ວາລະສານ “ສິວຊື” ສະບັບທີ 8 ທີ່ພິມຈຳໜ່າຍໃນວັນທີ 16 ເມສານີ້ໄດ້ພິມບົດຄວາມສຳຄັນຂອງທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ, ປະທານປະເທດ, ປະທານຄະນະກຳມະການການທະຫານສູນກາງຈີນ ທີ່ພາດຫົວຂໍ້ວ່າ: “ຄວາມສາມັກຄີແລະການຮ່ວມມືກັນແມ່ນອາວຸດທີ່ແຫຼມຄົມທີ່ສຸດສຳລັບປະຊາຄົມໂລກເພື່ອເອົາຊະນະການແຜ່ລະບາດຂອງພະຍາດໂຄວິດ-19”.
ບົດຄວາມລະບຸວ່າ, ມະນຸດເຮົາເປັນປະຊາຄົມຮ່ວມຊາຕາກຳ, ເພື່ອເອົາຊະນະການແຜ່ລະບາດຂອງພະຍາດທີ່ເປັນໄພຂົ່ມຂູ່ຕໍ່ປະຊາຊົນບັນດາປະເທດ, ຄວາມສາມັກຄີແລະການຮ່ວມມືກັນແມ່ນອາວຸດທີ່ແຫຼມຄົມທີ່ສຸດ. ໄວຣັສບໍ່ມີພົມແດນ ແລະ ບໍ່ຈຳແນກເຊື້ອຊາດ. ມີພຽງແຕ່ຄວາມສາມັກຄີແລະປະສານງານກັນ, ຮ່ວມມືກັນຮັບມືໄວຣັສ, ປະຊາຄົມໂລກຈິ່ງຈະສາມາດເອົາຊະນະການແຜ່ລະບາດຂອງພະຍາດໄດ້ ແລະ ຈະສາມາດປົກປ້ອງເຮືອນດຽວກັນຂອງມວນມະນຸດໄດ້.
ບົດຄວາມລະບຸຕື່ມວ່າ, ຈະພົບກັບຄວາມຈິງໃຈໃນເວລາພົບຄວາມຫຍຸ້ງຍາກ, ຈີນສະແດງຄວາມຊົມເຊີຍຕໍ່ປະຊາຄົມໂລກທີ່ເຂົ້າໃຈ ແລະ ໃຫ້ການສະໜັບສະໜູນທີ່ລ້ຳຄ່າແກ່ຈີນ. ຈີນຍິນດີຮ່ວມກັນກັບອົງການອະນາໄມໂລກ ແລະ ປະຊາຄົມໂລກ, ຮ່ວມກັນປົກປ້ອງຄວາມປອດໄພດ້ານສາທາລະນະສຸກຂອງພາກພື້ນ ກໍຄືຂອງໂລກ.