ວັນທີ 8 ເມສາຜ່ານມານີ້, ໜ່ວຍຊ່ຽວຊານການແພດຈີນທີ່ໄປຊ່ວຍເຫຼືອການຕ້ານພະຍາດຂອງລາວ ໄດ້ແນະນຳສະພາບການແຫ່ງການແລກປ່ຽນດ້ານວຽກງານປ້ອງກັນຄວບຄຸມພະຍາດໂຄວິດ-19 ກັບຝ່າຍລາວ ຢູ່ແຂວງຈຳປາສັກ ແລະແຂວງຫຼວງພະບາງ ໃຫ້ນັກຂ່າວ.
ຕາມການແນະນຳ, ຢູ່ນະຄອນປາກເຊ ເທດສະບານແຂວງຈຳປາສັກ, ໜ່ວຍຊ່ຽວຊານຈີນໄດ້ອົບຮົມແລະໃຫ້ພະນັກງານການແພດທີ່ມາຈາກ 6 ແຂວງພາກໃຕ້ລາວ, ແລະຕອບຄຳຖາມກ່ຽວກັບບັນຫາດ້ານການບົ່ງມະຕິ ການປິ່ນປົວ ການປ້ອງກັນຄວບຄຸມ ການວັດແທກອຸນຫະພູມແລະອື່ນໆ, ພ້ອມທັງແລກປ່ຽນກ່ຽວກັບວຽກງານປ້ອງກັນຄວບຄຸມການລະບາດຂອງພະຍາດ, ການດັບເຊື້ອຢູ່ສະຖານທີ່ສາທາລະນະ, ການສຳຫຼວດດ້ານລະບາດວິທະຍາ, ການຄຸ້ມຄອງກຸ່ມຄົນມີຄວາມສ່ຽງສູງແລະອື່ນໆ, ຍັງໄດ້ໃຫ້ຂໍ້ສະເໜີກ່ຽວກັບການເພີ່ມທະວີການໃຊ້ມາດຕະການຕ່າງໆ.
ຢູ່ຫຼວງພະບາງ, ໜ່ວຍຊ່ຽວຊານໄດ້ເຂົ້າຮ່ວມກອງປະຊຸມສຳມະນາກ່ຽວກັບປ້ອງກັນຄວບຄຸມພະຍາດຂອງ 8 ແຂວງພາກເໜືອລາວ, ແລະໄດ້ດຳເນີນການອົບຮົມແລະຕອບຄຳຖາມກ່ຽວກັບແຜນການປິ່ນປົວພະຍາດໂຄວິດ-19 ກັບຊ່ຽວຊານຝ່າຍລາວ, ອົບຮົມພະນັກງານກວດກາເຊື້ອພະຍາດໃຫ້ຫ້ອງທົດລອງຕ່າງໆຢູ່ພາກເໜືອ, ພ້ອມທັງຈັດກອງປະຊຸມສຳມະນາກັບຜູ້ຊ່ຽວຊານທີ່ກ່ຽວຂ້ອງທີ່ມາຈາກພາກສ່ວນກ່ຽວຂ້ອງຂອງກະຊວງສາທາລະນະສຸກລາວແລະພະແນກສາທາລະນະສຸກຂອງ 8 ແຂວງພາກເໜືອ.
ວັນທີ 24 ມີນາຜ່ານມານີ້, ລາວໄດ້ລາຍງານພົບຜູ້ເປັນພະຍາດໂຄວິດ-19 ກໍລະນີທຳອິດ, ມາຮອດວັນທີ 9 ເມສານີ້ ທັງໝົດໄດ້ລາຍງານຜູ້ເປັນພະຍາດ 16 ກໍລະນີແລ້ວ. ວັນທີ 29 ມີນາແລ້ວນີ້, ໜ່ວຍຊ່ຽວຊານການແພດຊ່ວຍເຫຼືອການຕ້ານພະຍາດຂອງຈີນເດີນທາງຮອດລາວ.