ປັດຈຸບັນ, ຈຳນວນຜູ້ຖືກບົ່ງມະຕິເປັນພະຍາດໂຄວິດ-19 ຢູ່ອາເມຣິກາໄລ່ລວມແລ້ວມີເກືອບ 1.350.000 ຄົນ, ຈຳນວນຜູ້ເສຍຊີວິດຍ້ອນເປັນພະຍາດໄລ່ລວມແລ້ວມີຫຼາຍກວ່າ 80 ພັນຄົນ. ຂະນະດຽວກັນ, ໃນເດືອນເມສາຜ່ານມາ, ການປະກອບອາຊີບຂອງປະຊາກອນອາເມຣິກາທີ່ບໍ່ແມ່ນຂະແໜງກະສິກຳໄດ້ຫຼຸດລົງ 20.500.000 ຄົນ, ໄດ້ເຮັດໃຫ້ຕຳແໜ່ງງານທີ່ເພີ່ມຂຶ້ນໃນ 10 ປີຜ່ານມາສູນຫາຍໄປພາຍໃນ 1 ເດືອນ. ໜັງສືພິມເດີວໍຊິງຕັນໂພສ໌ຂອງອາເມຣິກາໄດ້ພິມບົດວິເຄາະໂດຍຂຽນວ່າ: ອາເມຣິກາພວມປະເຊີນກັບວິກິດການທາງເສດຖະກິດທີ່ບໍ່ເຄີຍເຫັນມາກ່ອນໃນເກືອບ 100 ປີຜ່ານມາ.
ທ່ານ ຈອນ ໂຣສ໌ ອະດີດຫົວໜ້າອົງການນະໂຍບາຍທຸລະກິດແລະເສດຖະກິດລອນດອນຂອງອັງກິດໄດ້ຊີ້ໃຫ້ເຫັນໂດຍກົງວ່າ: “ ‘ການຕໍ່ຕ້ານຈີນຕາມລຳພັງໃຈ’ ຈະເຮັດໃຫ້ການແຜ່ລະບາດຂອງພະຍາດໂຄວິດ-19 ຢູ່ຝ່າຍຕາເວັນຕົກຕ້ອງຕົກຢູ່ໃນມະຫັນຕະໄພທີ່ຊຸດໂຊມລົງ. ໃນໂອກາດທີ່ດີທີ່ສຸດຂອງການປ້ອງກັນແລະຄວບຄຸມການແຜ່ລະບາດຂອງພະຍາດໂຄວິດ-19, ອາເມຣິກາບໍ່ໄດ້ພະຍາຍາມຢ່າງສຸດຂີດເພື່ອປ້ອງກັນການແຜ່ລະບາດຂອງພະຍາດໂຄວິດ-19 ຢູ່ພາຍໃນປະເທດຕົນ, ຫາກຄິດແຕ່ຈະໃສ່ຮ້າຍປ້າຍສີແລະໂຈມຕີປະເທດຈີນຢ່າງດຽວ, ທ່ານ ໄມ ພົມເພວ ແລະນັກການເມືອງຄົນອື່ນໆແຮ່ງໄດ້ຖືເອົາເຊື້ອພະຍາດໄປກ່ຽວຂ້ອງກັບປະເທດຈີນ, ປ່າວຖ້ອຍຄວາມລັດທິຊາດນິຍົມ, ຍຸແຍ່ສ້າງຄວາມຄຽດຊັງແລະເປັນປໍລະປັກກັນ,ທ້າທາຍຂີດຈຳກັດດ້ານຄຸນນະທຳຂອງຄວາມເປັນມະນຸດ.”
ບຸກຄົນທີ່ມີຊື່ສຽງໃນສາກົນຊີ້ໃຫ້ເຫັນວ່າ: ພູມສາດການເມືອງທີ່ບິດເບືອນຄວາມຈິງໃນປັດຈຸບັນຂອງວໍຊິງຕັນ ພວມເຮັດໃຫ້ການແຜ່ລະບາດຂອງພະຍາດໂຄວິດ-19 ທີ່ເປັນໄພທາງທຳມະຊາດໄດ້ກັບກາຍເປັນເຄາະຮ້າຍທີ່ສ້າງຂຶ້ນດ້ວຍຄົນຫຼາຍກວ່າ. ທ່ານ ບຣີຕາ ເຈເວວ ນັກຄົ້ນຄວ້າຂອງຄະນະພະຍາດຕິດແປດວິທະຍາແລະພະຍາດລະບາດຂອງວິທະຍາໄລວິທະຍາສາດ, ເຕັກໂນໂລຊີແລະການແພດຈັກກະພັດລອນດອນໄດ້ພິມບົດຄວາມລົງໜັງສືພິມນິວຢອກທ້າມສ໌ຂອງອາເມຣິກາໂດຍຂຽນວ່າ: ຖ້າຂໍ້ກຳນົດກ່ຽວກັບການກັກບໍລິເວນໃນເຮືອນຂອງລັດຖະບານອາເມຣິກາສາມາດປະຕິບັດໄດ້ມາແຕ່ວັນທີ 2 ມີນາປີນີ້ຫາກບໍ່ແມ່ນລ່ວງກາຍໄປເຖິງ 2 ອາທິດຄືວັນທີ 16 ມີນາ, ກໍຈະສາມາດສະກັດກັ້ນບໍ່ໃຫ້ມີຜູ້ເສຍຊີວິດຍ້ອນເປັນພະຍາດໄດ້ເຖິງ 90%; ຖ້າສາມາດປະຕິບັດລ່ວງໜ້າໄດ້ 1 ອາທິດກໍ່ຈະສາມາດຫຼຸດຈຳນວນຜູ້ເສຍຊີວິດໄດ້ 60%.
ຂະບວນວິວັດຂອງການພົວພັນລະຫວ່າງຈີນ-ອາເມຣິກາໃນໄລຍະ 40 ກວ່າປີຜ່ານມາໄດ້ຢືນຢັນວ່າ, ການຮ່ວມມືແມ່ນທາງເລືອກທີ່ຖືກຕ້ອງພຽງໜຶ່ງດຽວ. ໃນຊູ່ມື້ນີ້ທີ່ເປັນສະຕະວັດທີ 21, ຖ້າປະຊາຊົນອາເມຣິກາປ່ອຍໃຫ້ນັກການເມືອງຕ້ານປະເທດຈີນຈຳນວນໜ້ອຍປະຕິບັດນະໂຍບາຍຕາມລັດທິເນັກຄາທີຊຶມ McCarthyism ຫຼືລັດທິຕ້ານຄອມມູນິດ, ຈະເຮັດໃຫ້ແຕ່ລະຄົນມີຄວາມຢ້ານກົວ, ຈະທຳລາຍຜົນປະໂຫຍດຂອງຕົນແລະຜູ້ອື່ນ,ໃນທີ່ສຸດກໍຈະສະແດງໃຫ້ເຫັນເຖິງຄວາມເສົ້າສະຫຼົດໃຈຢູ່ອາເມຣິກາເອງ.