ຄະນະປະຈຳກົມການເມືອງສູນກາງພັກກອມມູນິດຈີນໄດ້ໄຂກອງປະຊຸມໃນວັນທີ 14 ພຶດສະພານີ້ ເພື່ອວິເຄາະສະພາບການປ້ອງກັນແລະຄວບຄຸມພະຍາດໂຄວິດ-19 ທັງພາຍໃນແລະຕ່າງປະເທດ ທັງຄົ້ນຄວ້າ, ວາງແຜນ ແລະ ຊຸກຍູ້ໃຫ້ຈັດຕັ້ງປະຕິບັດມາດຕະການປ້ອງກັນແລະຄວບຄຸມພະຍາດຕາມສະພາວະປົກກະຕິຢ່າງມີປະສິດທິຜົນ ແລະ ຄົ້ນຄວ້າເພື່ອຍົກສູງຄວາມໝັ້ນທ່ຽງແລະຄວາມສາມາດການແຂ່ງຂັນຂອງຕ່ອງໂສ້ອຸດສາຫະກຳ ແລະ ຕ່ອງໂສ້ການສະໜອງ. ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ໄດ້ເປັນປະທານກອງປະຊຸມ ທັງໄດ້ໃຫ້ທິດຊີ້ນຳທີ່ສຳຄັນ.
ທ່ານກ່າວວ່າ: ປັດຈຸບັນ, ການປ້ອງກັນແລະຄວບຄຸມພະຍາດໃນທົ່ວປະເທດແມ່ນ ຢູ່ໃນສະພາບທີ່ດີໂດຍລວມ, ແຕ່ໃນຂະນະດຽວກັນ, ການແຜ່ລະບາດຂອງພະຍາດຢູ່ຕ່າງປະເທດພັດຕົກຢູ່ໃນສະພາບທີ່ຂ້ຽວຂາດແລະສັບສົນ, ການປ້ອງກັນບໍ່ໃຫ້ການແຜ່ລະບາດຂອງພະຍາດຢູ່ພາຍໃນປະເທດຮ້າຍແຮງຂຶ້ນອີກນັ້ນຍັງເປັນໜ້າທີ່ອັນລຳບາກແລະໜັກໜ່ວງ. ຕ້ອງເດັດດ່ຽວຜ່ານຜ່າແນວຄິດທີ່ລະເຫຼີງ, ອາລົມເບື່ອໜ່າຍຕໍ່ການຕໍ່ສູ້ກັບພະຍາດ, ຄິດເພິ່ງໂຊກຊາຕາ ແລະ ຈິດໃຈອ່ອນໄຫວຄອນແຄນ, ຕ້ອງເອົາໃຈໃສ່ວຽກງານໃນການປ້ອງກັນບໍ່ໃຫ້ມີການແຜ່ລະບາດຈາກຕ່າງປະເທດ ແລະ ປ້ອງກັນບໍ່ໃຫ້ພະຍາດແຜ່ລະບາດຮ້າຍແຮງຂຶ້ນອີກພາຍໃນປະເທດ, ເດັດຂາດບໍ່ໃຫ້ຜົນສຳເລັດໃນການປ້ອງກັນແລະຄວບຄຸມການແຜ່ລະບາດຂອງພະຍາດທີ່ຍາດມາໄດ້ບໍ່ແມ່ນງ່າຍນັ້ນປະສົບກັບຄວາມຫຼົ້ມເຫຼວ, ຮັບປະກັນເຮັດສຳເລັດໜ້າທີ່ເພື່ອບັນລຸເປົ້າໝາຍໃນບັ້ນລຶບລ້າງຄວາມທຸກຍາກຂັ້ນສຸດທ້າຍ ແລະ ສ້າງສັງຄົມທີ່ອີ່ມໜຳສຳລານໃຫ້ສຳເລັດຢ່າງຮອບດ້ານ.