ທ່ານສີຈິ້ນຜິງກ່າວເຖິງ“ການຫັນເປັນທັນສະໄໝກ່ຽວກັບຄວາມສາມາດໃນການຄຸ້ມຄອງ”ຫຼາຍເທື່ອໃນເວລາສຳຫຼວດກວດເບິ່ງຢູ່ແຂວງເຈີ້ຈ່ຽງ
ວັນທີ 31 ມີນາຜ່ານມານີ້, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນໄດ້ເດີນທາງໄປສວນສາທາລະນະດິນທາມແຫ່ງຊາດຊີ່ຊີ່ຮາງໂຈ່ວ, ສູນບັນຊາການການປະຕິບັດງານລະບົບຄຸ້ມຄອງຕົວເມືອງຫຼື City Brain ເພື່ອສຳຫຼວດຄົ້ນຄວ້າສະພາບການອະນຸລັກແລະນຳໃຊ້ດິນທາມຊີ່ຊີ່ ກໍຄືການຊຸກຍູ້ໃຫ້ ນະຄອນຫາງໂຈ່ວ ຫັນເປັນທັນສະໄໝ ລະບົບຄຸ້ມຄອງຕົວເມືອງແລະຄວາມສາມາດໃນການຄຸ້ມຄອງຕົວເມືອງ.
ສວນສາທາລະນະດິນທາມແຫ່ງຊາດຊີ່ຊີ່ເປັນສວນສາທາລະນະດິນທາມແຫ່ງຊາດແຫ່ງທຳອິດຂອງຈີນ, ເຊິ່ງມີຊັບພະຍາກອນທາງນິເວດທີ່ອຸດົມສົມບູນ,ມີທິວທັດທຳມະຊາດທີ່ສວຍສົດງົດງາມແລະງຽບສະຫງົບດີ. ໃນເວລາສຳຫຼວດກວດເບິ່ງເມື່ອວັນທີ 31 ມີນາຜ່ານມາ, ທ່ານສີຈິ້ນຜິງກ່າວວ່າ: ດິນທາມຄື “ໝາກໄຂ່ຫຼັງ”ຂອງໜ່ວຍໂລກ, ການພັດທະນາດິນທາມຕ້ອງຖືວຽກການອະນຸລັກສິ່ງແວດລ້ອມທຳມະຊາດເປັນສຳຄັນ. ຄວາມບໍລິສຸດຂອງທຳມະຊາດເປັນທ່າແຮງຂອງການທ່ອງທ່ຽວ, ການພັດທະນາການທ່ອງທ່ຽວບໍ່ຄວນທຳລາຍສິ່ງແວດລ້ອມ, ຕ້ອງເຮັດໃຫ້ສວນສາທາລະນະດິນທາມກາຍເປັນພື້ນທີ່ສີຂຽວທີ່ປະຊາຊົນໄດ້ຊົມໃຊ້ຮ່ວມກັນ.
ທ່ານສີຈິ້ນຜິງໄດ້ເດີນທາງໄປເຖິງສູນບັນຊາການລະບົບຄຸ້ມຄອງຕົວເມືອງຂອງຮາງໂຈ່ວ ໂດຍໄດ້ຊົມສະພາບການກໍ່ສ້າງ “ຮາງໂຈ່ວດີຈີຕອນ”, ຮັບຮູ້ສະພາບທີ່ຮາງໂຈ່ວໄດ້ໝູນໃຊ້ວິທີຕ່າງໆເຊັ່ນ APP ສຸຂະພາບ, ການບໍລິການທາງອິນເຕີເນັດເປັນຕົ້ນເພື່ອຊຸກຍູ້ການປ້ອງກັນແລະຄວບຄຸມພະຍາດກໍຄືການຟື້ນຟູການເຮັດວຽກແລະການຜະລິດຄືນໃໝ່. ທ່ານສີຈິ້ນຜິງກ່າວວ່າ: ລະບົບຄຸ້ມຄອງຕົວເມືອງຫຼືCity Brain ເປັນມາດຕະການສຳຄັນໃນການກໍ່ສ້າງ “ຮາງໂຈ່ວດິຈີຕອນ”. ຜ່ານຈາກ ຖານຂໍ້ມູນໃຫຍ່, ລະບົບຄັງຂໍ້ມູນ, ປັນຍາປະດິດແລະວິທີອື່ນໆເພື່ອຊຸກຍູ້ການຫັນການຄຸ້ມຄອງຕົວເມືອງໃຫ້ເປັນທັນສະໄໝ, ຕົວເມືອງໃຫຍ່ກໍຈະສາມາດຫັນເປັນຕົວເມືອງອິດສະລິຍະຫຼາຍຂຶ້ນກວ່າເກົ່າ.