ຕອນຄ່ຳວັນທີ 8 ພຶດສະພານີ້, ທ່ານ ສີຈີ້ນຜິງ ປະທານປະເທດຈີນໄດ້ລົມກັບທ່ານວະລາດີເມຍ ປູຕິນ ປະທານາທິບໍດີຣັດເຊຍຜ່ານທາງໂທລະສັບ.
ທ່ານ ສີຈີ້ນຜິງ ກ່າວວ່າ, ປັດຈຸບັນ, ປະຊາຄົມໂລກພວມສູ້ຊົນກັບພະຍາດ COVID-19. ພາຍໃຕ້ການຊີ້ນຳຂອງທ່ານ, ມາດຕະການປ້ອງກັນຄວບຄຸມພະຍາດຂອງຣັດເຊຍໄດ້ເກີດຜົນຢ່າງເດັ່ນຊັດ, ຈີນມີຄວາມໝັ້ນໃຈຕໍ່ຣັດເຊຍໃນການເອົາຊະນະພະຍາດ COVID-19 ໃນທີ່ສຸດ, ແລະຈະສືບຕໍ່ສະໜອງການສະໜັບສະໜູນຕໍ່ຣັດເຊຍຢ່າງເດັດຂາດ. ປະຊາຄົມໂລກ ຄວນເສີມຂະຫຍາຍນ້ຳໃຈຂອງສົງຄາມຕ້ານຟາຊິດໂລກ, ຮ່ວມຈິດຮ່ວມໃຈ ແລະ ສາມັກຄີ ຊ່ວຍເຫຼືອເຊິ່ງກັນແລະກັນ, ຕັ້ງໜ້າປະຕິບັດທິດສະນະຄະຕິກ່ຽວກັບປະຊາຄົມຮ່ວມຊາຕາກຳມວນມະນຸດ, ຮ່ວມມືກັນ ເພື່ອໄດ້ຮັບໄຊຊະນະໃນສົງຄາມປົກປ້ອງຄວາມປອດໄພດ້ານຊີວິດ ແລະ ສຸຂະພາບຂອງປະຊາຊົນປະເທດຕ່າງໆ. ເຊື່ອວ່າ ພາຍໃຕ້ຄວາມພະຍາຍາມຮ່ວມຂອງຈີນ ຣັດເຊຍ ພ້ອມດ້ວຍ ປະຊາຄົມໂລກ, ພວກເຮົາຍ່ອມຈະເອົາຊະນະເຊື້ອພະຍາດຕ່າງໆ ແລະ ໄດ້ຮັບໄຊຊະນະໃນສົງຄາມເທື່ອນີ້ໃນທີ່ສຸດ.
ທ່ານ ປູຕີນ ກ່າວວ່າ, ປະຊາຊົນສອງປະເທດຣັດເຊຍ-ຈີນ ໄດ້ມີຄວາມເສຍສະຫຼະອັນໃຫຍ່ຫຼວງເພື່ອໄດ້ຮັບໄຊຊະນະໃນສົງຄາມໂລກຄັ້ງທີສອງ, ເນື່ອງໃນໂອກາດປະຫວັດການທີ່ສົງຄາມປ້ອງກັນປິຕຸພູມຂອງໂຊວຽດ ໄດ້ຮັບໄຊຊະນະຄົບຮອບ 75 ປີ, ຣັດເຊຍຍິນດີເພີ່ມທະວີການປະສານງານດ້ານຍຸດທະສາດຢ່າງຮອບດ້ານກັບຈີນ, ສະແດງຄວາມຕັດສິນໃຈທີ່ພ້ອມກັນຮັກສາສັນຕິພາບຂອງໂລກ, ບໍ່ອະນຸຍາດກິລິຍາວາຈາໃດໆທີ່ຢາກດັດແກ້ປະຫວັດສາດ ແລະ ລືມປະຫວັດສາດ. ຂອບໃຈຈີນທີ່ສະໜອງການຊ່ວຍເຫຼືອແບບມະນຸດສະທຳ ແລະ ວັດຖຸສິ່ງຂອງດ້ານການແພດແລະປ້ອງກັນພະຍາດຕ່າງໆ, ຣັດເຊຍຍິນດີຖອດຖອນບົດຮຽນທີ່ປ້ອງກັນຄວບຄຸມພະຍາດ COVID-19 ຂອງຈີນ, ດຳເນີນການຮ່ວມມືເພື່ອຄົ້ນຄວ້າພັດທະນາວັກແຊນ. ຣັດເຊຍຄັດຄ້ານອິດທິກຳລັງສ່ວນໜ້ອຍທີ່ກ່າວປະນາມຈີນດ້ວຍຂໍ້ອ້າງພະຍາດ COVID-19, ຈະຢູ່ນຳກັບຈີນຢ່າງເດັດຂາດ. ຣັດເຊຍຍິນດີເພີ່ມທະວີການແລກປ່ຽນ ແລະ ການຮ່ວມມືກັບຈີນພາຍໃຕ້ຂອບຕ່າງໆ ເຊັ່ນ,ປະເທດບຣິກສ໌ ແລະ ອົງການຮ່ວມມືຊຽງໄຮ້ເປັນຕົ້ນ.