ທ່ານສີຈິ້ນຜິງກ່າວເນັ້ນວ່າ: ຕ້ອງຊຸກຍູ້ການປະຕິຮູບໃນຂົງເຂດສຳຄັນເພື່ອຊອກຫາວິທີທາງໃຫ້ແກ່ການປະຕິຮູບໃນທົ່ວປະເທດ
ວັນທີ 1 ເມສານີ້, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນກ່າວວ່າ: ຄຽງຄູ່ກັບການແຜ່ລະບາດຂອງເຊື້ອພະຍາດໂຄວິດ-19ຢ່າງວ່ອງໄວຢູ່ຕ່າງປະເທດ, ການເຄື່ອນໄວທາງເສດຖະກິດການຄ້າສາກົນໄດ້ຮັບຜົນກະທົບຢ່າງໜັກໜ່ວງ, ການພັດທະນາເສດຖະກິດຂອງຈີນກໍໄດ້ຜະເຊີນກັບສິ່ງທ້າທາຍໃໝ່, ພ້ອມດຽວກັນນີ້ພັດເປັນໂອກາດໃໝ່ແຫ່ງການເລັ່ງລັດການພັດທະນາຕິກນິກວິທະຍາສາດ, ຊຸກຍູ້ໃຫ້ອຸດສາຫະກຳໄດ້ຮັບການປັບປຸງໃຫ້ຂຶ້ນສູ່ລະດັບໃໝ່. ແຂວງເຈີ້ຈ່ຽງຄວນຊຸກຍູ້ການປະຕິຮູບໃນຂົງເຂດສຳຄັນແລະຂອດສຳຄັນຢ່າງເລິກເຊິ່ງ ເພື່ອຊອກຫາວິທີທາງແລະຖອດຖອນບົດຮຽນໃຫ້ແກ່ການປະຕິຮູບໃນທົ່ວປະເທດ.
ໃນຖານະເປັນແຂວງແນວໜ້າທີ່ຈີນດຳເນີນການປະຕິຮູບແລະເປີດປະຕູສູ່ພາຍ ນອກ, ຍອດປະລິມານດ້ານເສດຖະກິດຂອງແຂວງເຈີ້ຈ່ຽງເປັນອັນດັບ 4 ຂອງທົ່ວປະເທດຈີນ. ແຕ່ວັນທີ 29 ມີນາຜ່ານມາຫາວັນທີ 1 ເມສານີ້, ທ່ານສີຈິ້ນຜິງໄດ້ເດີນທາງໄປນະຄອນນິງປົ່ວ, ນະຄອນຮູໂຈ່ວ ແລະນະຄອນຮາງໂຈ່ວ ເພື່ອສຳຫຼວດກວດເບິ່ງທ່າກຳປັ່ນ, ວິສາຫະກິດ, ຊົນນະບົດ ແລະດິນທາມນິເວດຢູ່ທ້ອງຖິ່ນ. ຕອນເຊົ້າວັນທີ 1 ເມສານີ້, ທ່ານສີຈິ້ນຜິງໄດ້ໃຫ້ທັດສະນະດັ່ງກ່າວຫຼັງຈາກໄດ້ຮັບຟັງການລາຍງານວຽກງານຢູ່ແຂວງເຈີ້ຈ່ຽງ.
ທ່ານກ່າວເນັ້ນວ່າ: ຕ້ອງກຳແໜ້ນແລະສ້າງໂອກາດທ່າມກາງຄວາມຫຍຸ້ງຍາກໃນປັດຈຸບັນ, ໃນຂະນະທີ່ເຮັດວຽກການປ້ອງກັນແລະຄວບຄຸມພະຍາດຢ່າງເຂັ້ມງວດໃຫ້ດີ, ຕ້ອງເລັ່ງລັດ ແລະເປີດກວ້າງການຟື້ນຟູການເຮັດວຽກແລະການຜະລິດຢ່າງແຂງແຮງຕາມລະບຽບ, ຊຸກຍູ້ໃຫ້ຕ່ອງໂສ້ອຸດສາຫະກຳຟື້ນຟູການຜະລິດຢ່າງທົ່ວເຖິງ. ຕ້ອງວາງນະໂນບາຍແລະມາດຕະການທີ່ມີເປົ້າໝາຍທີ່ຈະແຈ້ງຢ່າງທັນການ ແລະມາດຕະການທີ່ມີຜົນປະໂຫຍດທີ່ແທ້ຈິງຕໍ່ການຊຸກຍູ້ການປະດິດສ້າງ, ຕ້ອງເລັ່ງລັດວາງແຜນການພັດທະນາອຸດສາຫະກຳເສດຖະກິດດີຈີຕອນ, ການບໍລິການຊີວິດແລະສຸຂະພາບຮ່າງກາຍ, ວັດຖຸໃໝ່ ແລະອື່ນໆ ທີ່ເປັນອຸດສາຫະກຳຍຸດທະສາດທີ່ຈະເລີນໃໝ່ແລະອຸດສາຫະກຳອະນາຄົດ.