ເນື່ອງໃນໂອກາດວັນພະຍາບານສາກົນທີ່ໝູນວຽນມາເຖິງໃນວັນທີ 11 ພຶດສະພານີ້, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ, ປະທານປະເທດ, ປະທານຄະນະກຳມະການການທະຫານສູນກາງຈີນ ໄດ້ຕາງໜ້າໃຫ້ສູນກາງພັກ, ສະແດງຄວາມຍ້ອງຍໍຊົມເຊີຍແລະສົ່ງຄວາມຢື້ຢາມຖາມຂ່າວທີ່ຈິງໃຈໄປເຖິງພະຍາບານອັນໄພສານໃນທົ່ວປະເທດຈີນ!
ທ່ານສີຈິ້ນຜິງກ່າວວ່າ, ພາຍຫຼັງເກີດການແຜ່ລະບາດຂອງພະຍາດໂຄວິດ-19 ແລ້ວ, ພະຍາບານອັນໄພສານໄດ້ສູ້ຊົນຢູ່ແນວໜ້າໃນການຕໍ່ສູ້ປ້ອງກັນແລະຄວບຄຸມການແຜ່ລະບາດຂອງພະຍາດທັງຢູ່ພາຍໃນປະເທດ ແລະ ຕ່າງປະເທດ, ໄດ້ປະຕິບັດຕາມນ້ຳໃຈສູງສົ່ງທີ່ເຄົາລົບຊີວິດ, ກອບກູ້ຊີວິດ, ຊ່ວຍເຫຼືອຜູ້ເຈັບປ່ວຍ, ອຸທິດຕົນ, ເສຍສະຫຼະ ແລະ ມີຄວາມຮັກແພງຂ້າມພົມແດນ ດ້ວຍການກະທຳຕົວຈິງ.
ທ່ານສີຈິ້ນຜິງກ່າວເນັ້ນວ່າ, ວຽກງານພະຍາບານແມ່ນພາກສ່ວນສຳຄັນໃນພາລະກິດສາທາລະນະສຸກ. ທົ່ວສັງຄົມຄວນເຂົ້າໃຈ ແລະ ໃຫ້ການສະໜັບສະໜູນພະຍາບານ. ຫວັງວ່າ, ພະຍາບານທັງຫຼາຍຈະສືບທອດມູນເຊື້ອທີ່ດີງາມ, ພະຍາຍາມຕື່ມອີກ, ປະກອບສ່ວນຢ່າງບໍ່ຢຸດຢັ້ງໃຫ້ຫຼາຍກວ່າເກົ່າ ເພື່ອເສີມສ້າງສຸຂະພາບທີ່ແຂງແຮງໃຫ້ກັບປະຊາຊົນຈີນ ແລະ ປົກປັກຮັກສາຄວາມປອດໄພດ້ານສາທາລະນະສຸກຂອງໂລກ.