ວັນທີ 29 ພຶດສະພານີ້, ເນື່ອງໃນໂອກາດ “ວັນຜູ້ເຮັດວຽກດ້ານວິທະຍາສາດເຕັກໂນໂລຊີທົ່ວປະເທດຈີນ” ຄັ້ງທີ 4 ຈະໝູນວຽນມາເຖິງ, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ປະທານປະເທດຈີນ ປະທານຄະນະກຳມະການການທະຫານສູນກາງຈີນໄດ້ສົ່ງຈົດໝາຍຕອບກັບເຖິງຜູ້ຕາງໜ້າຜູ້ເຮັດວຽກດ້ານວິທະຍາສາດເຕັກໂນໂລຊີ 25 ທ່ານເຊິ່ງລວມທັງ ທ່ານຢວນລົງຜິງ ທ່ານຈົ່ງນານສ່ານ ທ່ານເຢ້ເຜີຍຈ້ຽນ ແລະ ທ່ານອື່ນໆ, ເພື່ອສະແດງຄວາມຢື້ຢາມຖາມຂ່າວຢ່າງຈິງໃຈຕໍ່ເຂົາເຈົ້າ ພ້ອມດ້ວຍຜູ້ເຮັດວຽກດ້ານວິທະຍາສາດເຕັກໂນໂລຊີທົ່ວປະເທດຈີນ.
ເພື່ອໃຫ້ກຳລັງໃຈແກ່ຜູ້ເຮັດວຽກດ້ານວິທະຍາສາດເຕັກໂນໂລຊີທົ່ວປະເທດເພື່ອແບກຫາບພາລະກຳຂອງຍຸກສະໄໝ, ເດືອນພະຈິກປີ 2016, ລັດຖະບານຈີນໄດ້ອະນຸມັດກຳນົດໃຫ້ວັນທີ 30 ພຶດສະພາຂອງທຸກປີເປັນ “ວັນຜູ້ເຮັດວຽກດ້ານວິທະຍາສາດເຕັກໂນໂລຊີທົ່ວປະເທດຈີນ”. ຫວ່າງກ່ອນນີ້ບໍ່ດົນ, ຜູ້ຕາງໜ້າຜູ້ເຮັດວຽກດ້ານວິທະຍາສາດເຕັກໂນໂລຊີ 25 ທ່ານເຊິ່ງລວມທັງ ທ່ານຢວນລົງຜິງ ທ່ານຈົ່ງນານສ່ານ ທ່ານເຢ້ເຜີຍຈ້ຽນ ແລະ ທ່ານອື່ນໆໄດ້ສົ່ງຈົດໝາຍເຖິງທ່ານສີຈິ້ນຜິງ, ເພື່ອສະແດງຄວາມຕັດສິນໃຈຂອງຕົນທີ່ຈະສ້າງຜົນງານທີ່ດີໃນພຶດຕິກຳປະດິດສ້າງໃໝ່ ແລະສ້າງພາລະກິດໃໝ່ໃນຍຸກໃໝ່.
ຈົດໝາຍຕອບກັບຂອງທ່ານສີຈິ້ນຜິງມີຄືດັ່ງນີ້:
ຈົດໝາຍຕອບກັບຂອງທ່ານສີຈິ້ນຜິງ ຕໍ່ທ່ານຢວນລົງຜິງ ທ່ານຈົ່ງນານສ່ານ ທ່ານເຢ້ເຜີຍຈ້ຽນ ແລະ ຜູ້ຕາງໜ້າຜູ້ເຮັດວຽກດ້ານວິທະຍາສາດເຕັກໂນໂລຊີທ່ານອື່ນໆທັງໝົດ 25 ທ່ານ
ເຖິງທ່ານຢວນລົງຜິງ ທ່ານຈົ່ງນານສ່ານ ທ່ານເຢ້ເຜີຍຈ້ຽນ ແລະອື່ນໆ ທັງໝົດ 25 ສະຫາຍ:
ສະບາຍດີ, ຂ້າພະເຈົ້າໄດ້ຮັບຈົດໝາຍຂອງພວກສະຫາຍແລ້ວ. ການຄົ້ນຄິດ ແລະ ພຶດຕິກຳຂອງພວກສະຫາຍໃນການປະດິດສ້າງໃໝ່ໄດ້ສະແດງໃຫ້ເຫັນຄວາມຕັດສິນໃຈທີ່ຈະຕອບແທນບຸນຄຸນປະເທດຊາດຂອງຜູ້ເຮັດວຽກດ້ານວິທະຍາສາດເຕັກໂນໂລຊີອັນໄພສານຂອງຈີນໃນຍຸກໃໝ່. ເນື່ອງໃນໂອກາດ “ວັນຜູ້ເຮັດວຽກດ້ານວິທະຍາສາດເຕັກໂນໂລຊີທົ່ວປະເທດຈີນ” ໝູນວຽນມາເຖິງນີ້, ຂ້າພະເຈົ້າຂໍສະແດງຄວາມຢື້ຢາມຖາມຂ່າວຢ່າງຈິງໃຈຕໍ່ພວກສະຫາຍ ກໍຄືຜູ້ເຮັດວຽກດ້ານວິທະຍາສາດເຕັກໂນໂລຊີໃນທົ່ວປະເທດ!
ການປະດິດສ້າງໃໝ່ແມ່ນກຳລັງຂັບເຄື່ອນອັນດັບໜຶ່ງເພື່ອຊຸກຍູ້ການພັດທະນາ, ວິທະຍາສາດເຕັກໂນໂລຊີແມ່ນອາວຸດອັນເຂັ້ມແຂງທີ່ເອົາຊະນະຄວາມຫຍຸ້ງຍາກ. ເມື່ອຜະເຊີນໜ້າກັບການແຜ່ລະບາດຂອງພະຍາດໂຄວິດ-19ທີ່ເກີດຂຶ້ນຢ່າງກະທັນຫັນ,ຜູ້ເຮັດວຽກດ້ານວິທະຍາສາດເຕັກໂນໂລຊີທົ່ວປະເທດໄດ້ເປັນເຈົ້າການສູ້ຊົນຜ່ານຜ່າຄວາມຫຍຸ້ງຍາກ, ສຸມທຸກຄວາມພະຍາຍາມໃນດ້ານການປິ່ນປົວຄົນເຈັບ ໄດ້ຄົ້ນຄວ້າພັດທະນາຢາວັກແຊັງ, ຮັບປະກັນດ້ານອຸປະກອນ ການນຳໃຊ້ເຕັກໂນໂລຊີຂໍ້ມູນໃຫຍ່ ແລະ ອື່ນໆຢ່າງບໍ່ລົດລະທັງເວັນທັງຄືນ, ເຊິ່ງເປັນການຮັບປະກັນດ້ານວິທະຍາສາດເຕັກໂນໂລຊີໃນການຕ້ານກັບພະຍາດ. ຫວັງວ່າຜູ້ເຮັດວຽກດ້ານວິທະຍາສາດເຕັກໂນໂລຊີທົ່ວປະເທດຈະເສີມຂະຫຍາຍມູນເຊື້ອອັນດີງາມ, ຮັກສາຄວາມໝັ້ນໃຈຢ່າງໜັກແໜ້ນໃນການປະດິດສ້າງໃໝ່, ອອກແຮງຄົ້ນຄວ້າເຕັກໂນໂລຊີໃຈກາງ ແລະ ສຳຄັນໃຫ້ປະກົດຜົນເປັນຈິງ, ຊຸກຍູ້ການປະສົມປະສານການຜະລິດ ການສຶກສາ ແລະ ການຄົ້ນຄວ້າໃຫ້ເຊື່ອມໂຍງເຂົ້າກັນຢ່າງເລິກເຊິ່ງ, ພາກັນກ້າວຂຶ້ນສູ່ຈອມພູສູງສຸດແຫ່ງວິທະຍາສາດເຕັກໂນໂລຊີຢ່າງກ້າຫານ, ປະກອບສ່ວນຫຼາຍກວ່າເກົ່າເພື່ອສ້າງປະເທດເຮົາໃຫ້ເປັນປະເທດເຂັ້ມແຂງດ້ານວິທະຍາສາດເຕັກໂນໂລຊີໃນໂລກ.