ຢູ່ນະຄອນຫຼວງວຽງຈັນຂອງລາວໃນຕົ້ນເດືອນພຶດສະພານີ້, ຜົນກະທົບຈາກການແຜ່ລະບາດຂອງພະຍາດໂຄວິດ-19 ຍັງບໍ່ທັນສິ້ນສຸດເທື່ອ. ພາຍໃຕ້ສະພາບແສງແດດທີ່ແຮງກ້າ, ພະນັກງານກໍ່ສ້າງທາງລົດໄຟຈີນ-ລາວຢູ່ຊານເມືອງໄດ້ອອກເຫື່ອເທແຮງປູລາງລົດໄຟຫັນໜ້າໄປສູ່ເຂດຊາຍແດນລະຫວ່າງຈີນ-ລາວ, ພະຍາຍາມເພື່ອຮັບປະກັນໃຫ້ ວຽກງານສຳເລັດຕາມເວລາກຳນົດ.
ທ່ານ ເສີນຈ້ຽນ ປີນີ້ອາຍຸ 31 ປີ, ເປັນຜູ້ຂັບລົດໄຟທີ່ມີຄວາມຊຳນິຊຳນານພາຍໃນປະເທດຈີນ, ປັດຈຸບັນ,ເປັນຜູ້ຂັບລົດໄຟໃນໂຄງການຂອງພະແນກບໍລິຫານໂຄງການປູລາງລົດໄຟຈີນ-ລາວຂອງກຸ່ມບໍລິສັດທາງລົດໄຟເລກ 2 ວິສະວະກຳຂອງຈີນ. ທ່ານກ່າວວ່າ: “ຂ້າພະເຈົ້າຂັບລົດໄຟແລ່ນຢູ່ທົ່ວປະເທດຈີນມາຫຼາຍປີແລ້ວ,ເທື່ອນີ້ເປັນເທື່ອທຳອິດທີ່ຂ້າພະເຈົ້າຂັບລົດໄຟຢູ່ຕ່າງປະເທດ. ທາງລົດໄຟສາຍນີ້ດີຫຼາຍ,ລົດໄຟແລ່ນໄດ້ຢ່າງສະໝ່ຳສະເໝີ.”ການວາງທ່ອນເຫຼັກກ້າທີ່ມີຄວາມຍາວເຖິງ 500 ແມັດເສັ້ນທຳອິດຂອງທາງລົດໄຟຈີນ-ລາວຢ່າງສຳເລັດຜົນຢູ່ເຂດຊານເມືອງໃນນະຄອນຫຼວງວຽງຈັນໃນວັນທີ 27 ມີນາປີນີ້ຂອງກຸ່ມບໍລິສັດທາງລົດໄຟເລກ 2 ວິສະວະກຳຂອງຈີນເປັນຂີດໝາຍສະແດງໃຫ້ເຫັນວ່າການກໍ່ສ້າງທາງລົດໄຟຈີນ-ລາວໄດ້ເຂົ້າສູ່ໄລຍະທີ່ສຳຄັນ.ຮອດຕົ້ນເດືອນພຶດສະພານີ້, ໄດ້ສຳເລັດການປູລາງທາງລົດໄຟຈີນ-ລາວທີ່ມີຄວາມຍາວປະມານ 40 ກິໂລແມັດແລ້ວ, ທ່ານ ເສີນຈ້ຽນ ກໍ່ໄດ້ກາຍເປັນຜູ້ຂັບຂີ່ຜູ້ທີໜຶ່ງທີ່ຂັບລົດໄຟຢູ່ທາງລົດໄຟທັນສະໄໝສາຍທຳອິດຂອງລາວ.
ທ່ານ ຫູປິ່ນ ຜູ້ອຳນວຍການໃຫຍ່ປະຈຳໂຄງການປູລາງລົດໄຟຈີນ-ລາວຂອງກຸ່ມບໍລິສັດທາງລົດໄຟເລກ 2 ວິສະວະກຳຂອງຈີນກ່າວໃນວັນທີ 7 ພຶດສະພານີ້ວ່າ: “ໃນປັດຈຸບັນ,ເພື່ອຮັບປະກັນວຽກງານການກໍ່ສ້າງໂດຍລວມຂອງທາງລົດໄຟຈີນ-ລາວໝົດເສັ້ນໃຫ້ເຄື່ອນໄຫວໄດ້ເປັນປົກກະຕິ, ພວກເຮົາໄດ້ສຸມທຸກຄວາມພະຍາຍາມຈັດຕັ້ງປະຕິບັດມາດຕະການປ້ອງກັນແລະຄວບຄຸມພະຍາດເພື່ອຮັບປະກັນໃຫ້ວຽກງານມີຄວາມຄືບໜ້າ,ມີຄຸນນະພາບສູງ,ປອດໄພແລະທັນເວລາ.” ທ່ານກ່າວວ່າ: ພາຍໃຕ້ສະພາບການປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19 ທີ່ຂ້ຽວຂາດຢູ່ໃນໂລກ, ພະແນກບໍລິຫານໂຄງການໄດ້ປະຕິບັດລະບຽບການປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19 ຢ່າງເຄັ່ງຄັດ, ເພື່ອເຮັດໃຫ້ການກໍ່ສ້າງແລະປ້ອງກັນການແຜ່ລະບາດຂອງພະຍາດໂຄວິດ-19 ບັນລຸຕາມເປົ້າໝາຍ,ບໍລິສັດໄດ້ເອົາໃຈໃສ່ “ກັກບໍລິເວນທີ່ເຂັ້ມງວດ,ຫຼີກລຽງການຕິດແປດເຊື້ອພະຍາດ,ທັງຮັບປະກັນຄວາມຄືບໜ້າຂອງໂຄງການ”.
ການປູລາງລົດໄຟຕາມທາງລົດໄຟລາວ-ຈີນໄດ້ຍົກລະດັບຄວາມໄວຈາກ 2 ກິໂລແມັດຕໍ່ 3 ວັນ ຂຶ້ນເປັນ 1 ກິໂລແມັດສະເລ່ຍຕໍ່ 1 ວັນ.
ວັນທີ 7 ພຶດສະພານີ້, ທ່ານເສິນຈ້ຽນໄດ້ຂັບລົດໄຟສະເພາະຂົນສົ່ງອຸປະກອນທີ່ມີ 21 ຕູ້, ແຕ່ລະຕູ້ລ້ວນແຕ່ໄດ້ບັນທຸກໄມ້ທ່ອນປູລາງລົດໄຟທີ່ໜັກປະມານ 70 ໂຕນ. ອາດເວົ້າໄດ້ວ່າ, ໃນຂະນະທີ່ກໍ່ສ້າງທາງລົດໄຟລາວ-ຈີນ, ທາງລົດໄຟດັ່ງກ່າວກໍເລີ່ມໄດ້ເສີມຂະຫຍາຍບົດບາດຄວາມວ່ອງໄວຂອງຕົນແລ້ວ.
ເຈົ້າໜ້າທີ່ບໍລິສັດທາງລົດໄຟລາວ-ຈີນຈຳກັດກ່າວວ່າ, ພາຍຫຼັງເກີດການແຜ່ລະບາດຂອງພະຍາດໂຄວິດ-19 ແລ້ວ, ໜ່ວຍງານຕ່າງໆທີ່ເຂົ້າຮ່ວມການກໍ່ສ້າງ ໄດ້ຈັດຕັ້ງປະຕິບັດມາດຕະການປ້ອງກັນແລະຄວບຄຸມພະຍາດ, ສັບຊ້ອນແຜນການກໍ່ສ້າງໃຫ້ດີຂຶ້ນ, ຈັດສັນຊັບພະຍາກອນກໍ່ສ້າງຕາມຫຼັກວິທະຍາສາດ ແລະ ຊຸກຍູ້ການກໍ່ສ້າງຢ່າງຫ້າວຫັນ. ປັດຈຸບັນ, ການສ້າງຂົວ, ອຸມົງ ແລະ ພື້ນທາງເປັນຕົ້ນ ລ້ວນແຕ່ໄດ້ກ້າວເຂົ້າສູ່ໄລຍະສຸດທ້າຍແລ້ວ, ການປູລາງ, ການຕິດຕັ້ງສາຍໄຟຟ້າ ແລະ ການສ້າງສະຖານີຕ່າງໆ ໄດ້ເລີ່ມປະຕິບັດງານຢ່າງຮອບດ້ານ, ໃນນັ້ນ, ການປູລາງລົດໄຟໄດ້ກ້າວເຂົ້າສູ່ໄລຍະທີ່ສຳຄັນແລ້ວ.
ທາງລົດໄຟລາວ-ຈີນເປັນໂຄງການພື້ນຖານໂຄງລ່າງຕາມຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ຂອງຈີນ ເຊື່ອມຕໍ່ກັບຍຸດທະສາດ “ຫັນປະເທດບໍ່ມີທາງອອກສູ່ທະເລເປັນປະເທດເຊື່ອມໂຍງເຊື່ອມຈອດຂອງພາກພື້ນ” ຂອງປະເທດລາວ, ຈຸດຈາກດ່ານບໍ່ຫານ-ບໍ່ເຕັນ ທາງຊາຍແດນລາວ-ຈີນ ເນັ່ງໄປຫານະຄອນຫຼວງວຽງຈັນ, ມີຄວາມຍາວທັງໝົດ 414 ກິໂລແມັດ. ທາງລົດໄຟສາຍນີ້ໄດ້ໃຊ້ມາດຕະຖານຄຸ້ມຄອງ ແລະ ມາດຕະຖານເຕັກນິກຂອງຈີນທັງໝົດ, ຄວາມໄວໃນການອອກແບບມີເຖິງ 160 ກິໂລແມັດຕໍ່ຊົ່ວໂມງ, ເປັນທາງລົດໄຟທີ່ໃຊ້ໄຟຟ້າທີ່ຂົນສົ່ງສິນຄ້າ ແລະ ຂົນສົ່ງຜູ້ໂດຍສານຮ່ວມກັນ. ທາງລົດໄຟໄດ້ເລີ່ມລົງມືກໍ່ສ້າງມາແຕ່ເດືອນທັນວາປີ 2016 ແລະ ມີແຜນຈະສ້າງໃຫ້ສຳເລັດໃນເດືອນທັນວາປີ 2021.