ຕາມຂ່າວCRI：ໃນຕອນແລງວັນທີ 20 ພຶດສະພານີ້, ທ່ານສີຈິ້ນຜີງ, ປະທານປະເທດຈີນໄດ້ສົນທະນາທາງໂທລະສັບກັບທ່ານວິນ ໝີນ, ປະທານາທິບໍດີມຽນມາ.
ທ່ານສີຈິ້ນຜີງຊີ້ອອກວ່າ, ພາຍຫຼັງຈີນເກີດການແຜ່ລະບາດພະຍາດໂຄວິດ-19 , ລັດຖະບານແລະອົງການຕ່າງໆໃນສັງຄົມມຽນມາໄດ້ໃຫ້ການຊ່ວຍເຫຼືອແກ່ຈີນ. ຈີນກໍ່ໄດ້ບໍລິຈາກວັດຖຸຕໍ່ຕ້ານພະຍາດຫຼາຍຊຸດໃຫ້ແກ່ມຽນມາ, ແລະໄດ້ສົ່ງໜ່ວຍຊ່ຽວຊານການແພດ 2 ໜ່ວຍງານໄປຊ່ວຍມຽນມາຕ້ານພະຍາດ. ເຊິ່ງນີ້ໄດ້ສະແດງໃຫ້ເຫັນເຖິງມິດຕະພາບແບບອ້າຍນ້ອງກັນທີ່ຮ່ວມສຸກຮ່ວມທຸກແລະຕ່າງຊ່ວຍເຫຼືອເຊິ່ງກັນແລະກັນລະຫວ່າງປະຊາຊົນຂອງສອງປະເທດ, ໄດ້ສ່ອງແສງ ນ້ຳໃຈຄູ່ຮ່ວມຊາຕາກຳລະຫວ່າງຈີນ-ມຽນມາ.
ທ່ານສີຈິ້ນຜີງກ່າວເນັ້ນວ່າ, ປີນີ້ແມ່ນປີສ້າງຕັ້ງສາຍພົວພັນທາງການທູດລະຫວ່າງຈີນ-ມຽນມາຄົບຮອບ 70 ປີ, ຫວັງວ່າສອງຝ່າຍຈະປະສານສົມທົບກັນຢ່າງແໜ້ນແຟ້ນ, ຈັດຕັ້ງປະຕິບັດຜົນສຳເລັດທີ່ໄດ້ຮັບໃນການຢ້ຽມຢາມເຊິ່ງກັນແລະກັນຂັ້ນສູງລະຫວ່າງສອງປະເທດ. ບົນພື້ນຖານປ້ອງກັນແລະຄວບຄຸມສະພາບພະຍາດເປັນຢ່າງດີ, ສອງຝ່າຍຄວນຊຸກຍູ້ການໄປມາຫາສູ່ກັນແລະການຮ່ວມມືໃນທຸກຂົງເຂດໃຫ້ກ້າວໄປໜ້າຢ່າງໜັກແໜ້ນ, ເລັ່ງລັດໃຫ້ໂຄງການແລວທາງເສດຖະກິດໄດ້ຮັບຄວາມຄືບໜ້າຢ່າງຕັ້ງໜ້າ.
ທ່ານວິນ ໝີນກ່າວວ່າ, ຂອບໃຈຕໍ່ຈີນທີ່ໄດ້ໃຫ້ການສະໜັບສະໜູນແລະການຊ່ວຍເຫຼືອໃນດ້ານການຕໍ່ຕ້ານພະຍາດແກ່ມຽນມາກໍຄື WHO ແລະປະເທດອື່ນໆ. ມຽນມາຍິນດີຮ່ວມກັນກັບຈີນ, ຕັ້ງໜ້າຈັດຕັ້ງປະຕິບັດຜົນສຳເລັດທີ່ໄດ້ຮັບໃນການຢ້ຽມຢາມມຽນມາຂອງທ່ານສີຈິ້ນຜີງໃນເດືອນມັງກອນປີ 2020, ສືບຕໍ່ລົງເລິກມິດຕະພາບແບບອ້າຍນ້ອງກັນແລະການຮ່ວມມືໃນແຕ່ລະຂົງເຂດ, ຊຸກຍູ້ໃຫ້ກາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງມຽນມາ-ຈີນໄດ້ຮັບການພັດທະນາຢ່າງຕໍ່ເນື່ອງ.