ເຊິ່ງຫ່າງຈາກເວລາທີ່ລັດຖະບານລາວປະກາດຜູ້ຖືກບົ່ງມະຕິເປັນພະຍາດ ໂຄວິດ-19ກໍລະນີທຳອິດ ແລະ ໄດ້ຮ້ອງຂໍການຊ່ວຍເຫຼືອຈາກຈີນບໍ່ເຖິງ 5 ວັນ, ຈີນໄດ້ສ້າງສະຖິຕິໃໝ່ໃນດ້ານ “ຄວາມໄວແບບຈີນ” , ເຊິ່ງເປັນການຈັດຕັ້ງປະຕິ ບັດຕາມຄຳຮຽກຮ້ອງຂອງທ່ານສີຈິ້ນຜິງທີ່ວ່າ: “ເຮັດວຽກແຂ່ງກັບເວລາເພື່ອຕ້ານກັບພະຍາດ”ຢ່າງແທ້ຈິງ, ທັງໄດ້ສະແດງໃຫ້ເຫັນເຖິງຈິດໃຈປະຊາຄົມຮ່ວມຊາຕາກຳທີ່ “ເອົາໃຈໃສ່ຍາດຕິພີ່ນ້ອງ ແລະ ປົກປ້ອງເພື່ອນບ້ານໃກ້ເຮືອນ ຄຽງຢ່າງທັນການ”ນັ້ນຢ່າງເຕັມສ່ວນ.
ຄວາມຮັກແພງແທ້ຈິງຈະສະແດງໃຫ້ເຫັນໃນທ່າມກາງຄວາມຫຍຸ້ງຍາກ. ພວກເຮົາຈະບໍ່ຫລົງລືມວ່າ: ໃນເວລາທີ່ຈີນເກີດການແຜ່ລະບາດຂອງພະຍາດ ໂຄວິດ-19, ທ່ານເລຂາທິການໃຫຍ່ ບຸນຍັງ ວໍລະຈິດໄດ້ສົ່ງສານສະແດງຄວາມເຫັນໃຈ ມາເຖິງທ່ານເລຂາທິການໃຫຍ່ສີຈິ້ນຜິງໃນທັນທີ, ທ່ານນາຍົກລັດຖະມົນຕີ ທອງລຸນ ສີສຸລິດ ກໍໄດ້ສົ່ງສານສະແດງຄວາມເຫັນໃຈມາເຖິງທ່ານນາຍົກລັດຖະ ມົນຕີ ຫຼີເຄີ້ສຽງ, ໂດຍໄດ້ຕີລາຄາສູງຕໍ່ຈີນທີ່ສາມາດປ້ອງກັນ ແລະ ຄວບຄຸມພະຍາດໂຄວິດ-19 ໄດ້ຢ່າງຮອບດ້ານ ແລະ ທັນການ, ໄດ້ປົກປ້ອງຄວາມປອດໄພດ້ານຊີວິດຂອງປະຊາຊົນຈີນ, ທັງໄດ້ປົກປ້ອງຄວາມປອດໄພດ້ານຊີວິດຂອງປະຊາຊົນທົ່ວໂລກອີກດ້ວຍ; ໃນສານດັ່ງກ່າວຍັງຢືນຢັນວ່າ: ປະຊາຊົນລາວຍິນດີຮ່ວມກັບປະຊາຊົນຈີນອ້າຍນ້ອງ, ສະໜັບສະໜູນເຊິ່ງກັນແລະກັນ ແລະຮ່ວມກັນຜ່ານຜ່າຄວາມຫຍຸ້ງຍາກ; ເຊື່ອໝັ້ນວ່າ: ພາຍໃຕ້ການນຳພາທີ່ເຂັ້ມແຂງຂອງພັກກອມມູນິດຈີນ ແລະ ລັດຖະບານຈີນ, ປະຊາຊົນຈີນຈະສາມາດເອົາຊະນະພະຍາດຄັ້ງນີ້ໄດ້ຢ່າງແນ່ນອນ, ແລະ ສາມາດສູ້ຊົນເພື່ອບັນລຸເປົ້າໝາຍໃນເຫດການສຳຄັນຮ້ອຍປີອັນທີໜຶ່ງຕາມເວລາກຳນົດ.
ຄວາມຮັກແພງແທ້ຈິງຈະສະແດງໃຫ້ເຫັນໃນທ່າມກາງຟ້າຝົນລົມແດງ. ພວກເຮົາຈະບໍ່ຫຼົງລືມວ່າ: ໃນເວລາທີ່ຈີນຕ້ານກັບການແຜ່ລະບາດຂອງພະຍາດຢ່າງລຳບາກທີ່ສຸດ, ເຖິງວ່າປະເທດລາວເປັນປະເທດດ້ອຍພັດທະນາທີ່ມີປະຊາກອນບໍ່ເຖິງ 7 ລ້ານຄົນ ແລະ ມີຍອດມູນຄ່າເສດຖະກິດບໍ່ເຖິງ 20 ຕື້ໂດລາສະຫະລັດກໍຕາມ, ແຕ່ລາວກໍໄດ້ຊ່ວຍເຫລືອເງິນສົດ 7 ແສນໂດລາສະຫະລັດ ແລະ ວັດຖຸອຸປະກອນປ້ອງກັນພະຍາດຫຼາຍງວດ, ເຊິ່ງເປັນການສະແດງອອກເຖິງ ຄວາມຈິງໃຈຢ່າງສຸດຄວາມສາມາດ. ໃນກິດຈະກຳການກຸສົນທີ່ຈັດຂຶ້ນຢູ່ນະຄອນ ຫຼວງວຽງຈັນ, ຜູ້ຕາງໜ້າວົງການຕ່າງໆຂອງສັງຄົມລາວ ແລະຊາວຈີນຕ່າງດ້າວຢູ່ລາວໄດ້ພ້ອມພຽງຮຽງໜ້າກັນຮ້ອງປະສານສຽງດັງໆວ່າ: “ຈີນສູ້ໆ! ອູຮັ້ນສູ້ໆ!” ນັກຮ້ອງ ແລະ ດາລາຊາວໜຸ່ມລາວໄດ້ຮ້ອງເພງ “ຄວາມຮັກເອົາຊະນະ ທຸກຢ່າງ”, ເຊິ່ງເພງນີ້ໄດ້ຄອງອັນດັບໜຶ່ງໃນບັນຊີລາຍຊື່ເພງຕ້ານພະຍາດທີ່ມີຜູ້ຟັງຫຼາຍທີ່ສຸດ. ຜູ້ໃຊ້ອິນເຕີເນັດຂອງຈີນພາກັນມີຄວາມເຫັນວ່າ: “ຫຼັງຈາກການແຜ່ລະບາດຂອງພະຍາດສິ້ນສຸດລົງແລ້ວຈະພາກັນເດີນທາງໄປເບິ່ງປະເທດລາວທີ່ສວຍງາມ ແລະ ສຳພັດກັບຈິດໃຈທີ່ມີຄວາມເມດຕາກະລຸນາແບບນີ້ຢ່າງແນ່ນອນ.”
ຄວາມຮັກແພງແທ້ຈິງຈະທົນຕໍ່ການທົດສອບຂອງການເວລາ. ພວກຂ້າພະ ເຈົ້າຈະບໍ່ຫລົງລືມວ່າ: ພຽງແຕ່ເວລາ 10 ກວ່າມື້, ລາວກໍຕອບສະໜອງຂໍ້ລິ ເລີ່ມ ຂອງຈີນຢ່າງຕັ້ງໜ້າ ເຊິ່ງໄດ້ພະຍາຍາມສຸດຂີດ ເພື່ອກະກຽມ ແລະໄດ້ຈັດ ກອງປະຊຸມລັດຖະມົນຕີກະຊວງການຕ່າງະເທດສະໄໝພິເສດ ກ່ຽວກັບບັນຫາ ພະຍາດ ໂຄວິດ-19 ຈີນ-ອາຊຽນ ແລະກອງປະຊຸມລັດຖະມົນຕີກະຊວງການ ຕ່າງປະເທດກ່ຽວກັບການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຢ່າງສຳເລັດຜົນ ເຊິ່ງເປັນການສົ່ງສັນຍານທີ່ເຂັ້ມແຂງທີ່ສຸດທີ່ໃຫ້ປະເທດຕ່າງໆໃນພາກພື້ນຈົ່ງ ຮ່ວມມືກັນຕ້ານພະຍາດ, ທັງໄດ້ສະແດງໃຫ້ເຫັນເຖິງຄວາມຕື່ນຕົວ ແລະຄວາມ ຮັບຜິດຊອບຂອງລາວທີ່ພະຍາຍາມຊຸກຍູ້ການຮ່ວມມືໃນພາກພື້ນ. ຄວາມຮັບຜິດ ຊອບແບບນີ້ແມ່ນໄດ້ປະຕິບັດຕາມທັດສະນະປະຊາຄົມຮ່ວມຊາຕາກຳປະເທດແມ່ນ້ຳລ້ານຊ້າງ-ແມ່ນ້ຳຂອງ, ໄດ້ສ້າງແບບຢ່າງໃຫ້ປະເທດຕ່າງໆ ໃນພາກພື້ນໃນການລົງເລິກການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ, ສ້າງຄວາມຜາສຸກ ໃຫ້ກັບປະຊາຊົນ.
ຄວາມສາມັກຄີສາມາດຂຸດພູຖົມທະເລໄດ້. ອັນທີ່ເຮັດໃຫ້ພວກຂ້າພະເຈົ້າຕື່ນ ເຕັ້ນດີໃຈທີ່ສຸດກໍຄື: ພາຍໃຕ້ການນຳພາ ທີ່ເຂັ້ມແຂງຂອງສູນກາງພັກກອມມູນິດ ຈີນທີ່ມີທ່ານເລຂາທິການໃຫຍ່ສີຈິ້ນຜິງເປັນແກນນຳ, ໂດຍຜ່ານຄວາມພະຍາ ຍາມທີ່ລຳບາກຂອງປະຊາຊົນທົ່ວປະເທດຈີນ, ການປ້ອງກັນແລະຄວບຄຸມພະ ຍາດຂອງຈີນໄດ້ຮັບປະສິດທິຜົນສຳຄັນເປັນຂັ້ນຕອນແລ້ວ, ເສດຖະກິດສັງຄົມ ໄດ້ຮັບການຟື້ນຟູຄືນໃໝ່ຢ່າງເປັນລະບຽບຮຽບຮ້ອຍໂດຍໄວ. ແຕ່ອັນທີ່ເຮັດໃຫ້ ພວກຂ້າພະເຈົ້າເສົ້າໃຈກໍຄື:ເຊື້ອພະຍາດຢູ່ຕ່າງປະເທດໄດ້ແຜ່ລະບາດຢ່າງວ່ອງ ໄວ, ຜູ້ຖືກບົ່ງມະຕິໃນຫຼາຍປະເທດເພີ່ມຂຶ້ນຢ່າງຕໍ່ເນື່ອງ, ຜູ້ຖືກບົ່ງມະຕິຢູ່ປະ ເທດລາວກໍເພີ່ມຂຶ້ນເຊັ່ນກັນ,ຄວາມກົດດັນໃນການປ້ອງກັນແລະຄວບຄຸມພະຍາດສືບຕໍ່ເພີ່ມຂຶ້ນ. ປະຊາຊົນຈີນເອົາໃຈໃສ່ຕໍ່ໝູ່ເພື່ອນທີ່ດີທີ່ຮ່ວມທຸກຮ່ວມສຸກດ້ວຍກັນ, ຮູ້ບຸນຄຸນແລະຕອບແທນບຸນຄຸນ,ໃນຖານະເປັນຄູ່ຮ່ວມຊາຕາກຳ, ເມື່ອປະເທດ ລາວໄດ້ຮັບຜົນກະທົບຈາກພະຍາດດັ່ງກ່າວ,ພວກຂ້າພະເຈົ້າກໍຮູ້ສຶກເສົ້າໃຈເຊັ່ນ ກັນ, ພວກຂ້າພະເຈົ້າຈະຮ່ວມແຮງຮ່ວມໃຈກັນກັບປະຊາຊົນລາວ, ພ້ອມກັນ ຜ່ານຜ່າຄວາມຫຍຸ້ງຍາກຄັ້ງນີ້.
ພວກຂ້າພະເຈົ້າຈະສະແດງໃຫ້ເຫັນເຖິງຈິດໃຈຄູ່ຮ່ວມຊາຕາກຳຈີນລາວໃນ ການຮ່ວມແຮງຮ່ວມໃຈກັນຕ້ານພະຍາດ.ກ່ອນທີ່ໜ່ວຍຊ່ຽງຊານການແພດຈີນ ເດີນທາງມາຮອດປະເທດລາວ, ລັດຖະບານຈີນໄດ້ໃຫ້ການຊ່ວຍເຫຼືອລາວ ເຊັ່ນ: ຊຸດປ້ອງກັນພະຍາດ 5000 ຊຸດ, ຜ້າປິດປາກ N95 ຈຳນວນ 5000 ອັນ, ຜ້າປິດປາກການແພດທຳມະດາ 4 ແສນອັນ ແລະ ນ້ຳຢາກວດຫາເຊື້ອພະຍາດ ຈຳນວນໜຶ່ງ, ຢາກວດນິວຄະເລອິກເຊື້ອໄວຣັດ 20,000 ອັນຈາກມູນນິທິແຈກມາໄດ້ສົ່ງໄປຮອດປະເທດລາວແລ້ວ, ອົງການປົກຄອງແຂວງຢຸນນານ, ແຂວງຫູ ນານ ແລະແຫ່ງຕ່າງໆ ພ້ອມດ້ວຍສະມາຄົມພັດທະນາເສດຖະກິດອາຊີຂອງຈີນ, ສະມາຄົມນັກທຸລະກິດຈີນແລະຕ່າງປະເທດ ແລະອົງການຈັດຕັ້ງທາງສັງຄົມ ຕ່າງໆກໍໄດ້ບໍລິຈາກເງິນແລະອຸປະກອນໃຫ້ປະເທດລາວ. ມື້ນີ້ ໜ່ວຍຊ່ຽວຊານການແພດຂອງຈີນບໍ່ພຽງແຕ່ໄດ້ສົ່ງອຸປະກອນປິ່ນປົວມາໃຫ້ລາວເທົ່ານັ້ນ, ຍັງໄດ້ ນຳເອົາກຳລັງແລະປະສົບການຕ້ານພະຍາດຂອງຈີນມານຳອີກ. ຕໍ່ໄປພາຍໜ້າ, ພວກຂ້າພະເຈົ້າຈະສືບຕໍ່ເຮັດວຽກປ້ອງກັນ ແລະ ຄວບຄຸມພະຍາດພາຍ ໃນປະເທດຈີນໃຫ້ດີ ແລະຈະໃຫ້ການຊ່ວຍເຫຼືອໃນ ການປ້ອງກັນແລະຄວບຄຸມ ພະຍາດຢູ່ປະເທດລາວຕາມຄວາມສາມາດຂອງຕົນຕື່ມອີກ.ພວກຂ້າພະເຈົ້າເຊື່ອໝັ້ນວ່າ: ໂດຍຜ່ານການຮ່ວມກັນຕ້ານກັບພະຍາດຄັ້ງນີ້, ຄູ່ຮ່ວມຊາຕາກຳຈີນ-ລາວ ຈະແໜ້ນແຟ້ນ ແລະ ໝັ້ນໜຽວກວ່າເກົ່າ.
ພວກເຮົາຈະສ່ອງແສງໃຫ້ເຫັນເຖິງທ່າແຮງຂອງລະບອບສັງຄົມນິຍົມໃນການແລກປ່ຽນເພື່ອປ້ອງກັນແລະຄວບຄຸມພະຍາດ. ໃນບັ້ນຮົບທົ່ວປວງຊົນໃນການ ປ້ອງກັນແລະຄວບຄຸມພະຍາດຄັ້ງນີ້, ທ່ານສີຈິ້ນຜິງໄດ້ວາງແຜນການແລະບັນຊາການດ້ວຍຕົນເອງຢ່າງທຸ່ນທ່ຽງ, ສູນກາງພັກກອມມູນິດຈີນໄດ້ໂຮມສູນເປັນເອກະພາບກັນຊີ້ນຳນຳພາການຮ່ວມກັນປ້ອງກັນແລະຄວບຄຸມພະຍາດໃນທົ່ວປະເທດ, ການຈັດຕັ້ງພັກທຸກຂັ້ນໄດ້ເສີມຂະຫຍາຍບົດບາດປ້ອມສູ້ຮົບຢ່າງເຕັມສ່ວນ, ປະຊາຊົນທົ່ວປະເທດຮ່ວມຈິດຮ່ວມໃຈກັນເຕົ້າໂຮມຄວາມສາມັກຄີເປັນກຳລັງແຮງສັງລວມຢ່າງໃຫຍ່ຫຼວງ, ພຶດຕິກຳທີ່ມີຊີວິຊີວາເຫຼົ່ານີ້ໄດ້ເປັນທີ່ຍອມຮັບແລະ ໄດ້ ຮັບການຍ້ອງຍໍຊົມເຊີຍຢ່າງສູງຈາກຝ່າຍລາວ. ຈີນແລະລາວລ້ວນແຕ່ຍຶດໝັ້ນໃນການນຳພາຂອງພັກແລະລະບອບສັງຄົມນິຍົມ, ມີອຸດົມການທີ່ຄືກັນ, ລະບອບສັງຄົມແລະເສັ້ນທາງພັດທະນາທີ່ຄ້າຍຄືກັນ. ພາຍໃຕ້ການນຳພາຂອງສູນກາງພັກປະຊາຊົນປະຕິວັດລາວທີ່ນຳໂດຍທ່ານເລຂາທິການໃຫຍ່ ບຸນຍັງ ວໍລະຈິດ, ປະຊາຊົນລາວໄດ້ເປີດບັ້ນປ້ອງກັນແລະຄວບຄຸມພະຍາດແລ້ວ. ພວກເຮົາເຊື່ອໝັ້ນວ່າ: ສອງພັກຈີນ-ລາວຈະສະແດງໃຫ້ເຫັນທັດສະນະກຳອຳນາດທີ່ຖືປະຊາຊົນເປັນຕົ້ນຕໍໂດຍຜ່ານຈາກການເຂົ້າຮ່ວມ ບັ້ນຮົບຄັ້ງນີ້ ແລະສ່ອງແສງໃຫ້ເຫັນເຖິງທ່າແຮງອັນໃຫຍ່ຫຼວງຂອງລະບອບສັງຄົມນິຍົມຢ່າງເຕັມສ່ວນ.
ພວກເຮົາຈະຊຸກຍູ້ການຮ່ວມມືສອງຝ່າຍຢ່າງໜັກແໜ້ນໃນຂະນະທີ່ເພີ່ມທະວີການປ້ອງກັນແລະຄວບຄຸມພະຍາດ. ໂຄງການທາງລົດໄຟຈີນ-ລາວໄດ້ສຳເລັດການກໍ່ສ້າງໄປແລ້ວປະມານ 90% ທັງໄດ້ປູເຫຼັກລາງລົດໄຟທີ່ມີຄວາມຍາວເຖິງ 500 ແມັດເສັ້ນທຳອິດຢ່າງສຳເລັດຜົນໃນສອງມື້ກ່ອນໜ້ານີ້ ແລະໄດ້ເຂົ້າສູ່ໄລຍະໃໝ່ແຫ່ງການປູລາງຕະຫຼອດສາຍ. ການກໍ່ສ້າງທາງດ່ວນວຽງຈັນ-ວັງວຽງໄດ້ສຳເລັດແລ້ວກາຍເຄິ່ງ, ເຂດພັດທະນາກວມລວມໄຊເສດຖາຄາດວ່າຈະສາມາດບັນລຸການກໍສ້າງທີ່ມີມູນຄ່າການຜະລິດ 1，8 ຕື້ໂດລາສະຫະລັດໃນທ້າຍປີ 2020 ນີ້, ເຂດການຮ່ວມມືເສດຖະກິດບໍ່ຫານ-ບໍ່ເຕັນຈີນ-ລາວໄດ້ສ້າງຕຳແໜ່ງວຽກເຮັດງານທຳ 5000 ຕຳແໜ່ງ. ພວກເຮົາເຊື່ອໝັ້ນວ່າ: ພາຍໃຕ້ການຊີ້ນຳນຳພາຈາກແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳຈີນ-ລາວ, ພວກເຮົາຍ່ອມຈະສາມາດຜ່ານຜ່າຜົນກະທົບຈາກການແຜ່ລະບາດຂອງພະຍາດຄັ້ງນີ້ໃຫ້ໄດ້ແນ່ນອນ, ຟ້າຫຼັງຝົນຍ່ອມຈະປອດໂປ່ງສົດໃສກວ່າເກົ່າ ເຊິ່ງເປັນສັນຍານບົ່ມບອກວ່າ: ສອງປະເທດຈີນ-ລາວຈະມີການພັດທະນາໃໝ່ໃຫຍ່ຫຼວງກວ່າເກົ່າ.
ເມື່ອກ່າວເຖິງການຈັດຕັ້ງປະຕິບັດແຜນແມ່ບົດດັ່ງກ່າວໃຫ້ເປັນຮູບປະທຳ, ຂ້າພະເຈົ້າຢາກຊີ້ໃຫ້ເຫັນເປັນພິເສດວ່າ: ຢູນນານເປັນແຂວງພຽງໜຶ່ງດຽວຂອງຈີນທີ່ມີຊາຍແດນຕິດກັບລາວ ແລະໄດ້ກ້າວເດີນໄປຢືນຢູ່ແຖວໜ້າໃນການກໍ່ສ້າງຄູ່ຮ່ວມຊາຕາກຳຈີນ-ລາວຢ່າງສະເໝີຕົ້ນສະເໝີປາຍ. ມູນຄ່າການຄ້າລະຫວ່າງແຂວງຢູນນານ-ລາວໃນປີ 2019 ໄດ້ບັນລຸເຖິງ 1,2 ຕື້ໂດລາສະຫະລັດ, ເພີ່ມຂຶ້ນ 18% ເມື່ອທຽບໃສ່ປີ 2018. ໃນໂຄງການຮ່ວມມືສຳຄັນດັ່ງກ່າວ, ຢູນນານໄດ້ມີສ່ວນຮ່ວມໃນການກໍ່ສ້າງທາງລົດໄຟຈີນ-ລາວ, ເຫຼືອນັ້ນແມ່ນແຂວງຢູນນານເປັນຜູ້ປະຕິບັດພຽງຝ່າຍດຽວ. ຢູນນານໄດ້ປະຕິບັດໂຄງການ “ແສງສະຫວ່າງ” ຢູ່ລາວເປັນເວລາ 4 ປີລຽນຕິດ ເຊິ່ງສາມາດຊ່ວຍຜ່າຕັດໃຫ້ຜູ້ເປັນພະຍາດແກ່ນຕາຂຸ້ນຫຼາຍຮ້ອຍຄົນສາມາດເບິ່ງເຫັນຄືນໃໝ່. ແຂວງຢູນນານເປັນກຳລັງຫຼັກແຫຼ່ງຂອງການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ໂດຍໄດ້ປະກອບສ່ວນອັນພົ້ນເດັ່ນໃນການກໍ່ສ້າງປະຊາຄົມຮ່ວມຊາຕາກຳແມ່ນ້ຳລ້ານຊ້າງ-ແມ່ນ້ຳຂອງ.
ທາດແທ້ຂອງວິລະຊົນອັນແທ້ຈິງຈະສະແດງໃຫ້ເຫັນໃນເວລາພົບພໍ້ຄວາມຫຍຸ້ງຍາກລຳບາກ. ເທື່ອນີ້ ຄະນະພັກແລະອົງການປົກຄອງແຂວງຢູນນານໄດ້ເປັນເຈົ້າການຈັດຕັ້ງປະຕິບັດຕາມເນື້ອໃນຈິດໃຈຂອງທິດຊີ້ນຳອັນສຳຄັນຂອງທ່ານສີຈິ້ນຜິງ, ພາຍຫຼັງຈີນແຈ້ງໃຫ້ຝ່າຍລາວຊາບກ່ຽວກັບຈີນຈະແຕ່ງຕັ້ງໜ່ວຍຊ່ຽວຊານການ ແພດໄປລາວພຽງແຕ່ສອງມື້, ກໍໄດ້ຈັດຕັ້ງໜ່ວຍງານ, ຫ້າງຫາເຄື່ອງມືອຸປະກອນທີ່ກ່ຽວຂ້ອງເດີນທາງໄປນະຄອນຫຼວງວຽງຈັນຢ່າງຮີບດ່ວນ. ໂດຍເຮັດໃຫ້ພວກເຮົາເຊື່ອໝັ້ນວ່າ: ພະຍາດເຖິງຈະຮ້າຍແຮງປານໃດ, ແຕ່ຄວາມຮັກແພງຈະເອົາຊະນະໄດ້, ການທີ່ມີພູຜາສາຍນ້ຳຕິດຈອດກັນ, ຕ່າງຊ່ວຍຊູ້ຍູ້ໜູນ ເປັນພຶດຕິກຳຕົວຈິງທີ່ສ່ອງແສງໃຫ້ເຫັນເຖິງຄູ່ຮ່ວມຊາຕາກຳຈີນລາວຢ່າງແທ້ຈິງ, ຈີນ-ລາວຈະມີອະນາຄົດທີ່ສົດໃສກວ່າເກົ່າ.