ວັນທີ 27 ເມສານີ້, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ, ປະທານປະເທດຈີນໄດ້ເປັນປະທານຈັດກອງປະຊຸມຄະນະກຳມະການລົງເລິກການປະຕິຮູບຢ່າງຮອບດ້ານຄັ້ງທີ 13 ແລະໄດ້ກ່າວປາໄສທີ່ສຳຄັນ.
ທ່ານກ່າວເນັ້ນວ່າ: ຈີນສາມາດຊຸກຍູ້ການປ້ອງກັນ ແລະຄວບຄຸມພະຍາດ COVID-19 ທັງສາມາດຟື້ນຟູການຜະລິດຄືນໃໝ່ຢ່າງເຂັ້ມແຂງກໍເປັນຍ້ອນບົດບາດສຳຄັນທີ່ຫາອັນປຽນບໍ່ໄດ້ຂອງການນຳພາຂອງພັກກອມມູນິດຈີນ ກໍຄືທ່າແຮງດ້ານລະບອບສັງຄົມນິຍົມຂອງຈີນ. ຕ້ອງຍຶດໝັ້ນລົງເລິກການປະຕິຮູບຢ່າງເດັດດ່ຽວໜຽວແໜ້ນ, ບູລະນະລະບຽບການດ້ານຕ່າງໆຢ່າງຮອບດ້ານ, ປັບປຸງລະບົບການບໍລິຫານ, ຊຸກຍູ້ການສ້າງລະບຽບການໃຫ້ເກີມີປະສິດທິຜົນດ້ານການບໍລິຫານ, ຊຳນິຊຳນານໃນການໜູນໃຊ້ທ່າແຮງດ້ານລະບອບ ເພື່ອຮັບມືກັບຄວາມສ່ຽງ ແລະສິ່ງທ້າທາຍ.
ກອງປະຊຸມດັ່ງກ່າວຍັງໄດ້ເນັ້ນໜັກວ່າ: ປັດຈຸບັນນີ້, ຈີນໄດ້ປັບປຸງທ່ວງທ່າປ້ອງກັນ ແລະຄວບຄຸມພະຍາດ COVID-19 ດີຂຶ້ນຕື່ມອີກ, ແຜນການຊຸກຍູ້ການປະຕິຮູບຕ້ອງມີການຈັດວາງໂດຍລວມທີ່ກວມເອົາການປ້ອງກັນຄວາມສ່ຽງ, ສ້າງພື້ນຖານ, ສົ່ງຜົນປະໂຫຍດໃຫ້ປະຊາຊົນ ແລະມີຜົນດີໃນໄລຍະຍາວນານໃຫ້ເປັນເອກະພາບກັນແບບກາຍອິນຊີ. ຕ້ອງລົງເລິກຄວາມຮັບຮູ້ຕໍ່ກົດເກນການປະຕິຮູບ, ບັບປຸງຢ່າງບໍ່ຢຸດຢັ້ງຕາມການປ່ຽນແປງຂອງເວລາ ແລະສະຖານະການ, ລົງເລິກຄວາມຮັບຮູ້ດັ່ງກ່າວຢ່າງບໍ່ຢຸດຢັ້ງໃນການແກ້ໄຂບັນຫາຕົວຈິງ, ເຮັດໃຫ້ການປະຕິຮູບສອດຄ່ອງກັບສະາບຄວາມເປັນຈິງ, ສອດຄ່ອງກັບຄວາມຮຽກຮ້ອງຕ້ອງການຂອງການພັດທະນາເສດຖະກິດ-ສັງຄົມ ແລະສອດຄ່ອງກັບຄວາມຄາດມຸ້ງຫວັງຂອງປະຊາຊົນ.