ເນື່ອງໃນໂອກາດ “ວັນການບິນອະວະກາດແຫ່ງຊາດຈີນ”ຄັ້ງທີ 5 ແລະ ຜົນສຳເລັດຂອງການສົ່ງດາວທຽມ “ຕົ່ງຟ່າງຫົງ 1” ຄົບຮອບ 50 ປີ ໄດ້ໝູນວຽນມາເຖິງ, ວັນທີ23 ເມສານີ້, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ປະທານປະເທດຈີນ ປະທານຄະນະກຳມະການການທະຫານສູນກາງຈີນໄດ້ຕອບຈົດໝາຍນັກວິທະຍາດອາວຸໂສທີ່ເຄີຍເຂົ້າຮ່ວມປະຕິບັດໜ້າທີ່ຄົ້ນຄວ້າຜະລິດ ດາງທຽມ “ຕົ່ງຟ່າງຫົງ 1”, ໂດຍທ່ານໄດ້ສະແດງຄວາມຢື້ຢາມຖາມຂ່າວຢ່າງຈິງໃຈຕໍ່ບັນດານັກວິທະຍາສາດອາວຸດໂສທັງຫລາຍ, ທັງໄດ້ຝາກຄວາມຫວັງຢ່າງສູງຕໍ່ຜູ້ທີ່ປະຕິບັດໜ້າທີ່ໃນວຽກງານການບິນອະວະກາດອັນໄພສານໃຫ້ເຊີດຊູຈິດໃຈ “2 ລູກລະເບີດ 1 ດາວທຽມ” ແລະ ເລັ່ງລັດສ້າງປະເທດໃຫ້ເຂັ້ມແຂງທາງດ້ານການບິນອະວະກາດ.
ທ່ານສີຈິ້ນຜິງໄດ້ລະບຸໃນຈົດໝາຍວ່າ: ໃນຖານະເປັນຜູ້ເຂົ້າຮ່ວມປະຕິບັດໜ້າທີ່ ຄົ້ນຄວ້າຜະລິດ“ດາວທຽມຕົ່ງຟ່າງຫົງ 1”, ບັນດາທ່ານໄດ້ອຸທິດຕົນຕັ້ງແຕ່ເປັນໄວໜຸ່ມໃຫ້ແກ່ພາລະກິດການບິນອະວະກາດຂອງປະເທດຊາດ, ປະຈຸບັນເຖິງວ່າໄດ້ມີອາຍຸສູງແລ້ວກໍຕາມ,ແຕ່ບັນດາທ່ານຍັງໄດ້ເອົາໃຈໃສ່ຕໍ່ອະນາຄົດຂອງພາລະກິດການບິນອະວະກາດຂອງປະເທດຊາດ, ນີ້ເຮັດໃຫ້ຂ້າພະເຈົ້າຮູ້ສຶກຕື້ນຕັນໃຈທີ່ສຸດ.
ທ່ານສີຈິ້ນຜິງຊີ້ອອກວ່າ: ເມື່ອ 50 ປີກ່ອນ, ຈີນໄດ້ສົ່ງດາວທຽມ “ຕົ່ງຟ່າງຫົງ 1”ຂຶ້ນສູ່ອະວະກາດຢ່າງສຳເລັດຜົນ, ຂ້າພະເຈົ້າໄດ້ຮູ້ຂ່າວນີ້ຢູ່ບ້ານຫຼຽງເຈ່ຍເຫີທາງພາກເໜືອຂອງແຂວງສ້ານຊີ່, ຕອນນັ້ນຮູ້ສຶກຕື່ນເຕັ້ນທີ່ສຸດ. ໃນເວລານັ້ນ, ບັນດາທ່ານໄດ້ບຸກບືນສູ້ຊົນຢ່າງດຸໝັ່ນ ແລະເຮັດວຽກຢ່າງຕັ້ງໃຈແລະອົດທົນ, ໄດ້ສ້າງຜົນສຳເລັດອັນໂດດເດັ່ນທີ່ເຮັດໃຫ້ປະຊາຊົນບັນດາເຜົ່າຮູ້ສຶກພາກພູມໃຈທີ່ສຸດ, ເຊິ່ງສະແດງໃຫ້ເຫັນຈິດໃຈທີ່ສ້າງຄວາມເຂັ້ມແຂງດ້ວຍຕົນເອງທີ່ຍິ່ງໃຫຍ່ຂອງປະຊາຊາດຈີນ, ຄຸນງາມຄວາມດີຂອງຜູ້ທີ່ໄດ້ປະຕິບັດໜ້າທີ່ໃນວຽກງານການບິນອະວະກາດຮຸ່ນເກົ່າໄດ້ຖືກຈາລຶກໄວ້ໃນປື້ມປະຫວັດສາດຂອງສປຈີນຢ່າງບໍ່ມີວັນລືມ.
ທ່ານສີຈິ້ນຜິງກ່າວເນັ້ນວ່າ, ບໍ່ວ່າສະພາບການຈະປ່ຽນແປງໄປຄືແນວໃດກໍຕາມ, ກໍຢ່າສູ່ປະຖິ້ມນໍ້າໃຈເພິ່ງຕົນເອງ ແລະບຸກບືນສູ້ຊົນຢ່າງທໍລະຫົດອົດທົນ. ຜູ້ປະຕິບັດໜ້າທີ່ໃນວຽກງານການບິນອະວະກາດໃນຍຸກໃໝ່ຕ້ອງຖືຜູ້ອາວຸໂສລຸ້ນເກົ່າເປັນແບບຢ່າງ, ອອກແຮງເຊີດຊູຈິດໃຈ “2 ລູກລະເບີດ 1 ດາວທຽມ”, ຕ້ອງກ້າຜ່ານຜ່າຄວາມຫຍຸ້ງຍາກລຳບາກທຸກປະການ,ກ້າບິນຂຶ້ນສູ່ຈອມພູສູງແຫ່ງວິທະຍາສາດເຕັກໂນໂລຊີການບິນອະວະກາດ, ເຮັດໃຫ້ຊາວຈີນມີບາດກ້າວເດີນທີ່ໜັກແໜ້ນກວ່າເກົ່າ ແລະ ກ້າວໄປໄກກວ່າເກົ່າໃນການສຳຫຼວດອະວະກາດ, ບັນລຸຄວາມໃຝ່ຝັນອັນຍິ່ງໃຫຍ່ທີ່ສ້າງປະເທດທີ່ເຂັ້ມແຂງໃນດ້ານການບິນອະວະກາດໂດຍໄວ.
ວັນທີ 24 ເມສາປີ 1970, ໂດຍຜ່ານຄວາມພະຍາຍາມຢ່າງບໍ່ລົດລະຂອງນັກຄົ້ນຄວ້ານັກທົດລອງອັນໄພສານມາເປັນເວລາຫຼາຍປີ, ດາວທຽມດວງທຳອິດຂອງຈີນທີ່ມີຊື່ວ່າ “ຕົ່ງຟ່າງຫົງ 1” ໄດ້ສົ່ງຂຶ້ນສູ່ອະວະກາດຢ່າງສຳເລັດຜົນ. ໃນຖານະເປັນພາກສ່ວນສຳຄັນຂອງໂຄງການ “2 ລູກລະເບີດ 1 ດາວທຽມ”, ຜົນສຳເລັດຂອງການສົ່ງດາວທຽມ “ຕົ່ງຟ່າງຫົງ 1” ໄດ້ເປີດສາກທີ່ປະຊາຊາດຈີນ ສຳຫຼວດຄົ້ນຄວ້າຄວາມລຶກລັບຂອງຈັກກະວານ ແລະ ນຳໃຊ້ອະວະກາດເຂົ້າໃນທາງສັນຕິພາບ ແລະສ້າງຜົນປະໂຫຍດໃຫ້ແກ່ມວນມະນຸດ. ເພື່ອສືບທອດຈິດໃຈ ແລະ ຈົດຈຳປະຫວັດສາດ, ໂດຍຜ່ານການອະນຸມັດຈາກສູນກາງພັກກອມມູນິດຈີນ ແລະຄະນະລັດຖະບານຈີນ, ນັບແຕ່ປີ 2016 ເປັນຕົ້ນມາ,ຈີນ ໄດ້ກຳນົດເອົາວັນທີ 24 ເມສາຂອງທຸກປີເປັນ “ວັນການບິນອະວະກາດແຫ່ງຊາດຈີນ”.