ວັນທີ 7 ເມສາແມ່ນວັນອະນາໄມໂລກ, ຫົວຂໍ້ຫຼັກປີນີ້ແມ່ນ “ສະໜັບສະໜູນນາງພະຍາບານແລະຜູ້ຊ່ອຍໝໍປະສູດ”. ອົງການອະນາໄມໂລກ ຫຼື WHO ກ່າວວ່າ, ການແຜ່ລະບາດຂອງພະຍາດ COVID -19 ໄດ້ເນັ້ນໜັກຄວາມຕ້ອງການໂດຍດ່ວນຂອງໂລກຕໍ່ພະນັກງານການແພດຫຼາຍກວ່າເກົ່າ, ສ່ວນນາງພະຍາບານກວມພະນັກງານການແພດທົ່ວໂລກຫຼາຍກວ່າ 50%, ໄດ້ໃຫ້ບໍລິການອັນສຳຄັນທີ່ສຸດແກ່ລະບົບອະນາໄມ.
ທ່ານເຕໂດຼສ ອັດຮັນໂນມ ເກເບຼເຢຊຸສ ຜູ້ອຳນວຍການໃຫຍ່ WHO ກ່າວວ່າ, ນາງພະຍາບານແມ່ນກຳລັງຫຼັກແຫຼ່ງຂອງລະບົບອະນາໄມ, ປັດຈຸບັນມີນາງພະຍາບານຫຼາຍຄົນພວມຕ້ານກັບພະຍາດ COVID -19 ຢູ່ແນວໜ້າ, ບົດຮຽນເຫຼົ່ານີ້ສະແດງໃຫ້ເຫັນວ່າ, ຄວນເພີ່ມທະວີການລົງທຶນຕໍ່ພະນັກງານອະນາໄມຄືນາງພະຍາບານແລະທ່ານໝໍເປັນຕົ້ນ. ໃນໄລຍະພະຍາດ COVID -19, ພວກເຮົາໄດ້ເສຍພະນັກງານອະນາໄມຫຼາຍຄົນແລ້ວ, ພວກເຂົາເຈົ້າໄດ້ກອບກູ້ຊີວິດຂອງຜູ້ອື່ນແຕ່ເສຍສະຫຼະຊີວິດຕົນເອງ. ບໍ່ວ່າແມ່ນໄລຍະທຳມະດາຫຼືໄລຍະພະຍາດແຜ່ລະບາດໃນປັດຈຸບັນ, ຕ້ອງຊ່ວຍເຫຼືອແລະປົກປັກຮັກສາພວກເຂົາເຈົ້າ, ຂອບໃຈແລະໂຄລົບວຽກງານທີ່ພວກເຂົາເຈົ້າເຮັດຢ່າງແທ້ຈິງ. ວຽກນີ້ແມ່ນສັກສິດທີ່ສຸດ, ເຊື່ອວ່າພວກເຂົາເຈົ້າຈະພະຍາຍາມສຸດຂີດເພື່ອຄວບຄຸມການແຜ່ລະບາດຂອງພະຍາດ COVID -19.