ວັນທີ 20 ເມສານີ້, ຄະນະກຳມະການພັດທະນາ ແລະປະຕິຮູບແຫ່ງຊາດຈີນເປີດເຜີຍໃຫ້ຮູ້ວ່າ, ນັບຕັ້ງແຕ່ເດືອນມີນາເປັນຕົ້ນມາ, ຕົວເລກດັດຊະນີເສດຖະກິດດ້ານຕ່າງໆຂອງຈີນກຳລັງດີຂຶ້ນເທື່ອລະກ້າວ, ລະບຽບການເສດຖະກິດກຳລັງຟື້ນຟູຄວາມເປັນປົກກະຕິ.
ທ່ານແຢນເສີງເຜີງ ຫົວໜ້າກົມສັງລວມເສດຖະກິດແຫ່ງຊາດຂອງຄະນະກຳມະການພັດທະນາ ແລະປະຕິຮູບແຫ່ງຊາດຈີນກ່າວໃນກອງປະຊຸມຂ່າວທີ່ຈັດຂຶ້ນໃນວັນທີ 20 ເມສານີ້ວ່າ, ປັດຈຸບັນ, ທ້ອງຖິ່ນຕ່າງໆຂອງຈີນກຳລັງຊຸກຍູ້ການຟື້ນຟູການເຮັດວຽກ, ການຜະລິດ, ການເຮັດທຸລະກິດ ແລະການຄ້າຂາຍຢ່າງເປັນລະບຽບ ພາຍໃຕ້ເງື່ອນໄຂປະຕິບັດວຽກງານປ້ອງກັນ ແລະຄວບຄຸມເຊື້ອພະຍາດໃຫ້ດີ.
ຄຽງຄູ່ກັບການແຜ່ລະບາດເຊື້ອໂຄວິດ-19 ໄດ້ຮັບການຄວບຄຸມ, ການຟື້ນຟູການເຮັດວຽກ ແລະການຜະລິດຂອງວິສາຫະກິດຕ່າງປະເທດທີ່ປະຈໍາຢູ່ປະເທດຈີນກໍໄດ້ຮັບການເລັ່ງລັດຂຶ້ນ. ທ່ານຢວນດາ, ໂຄສົກຄະນະກຳມະການພັດທະນາ ແລະປະຕິຮູບແຫ່ງຊາດຈີນເປີດເຜີຍໃຫ້ຮູ້ວ່າ, ນັບຕັ້ງແຕ່ເດືອນມີນາເປັນຕົ້ນມາ, ວິສາຫະກິດອາເມຣິກາ ແລະວິສາຫະກິດຍີ່ປຸ່ນທີ່ປະຈໍາຢູ່ປະເທດຈີນມີເຈດຈຳລົງໃນການລົງທຶນເພີ່ມຂຶ້ນຢ່າງເດັ່ນຊັດເມື່ອທຽບກັບເດືອນກຸມພາ.