ວັນທີ 13 ເມສານີ້, ທ່ານສີຈິ້ນຜິງ ປະທານປະເທດຈີນ ແລະ ທ່ານໂຈໂຄ ວີໂດໂດ ປະທານາທິບໍດີອິນໂດເນເຊຍ ໄດ້ສົ່ງສານສະແດງຄວາມຊົມເຊີຍເຊິ່ງກັນແລະກັນ ໃນໂອກາດວັນສ້າງຕັ້ງສາຍພົວພັນລະຫວ່າງຈີນ-ອິນໂດເນເຊຍຄົບຮອບ 70 ປີ.
ໃນສານຊົມເຊີຍຂອງທ່ານສີຈິ້ນຜິງໄດ້ລະບຸວ່າ: ຈີນ ແລະ ອິນໂດເນເຊຍມີໄມຕີຈິດມິດຕະພາບມາແຕ່ດົນນານ ສອງປະເທດມີຜົນປະໂຫຍດຮ່ວມກັນຢ່າງກວ້າງຂວາງທັງໃນລະດັບສອງຝ່າຍ, ໃນພາກພື້ນ ແລະ ໃນລະດັບຫຼາຍຝ່າຍ ແລະ ມີກຳລັງບົ່ມຊ້ອນອັນມະຫາສານດ້ານການຮ່ວມມື. ຈີນຈະສືບຕໍ່ຮ່ວມແຮງຮ່ວມໃຈກັບອິນໂດເນເຊຍ ເພື່ອເອົາຊະນະການແຜ່ລະບາດຂອງພະຍາດໂຄວິດ-19. ຂ້າພະເຈົ້າໃຫ້ຄວາມສຳຄັນຢ່າງສູງຕໍ່ການພັດທະນາສາຍພົວພັນລະຫວ່າງສອງປະເທດ, ຍິນດີພະຍາຍາມຮ່ວມກັບທ່ານປະທານາທິບໍດີໂຈໂຄ ວີໂດໂດ ເພື່ອເພີ່ມເນື້ອໃນຈິດໃຈໃໝ່ເຂົ້າໃນການພົວພັນຄູ່ຮ່ວມຍຸດທະສາດຮອບດ້ານລະຫວ່າງຈີນ-ອິນໂດເນເຊຍ ແລະ ເພີ່ມພະລັງຊຸກດັນໃໝ່ເຂົ້າໃນການພັດທະນາຂອງພາກພື້ນ.
ໃນສານຊົມເຊີຍຂອງທ່ານໂຈໂຄ ວີໂດໂດ ໄດ້ກ່າວວ່າ: ການພົວພັນລະຫວ່າງສອງປະເທດໄດ້ພັດທະນາມາເປັນເວລາ 70 ປີ ແລະ ນັບມື້ນັບມີຄວາມສົມບູນ, ນີ້ແມ່ນໝາກຜົນທີ່ມີລັກສະນະຍຸດທະສາດອັນພົ້ນເດັ່ນທີ່ອິນໂດເນເຊຍແລະຈີນຍາດມາໄດ້. ສອງປະເທດໄດ້ສ້າງໂອກາດການຮ່ວມມືຢູ່ເລື້ອຍໆໃນຂົງເຂດຕ່າງໆ ແລະ ໄດ້ສ້າງຄວາມຜາສຸກໃຫ້ປະຊາຊົນສອງຊາດ ເຊິ່ງເປັນຄວາມພາກພູມໃຈສຳລັບສອງຝ່າຍ. ໃນຂອບສາຍພົວພັນການຮ່ວມມືຄູ່ຍຸດທະສາດຮອບດ້ານ, ສອງຝ່າຍໄດ້ຍຶດໝັ້ນໃນຈິດໃຈການຮ່ວມມືກັນ ເຊິ່ງຈະເປັນການຊຸກຍູ້ໃຫ້ສອງປະເທດມີການພັດທະນາແລະຈະເລີນຮຸ່ງເຮືອງຂຶ້ນຢ່າງບໍ່ຢຸດຢັ້ງ ແລະ ເປັນການປະກອບສ່ວນເພື່ອສັນຕິພາບ, ສະຖຽນລະພາບ ແລະ ຄວາມຈະເລີນຮຸ່ງເຮືອງຂອງພາກພື້ນ ກໍຄືຂອງໂລກ.