ຕອນບ່າຍວັນທີ 2 ມິຖຸນານີ້, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ປະທານປະເທດຈີນ ປະທານຄະນະກຳມະການການທະຫານສູນກາງຈີນໄດ້ເປັນປະທານຈັດກອງປະຊຸມສຳມະນາຜູ້ຊ່ຽວຊານ,ນັກວິຊາການ ທັງປະກອບຄຳເຫັນທີ່ສຳຄັນ. ທ່ານກ່າວເນັ້ນວ່າ: ຄວາມປອດໄພຂອງປະຊາຊົນແມ່ນພື້ນຖານຂອງຄວາມໝັ້ນຄົງແຫ່ງຊາດ. ຕ້ອງເພີ່ມທະວີເພດານຕ່ຳສຸດທາງດ້ານແນວຄິດ, ເພີ່ມສະຕິການເປັນຫ່ວງນຳໄພອັນຕະລາຍ, ປ້ອງກັນຄວາມສ່ຽງທີ່ຮ້າຍແຮງທີ່ມີຕໍ່ຂົງເຂດສາທາລະນະສຸກໃນທຸກເວລາ. ມີແຕ່ສ້າງລະບົບສາທາລະນະສຸກທີ່ເຂັ້ມແຂງ, ບູລະນະກົນໄກເຕືອນໄພລ່ວງໜ້າ, ຍົກສູງຄວາມສາມາດປ້ອງກັນຄວບຄຸມ ແລະ ປິ່ນປົວຄົນເຈັບຢ່າງຮອບດ້ານ, ສ້າງເຄືອຂ່າຍປ້ອງກັນໃຫ້ໜາແໜ້ນ,ສ້າງກຳແພງ ຫລື ເຂັ້ມງວດຕໍ່ການກັກບໍລິເວນໃຫ້ໜັກແໜ້ນ, ຈຶ່ງຈະສາມາດໃຫ້ການຮັບປະກັນທີ່ແຂງແຮງຕໍ່ການປົກປ້ອງສຸຂະພາບຂອງປະຊາຊົນ.
ໃນກອງປະຊຸມສຳມະນາ, ຫຼັງຈາກຮັບຟັງຄວາມຄິດເຫັນຂອງຜູ້ຊ່ຽວຊານທຸກທ່ານຢ່າງຕັ້ງໃຈແລ້ວ, ທ່ານສີຈິ້ນຜິງໄດ້ປະກອບຄຳເຫັນທີ່ສຳຄັນ. ທ່ານກ່າວວ່າ: ເມື່ອຜະເຊີນໜ້າກັບພະຍາດໂຄວິດ-19 ທີ່ເກີດຂຶ້ນຢ່າງກະທັນຫັນ, ສູນກາງພັກກອມມູນິດຈີນໄດ້ວາງແຜນການລວມຢ່າງເປັນເອກະພາບກັນ, ກຳນົດນະໂຍບາຍຢ່າງເດັດດ່ຽວ, ຍຶດໝັ້ນການຖືເອົາຄວາມປອດໄພດ້ານຊີວິດ ແລະ ສຸຂະພາບຮ່າງກາຍຂອງປະຊາຊົນໄວ້ຢູ່ຖານະສູງສຸດ, ທົ່ວພັກ ທົ່ວກອງທັບ ແລະປະຊາຊົນບັນດາເຜົ່າໃນທົ່ວປະເທດໄດ້ຮ່ວມແຮງຮ່ວມໃຈກັນ, ສຸມທຸກຄວາມພະຍາຍາມ, ນຳໃຊ້ມາດຕະການປ້ອງກັນ ແລະ ຄວບຄຸມທີ່ເຂັ້ມງວດທີ່ສຸດ ຮອບດ້ານທີ່ສຸດ ແລະ ເຖິງຖອງທີ່ສຸດ, ຈຶ່ງເຮັດໃຫ້ບັ້ນປ້ອງກັນ ແລະຄວບຄຸມພະຍາດໃນທົ່ວປະເທດໄດ້ຮັບໝາກຜົນທາງຍຸດທະສາດທີ່ສຳຄັນ. ຜົນສຳເລັດເຫຼົ່ານີ້, ໄດ້ສະແດງໃຫ້ເຫັນເຖິງທ່າແຮງທາງດ້ານການເມືອງອັນພົ້ນເດັ່ນພາຍໃຕ້ການນຳພາຂອງພັກກອມມູນິດຈີນ ແລະ ລະບອບສັງຄົມນິຍົມຂອງຈີນ, ສ່ອງແສງເຖິງກຳລັງສັງລວມແຫ່ງຊາດຈີນທີ່ນັບມື້ນັບເຂັ້ມແຂງຂຶ້ນນັບແຕ່ການປະຕິຮູບ ແລະ ເປີດປະຕູສູ່ພາຍນອກເປັນຕົ້ນມາ, ທັງສະແດງໃຫ້ເຫັນເຖິງກຳລັງເຂັ້ມແຂງທີ່ທົ່ວພັກ ທົ່ວກອງທັບ ແລະ ປະຊາຊົນບັນດາເຜົ່າໃນທົ່ວປະເທດໄດ້ຮ່ວມແຮງຮ່ວມໃຈກັນຜ່ານຜ່າຄວາມຫຍຸ້ງຍາກ.
ທ່ານສີຈິ້ນຜິງກ່າວເນັ້ນວ່າ: ສຸຂະພາບຂອງມະນຸດແມ່ນພື້ນຖານຂອງຄວາມກ້າວໜ້າ ແລະ ຄວາມສີວິໄລທາງສັງຄົມ. ໃນຂະບວນການສູ້ຊົນເພື່ອບັນລຸເປົ້າ ໝາຍ “2 ເຫດການປະຫວັດສາດ ທີ່ສຳຄັນ 100 ປີ”, ການພັດທະນາພາລະກິດສາທາລະນະສຸກໄດ້ຄອງຖານະພື້ນຖານຢ່າງສະເໝີຕົ້ນສະເໝີປາຍ, ເຊື່ອມຈອດກັບຍຸດທະສາດ ລວມຂອງຊາດຢ່າງແໜ້ນແຟ້ນ, ແລະໄດ້ເສີມຂະຫຍາຍບົດບາດຄໍ້າຊູທີ່ສຳຄັນ.
ທ່ານສີຈິ້ນຜິງຊີ້ໃຫ້ເຫັນວ່າ: ລະບົບປ້ອງກັນແລະຄວບຄຸມພະຍາດເປັນສິ່ງຮັບປະກັນອັນສຳຄັນໃນການປົກປ້ອງສຸຂະພາບຂອງປະຊາຊົນ, ຮັບປະກັນຄວາມປອດໄພດ້ານສາທາລະນະສຸກແລະຮັກສາຄວາມໝັ້ນຄົງດ້ານເສດຖະກິດສັງຄົມ. ຕ້ອງສຸມໃສ່ການປ້ອງກັນພະຍາດຢ່າງຖືກຕ້ອງກັບເປົ້າໝາຍແລະມີປະສິດທິຜົນຫຼາຍກວ່າເກົ່າ, ເພີ່ມທະວີການປະຕິຮູບໃນດ້ານຕ່າງໆເປັນຕົ້ນແມ່ນປັບປຸງໂຄງປະກອບແລະກົນໄກໃຫ້ສົມເຫດສົມຜົນ, ກຳນົດບົດບາດແລະໜ້າທີ່ໃຫ້ຈະແຈ້ງ,ຍົກສູງຄວາມສາມາດດ້ານວິຊາການແລະອື່ນໆ.
ທ່ານສີຈິ້ນຜິງຊີ້ອອກວ່າ: ວິທະຍາສາດເຕັກນິກເປັນອາວຸດທີ່ແຫຼມຄົມຂອງມະນຸດໃນການຕໍ່ຕ້ານກັບພະຍາດ, ມະນຸດສາມາດເອົາຊະນະໄພພິບັດແລະພະຍາດຮ້າຍແຮງໄດ້ ແມ່ນບໍ່ສາມາດປາສະຈາກການພັດທະນາດ້ານວິທະຍາສາດແລະການປະດິດສ້າງດ້ານເຕັກໂນໂລຊີໄດ້. ຕ້ອງເພີ່ມຊັບພະຍາກອນດ້ານວິທະຍາສາດເຕັກນິກເຂົ້າໃນຂົງເຂດສາທາລະນະສຸກແລະສຸຂະພາບ, ສຸມກຳລັງເຂົ້າໃນການຄົ້ນຄວ້າວິທະຍາສາດເຕັກນິກແກນກາງທີ່ສຳຄັນ, ເສີມຂະຫຍາຍທ່າແຮງດ້ານລະບຽບການແຫ່ງການປະຕິບັດງານດ້ວຍການເຕົ້າໂຮມທຸກກຳລັງໃນທົ່ວປະເທດ. ຕ້ອງລົງເລິກການປະຕິຮູບໂຄງປະກອບແລະກົນໄກພັດທະນາຊັບພະຍາກອນມະນຸດດ້ານການຄົ້ນຄວ້າວິທະຍາສາດ, ປັບປຸງກົນໄກຄົ້ນຫາ,ບຳລຸງສ້າງແລະກະຕຸກຊຸກຍູ້ນັກວິທະຍາສາດທາງຍຸດທະສາດແລະຜູ້ມີຄວາມຮູ້ຄວາມສາມາດດ້ານວິທະຍາສາດເຕັກນິກທີ່ມີການປະດິດສ້າງໃໝ່ນັ້ນໃຫ້ສົມບູນກວ່າເກົ່າ, ດຶງດູດຜູ້ມີຄວາມຮູ້ຄວາມສາມາດດີເດັ່ນເຂົ້າສູ່ຖັນແຖວການຄົ້ນຄວ້າວິທະຍາສາດໃຫ້ຫຼາຍກວ່າເກົ່າ, ສ້າງເງື່ອນໄຂໃຫ້ເຂົາເຈົ້າສ້າງຜົນງານທີ່ໂດດເດັ່ນ.
ທ່ານສີຈິ້ນຜິງກ່າວເນັ້ນວ່າ: ນັບແຕ່ເກີດພະຍາດໂຄວິດ-19ເປັນຕົ້ນມາ, ພວກເຮົາໄດ້ຍຶດໝັ້ນໃນທັດສະນະປະຊາຄົມຮ່ວມຊາຕາກຳຂອງມວນມະນຸດ,ຕັ້ງໜ້າປະຕິບັດພັນທະສາກົນ, ຮັດແໜ້ນການຮ່ວມມືບົນຈິດໃຈມິດຕະພາບກັບອົງການອະນາໄມໂລກແລະປະເທດທີ່ກ່ຽວຂ້ອງຢ່າງໃກ້ຊິດ,ເປັນເຈົ້າການແບ່ງປັນຂໍ້ມູນກ່ຽວກັບສະພາບການແຜ່ລະບາດຂອງພະຍາດແລະຂໍ້ມູນດ້ານເຊື້ອພະຍາດ,ກໍຄືບົດຮຽນໃນການປ້ອງກັນແລະຄວບຄຸມພະຍາດກັບປະຊາຄົມໂລກ, ທັງໄດ້ໃຫ້ການຊ່ວຍເຫຼືອດ້ານວັດຖຸຸແລະວິຊາການແກ່ 100 ກວ່າປະເທດແລະອົງການຈັດຕັ້ງສາກົນຕາມຄວາມສາມາດຂອງຕົນເຊິ່ງໄດ້ສ່ອງແສງໃຫ້ເຫັນເຖິງຄວາມຮັບຜິດຊອບຂອງຈີນໃນຖານະເປັນປະເທດໃຫຍ່. ພວກເຮົາຕ້ອງສືບຕໍ່ປະຕິບັດຕາມພັນທະສາກົນ, ເສີມຂະຫຍາຍບົດບາດທີ່ເປັນປະເທດທີ່ສະໜອງວັດຖຸອຸປະກອນຕ້ານພະຍາດໄດ້ຫຼາຍທີ່ສຸດຂອງໂລກ, ຮ່ວມກັນສ້າງປະຊາຄົມສາທາລະນະສຸກຂອງມວນມະນຸດ.