ວັນທີ 9 ເມສານີ້,ທ່ານຈ້າວລີ້ຈ່ຽນ ໂຄສົກກະຊວງການຕ່າງປະເທດຈີນໄດ້ແນະນຳສະພາບກ່ຽວກັບຈີນສົ່ງໜ່ວຍຊ່ຽວຊານການແພດໄປຕ່າງປະເທດ ໂດຍກ່າວວ່າ,ປັດຈຸບັນ,ຈີນໄດ້ສົ່ງໜ່ວຍຊ່ຽວຊານການແພດ12ໜ່ວຍ ໄປຮອດ10ປະເທດຄືອີຕາລີ,ແຊກບີແລະກຳປູເຈຍເປັນຕົ້ນ, ໜ່ວຍຊ່ຽວຊານໄດ້ແລກປ່ຽນບົດຮຽນການຕ້ານກັບພະຍາດໂຄວິດ19ກັບພະນັກງານການແພດທ້ອງຖິ່ນ,ຊ່ວຍເຫຼືອເຂົາເຈົ້າຍົກສູງຄວາມສາມາດການປ້ອງກັນຄວບຄຸມ ການບົ່ງມະຕິແລະການປີ່ນປົວ,ຍົກສູງຄວາມໝັ້ນໃຈທີ່ຮ່ວມກັນເອົາຊະນະສະພາບພະຍາດ,ໄດ້ຮັບການຕີລາຄາທີ່ດີເປັນເອກະສັນກັນຈາກລັດຖະບານແລະປະຊາຊົນຂອງປະເທດທີ່ກ່ຽວຂ້ອງ.
ທ່ານຈ້າວລີ້ຈ່ຽນກ່າວຕື່ມວ່າ, ຈີນເຮັດເປັນແນວນີ້ ແມ່ນຍ້ອນມີມິດຕະພາບ,ແມ່ນເພື່ອຕອບບຸນແທນຄຸນ, ຍ້ອນມີນ້ຳໃຈມະນຸດສະທຳສາກົນ, ຍິ່ງເພື່ອຈັດຕັ້ງປະຕິບັດແນວຄວາມຄຶດກ່ຽວກັບປະຊາຄົມຮ່ວມຊາຕາກຳມວນມະນຸດ.ແຕ່ໃດມາພວກເຮົາກໍບໍ່ເຄີຍຢືນເບິ່ງຊື່ໆໃນຍາມໝູ່ເພື່ອນມີຄວາມຫຸຍ້ງຍາກລຳບາກ ແລະຫຼີກລ້ຽງໄປທາງໄກໆ, ຍິ່ງຈະບໍ່ສະແຫວງຫາຜົນປະໂຫຍດສ່ວນຕົວໃນຂະນະທີ່ເດ່ມືຊ່ວຍເຫຼືອ.
ທ່ານຈ້າວລີ້ຈ່ຽນເນັ້ນໜັກອີກວ່າ,ເມື່ອຜະເຊີນໜ້າກັບວິກິດການສາທາລະນະສຸກທົ່ວໂລກທີ່ເກີດຂຶ້ນກະທັນຫັນເທື່ອນີ້, ບໍ່ມີປະເທດໃດສາມາດເອົາຕົວລອດເປັນຍອດດີໄດ້. ຈີນຈະເດັດດ່ຽວເຮັດວຽກປ້ອງກັນຄວບຄຸມສະພາບພະຍາດຂອງປະເທດຕົນໃຫ້ດີ,ເພີ່ມທະວີການຮ່ວມມືກັບສາກົນໃນການຕ້ານກັບພະຍາດ,ແລະຕັ້ງໜ້າເຂົ້າຮ່ວມການຄຸ້ມຄອງບໍລິຫານດ້ານສາທາລະນະສຸກທົ່ວໂລກ,ເພາະວ່ານີ້ແມ່ນພາລະໜ້າທີ່ ທັງເປັນການແບກຫາບຂອງຕົນ, ສອດຄ່ອງກັບຜົນປະໂຫຍດຮ່ວມຂອງປະຊາຄົມໂລກແລະຄວາມສຸກທົ່ວມວນມະນຸດ.