ວັນທີ 1 ເມສານີ້, ອົງການອະນາໄມໂລກຫຼືWHOໄດ້ຈັດພິທີຖະແຫຼງຂ່າວກ່ຽວກັບພະຍາດCOVID-19ຢູ່ເຊີແນວ ປະເທດສວິສ. ເຈົ້າໜ້າທີ່ອົງການອະນາໄມໂລກໄດ້ຕອບໂຕ້ກໍລະນີທີ່ມີບາງສື່ມວນຊົນກ່າວຫາຢ່າງໄຮ້ເຫດຜົນວ່າ ຂໍ້ມູນຂ່າວສານທີ່ຈີນເປີດເຜີຍນັ້ນບໍ່ມີຄວາມໂປ່ງໃສ.
ທ່ານໄມ ໄຣອັນ ຜູ້ຮັບຜິດຊອບໂຄງການສຸກເສີນດ້ານສາທາລະນະສຸກຂອງອົງການອະນາໄມໂລກກ່າວວ່າ: ຂໍ້ມູນຕ່າງໆທີ່ບັນດາປະເທດໄດ້ຍື່ນລາຍງານຕໍ່ອົງການຕົນໃນແຕ່ລະມື້ລ້ວນແຕ່ມີຫຼັກຖານທີ່ດີແລະຖືກຕ້ອງຕາມຫຼັກວິທະຍາສາດເປັນຈຳນວນຫຼວງຫຼາຍ. ພວກເຮົາຕ້ອງມີຄວາມລະມັດລະວັງທີ່ສຸດ, ບໍ່ຄວນຈັດເອົາບາງປະເທດໃນໂລກວ່າເປັນປະເທດທີ່ບໍ່ໃຫ້ການຮ່ວມມືຫຼືບໍ່ມີຄວາມໂປ່ງໃສ. ອົງການອະນາໄມໂລກຈະຮ່ວມມືກັບທຸກປະເທດເພື່ອຮັບເອົາຂໍ້ມູນທີ່ດີທີ່ສຸດຈົນສຸດຄວາມສາມາດ. ແຕ່ໃນຂະນະດຽວກັນ, ພວກເຮົາກໍຕ້ອງຮັບຮູ້ວ່າ: ພາຍໃຕ້ສະພາບກົດດັນ, ມັນຍາກທີ່ຈະແບ່ງປັນທຸກໆຂໍ້ມູນຂ່າວສານໃຫ້ທັນການໄດ້ໃນທຸກໆນາທີ. ປັດຈຸບັນ, ອົງການອະນາໄມໂລກໄດ້ຮັບຂໍ້ມູນຂ່າວສານຈາກບັນດາປະເທດກ່ຽວກັບຜົນການຄົ້ນຄວ້າການແຜ່ກະຈາຍຂອງເຊື້ອພະຍາດ, ເຊິ່ງໃນນີ້ ເຢຍລະມັນໄດ້ມອບໃຫ້ສະບັບໜຶ່ງ, ສິງກະໂປ ສະບັບໜຶ່ງ, ອາເມຣິກາສະບັບໜຶ່ງແລະຈີນ ມີ 4 ສະບັບ. ຂໍຂອບໃຈນຳປະເທດເຫຼົ່ານີ້ທີ່ໄດ້ແບ່ງປັນຂໍ້ມູນໃນໄລຍະເບື້ອງຕົ້ນກ່ຽວກັບການແຜ່ກະຈາຍຂອງເຊື້ອພະຍາດ. ພວກເຮົາກໍເຂົ້າໃຈວ່າ ປະເທດຈຳນວນໜຶ່ງກຳລັງຢູ່ໃນໄລຍະຕໍ່ສູ້ເພື່ອປ້ອງກັນຊີວິດປະຊາຊົນ,ປັດຈຸບັນນີ້, ເຂົາເຈົ້າ ກໍອາດເປັນໄປໄດ້ວ່າຍັງບໍ່ສາມາດເກັບກຳຂໍ້ມູນໃນລັກສະນະນີ້ໄດ້ເທື່ອ.