ທ່ານວາງຢີ້ ລັດຖະມົນຕີກະຊວງການຕ່າງປະເທດຈີນ ທັງເປັນທີ່ປຶກສາແຫ່ງລັດ ໄດ້ເຂົ້າຮ່ວມກອງປະຊຸມ ລັດຖະມົນຕີການຕ່າງປະເທດBRICSສະໄໝພິເສດເພື່ອຮັບມືກັບພະຍາດ COVID-19ທີ່ຈັດຂຶ້ນຢູ່ນະຄອນຫຼວງປັກກິ່ງໃນຄືນວັນທີ 28 ເມສານີ້. ທ່ານວາງຢີ້ກ່າວວ່າ: ສະພາບການແຜ່ລະບາດຂອງພະຍາດ COVID-19 ໄດ້ເປັນໄພຂົ່ມຂູ່ອັນຮ້າຍແຮງຕໍ່ຊີວິດແລະສຸຂະພາບຂອງປະຊາຊົນບັນດາປະເທດ ເຊິ່ງໄດ້ສ້າງຜົນກະທົບຢ່າງໜັກໜ່ວງຕໍ່ການໄປມາຫາສູ່ກັນລະຫວ່າງປະຊາຊົນໃນທົ່ວໂລກແລະເສດຖະກິດໂລກ. ແຕ່ວ່າສະພາບການແຜ່ລະບາດຂອງພະຍາດຈະບໍ່ສາມາດປ່ຽນແປງຫົວຂໍ້ຫຼັກຂອງຍຸກສະໄໝຄື ສັນຕິພາບແລະການພັດທະນາ, ທັງຈະບໍ່ສາມາດຢຸດຢັ້ງຂະບວນວິວັດຂອງປະຫວັດສາດທີ່ຫັນເປັນຫຼາຍຂົ້ວແລະໂລກາພິວັດ, ຍິ່ງບໍ່ສາມາດກີດຂວາງບາດກ້າວເດີນອັນເດັດດ່ຽວໜຽວແໜ້ນຂອງມວນມະນຸດໃນການສະແຫວງຫາຄວາມສີວິໄລແລະຄວາມກ້າວໜ້າໄດ້. ປະເທດBRICSຄວນຕັດສິນໃຈກ່ຽວກັບທາງເລືອກອັນຖືກຕ້ອງແລະໃຊ້ການເຄື່ອນໄຫວຢ່າງເຂັ້ມແຂງ.
ໃນເວລາປະກອບຄຳເຫັນໃນກອງປະຊຸມດັ່ງກ່າວ, ທ່ານວາງຢີ້ກ່າວເນັ້ນວ່າ: ຄວນຍົກສູງຄັນທຸງລັດທິຫຼາຍຝ່າຍ, ສົ່ງເສີມທັດສະນະບໍລິຫານທີ່ປຶກສາຫາລືຮ່ວມກັນ, ສ້າງສາຮ່ວມກັນແລະຊົມໃຊ້ຮ່ວມກັນ. ເພີ່ມທະວີການປະສານງານດ້ານນະໂຍບາຍເສດຖະກິດມະຫາພາກ, ປ້ອງກັນບໍ່ໃຫ້ເສດຖະກິດຊຸດໂຊມລົງ, ຮັກສາຄວາມໝັ້ນຄົງດ້ານການປະກອບອາຊີບ, ຮັບປະກັນຊີວິດການເປັນຢູ່ຂອງປະຊາຊົນ, ຊຸກຍູ້ໃຫ້ເສດຖະກິດໂລກມີຄວາມໝັ້ນຄົງ, ຮັບປະກັນໃຫ້ຕ່ອງໂສ້ອຸດສາຫະກຳແລະຕ່ອງໂສ້ການສະໜອງຂອງທົ່ວໂລກສາມາດປະຕິບັດງານໄປໄດ້ດ້ວຍດີທັງປອດໄພ.
ທ່ານວາງຢີ້ຊີ້ໃຫ້ເຫັນວ່າ: ຈີນຕັ້ງໜ້າດຳເນີນການຮ່ວມມືສາກົນເພື່ອຕ້ານກັບພະຍາດ ແມ່ນໄດ້ຄຳນຶງເຖິງຈິດໃຈມະນຸດສະທຳ, ແຕ່ບໍ່ແມ່ນພິຈາລະນາຕາມຮູບຖານຈິດສຳນຶກ, ບໍ່ແມ່ນເພື່ອສະແຫວງຫາຜົນປະໂຫຍດສ່ວນຕົວໃນດ້ານການເມືອງພູມສາດ. ບໍ່ຄວນເຮັດໃຫ້ຖ້ອຍຄຳຕຳໜິວິຈານແລະການໜິ້ງຄວາມຮັບຜິດຊອບມາບັ່ນທອນເຫື່ອແຮງແລະຈິດໃຈໃນການຮ່ວມມືສາກົນເພື່ອຕ້ານກັບພະຍາດ, ຍິ່ງບໍ່ຄວນອະນຸຍາດໃຫ້ການກະທຳທີ່ຫັນບັນຫາການແຜ່ລະບາດຂອງພະຍາດກາຍເປັນບັນຫາການເມືອງແລະ ສວຍໃຊ້ບັນຫາພະຍາດໃສ່ຮ້າຍປ້າຍສີກັນເພື່ອສ້າງຄວາມຂັດແຍ້ງອັນໃໝ່.
ບັນດາຝ່າຍທີ່ເຂົ້າຮ່ວມກອງປະຊຸມລ້ວນແຕ່ເຫັນວ່າ: ປະເທດBRICSຕ້ອງຍຶດໝັ້ນລັດທິຫຼາຍຝ່າຍ, ຄວນເພີ່ມທະວີຄວາມສາມັກຄີແລະປະສານງານກັນ, ແບ່ງປັນຂໍ້ມູນຂ່າວສານແລະແລກປ່ຽນບົດຮຽນຕ້ານກັບພະຍາດຢ່າງໃກ້ຊິດ, ດຳເນີນການຮ່ວມມືຄົ້ນຄວ້າພັດທະນາຢາປົວພະຍາດແລະຢາວັກແຊງ, ພະຍາຍາມຫຼຸດຜ່ອນຜົນສະທ້ອນດ້ານລົບຈາກສະພາບການແຜ່ລະບາດຂອງພະຍາດ. 5 ປະເທດBRICSຄວນສືບຕໍ່ຊຸກຍູ້ການຮ່ວມມືດ້ານເສດຖະກິດ, ຄວາມໝັ້ນຄົງດ້ານການເມືອງ, ການແລກປ່ຽນດ້ານວັດທະນະທຳ ໃນຂະນະດຽວກັນກໍຖືເອົາການຮ່ວມມືໃນຂົງເຂດສາທາລະນະສຸກໄວ້ໃນຖານະສຳຄັນກວ່າເກົ່າ.