ຕອນຄ່ຳວັນທີ 3 ມິຖຸນານີ້, ທ່ານສີຈິ້ນຜິງ ປະທານປະທດຈີນໄດ້ສົນທະນາກັບທ່ານນາງແອນເຈີລາ ເມີແຄວ ນາຍົກລັດຖະມົນຕີເຢຍລະມັນຜ່ານທາງໂທລະສັບ.
ທ່ານສີຈິ້ນຜິງກ່າວວ່າ: ຈີນສະແດງຄວາມຍ້ອງຍໍຊົມເຊີຍລັດຖະບານເຢຍລະມັນທີ່ໄດ້ຍຶດໝັ້ນຈຸດຢືນທີ່ພາວະວິໄສແລະສົມເຫດສົມຜົນ ແລະມີທ່າທີທີ່ເຄົາລົບວິທະຍາສາດໃນບັນຫາກ່ຽວກັບສະພາບພະຍາດໂຄວິດ-19. ຈີນຍິນດີຮ່ວມກັບເຢຍລະມັນ, ຮ່ວມກັນສະໜັບສະໜູນວຽກງານຂອງອົງການອະນາໄມໂລກ, ຊຸກຍູ້ການຮ່ວມມືສາກົນໃນຂອບອົງການສະຫະປະຊາຊາດ, ກຸ່ມ G20 ແລະອື່ນໆ, ຮ່ວມກັນສະໜັບສະໜູນປະເທດໃນອາຟຼຼິກາເພື່ອຕ້ານກັບພະຍາດ ເພື່ອປະກອບສ່ວນເຂົ້າໃນການຮັກສາຄວາມປອດໄພດ້ານສາທາລະນະສຸກໃນທົ່ວໂລກ.
ທ່ານສີຈິ້ນຜິງກ່າວເນັ້ນວ່າ: ພວກເຮົາຄວນຈັດເອົາວຽກງານການປ້ອງກັນແລະຄວບຄຸມພະຍາດ ແລະວຽກງານການພັດທະນາເສດຖະກິດສັງຄົມໃຫ້ເປັນເອກະພາບກັນ. ເສດຖະກິດຂອງຈີນທີ່ໄດ້ຮັກສາທ່ວງທ່າທີ່ໝັ້ນທ່ຽງໃນການພັດທະນາໄປໃນແງ່ດີ ແລະຈະພັດທະນາໄປໃນແງ່ດີເປັນໄລຍະເວລາຍາວນານນັ້ນບໍ່ມີການປ່ຽນແປງໂດຍພື້ນຖານ. ພວກຂ້າພະເຈົ້າຈະຊຸກຍູ້ການເປີດປະຕູສູ່ພາຍນອກຢ່າງເດັດດ່ຽວໜຽວແໜ້ນ, ເປີດກວ້າງການຮ່ວມມືກັບທົ່ວໂລກ, ຈີນຍິນດີສືບຕໍ່ສ້າງສະພາບແວດລ້ອມທີ່ດີໃຫ້ແກ່ວິສາຫະກິດເຢຍລະມັນເພື່ອເພີ່ມການລົງທຶນຢູ່ຈີນ. ຫວ່າງມໍ່ໆນີ້, “ຊ່ອງທາງຂົນສົ່ງທາງອາກາດທີ່ສະດວກວ່ອງໄວ” ຈີນ-ເຢຍລະມັນ ໄດ້ເປີດບໍລິການຢ່າງເປັນທາງການ, ນີ້ຈະມີຜົນດີຕໍ່ວິສາຫະກິດທີ່ມີຄວາມຕ້ອງການຂອງສອງປະເທດເພື່ອເລັ່ງລັດຟື້ນຟູການເຮັດວຽກແລະການຜະລິດ, ຮັກສາຕ່ອງໂສ້ອຸດສາຫະກຳ ແລະຕ່ອງໂສ້ການສະໜອງຂອງສາກົນໃຫ້ມີຄວາມໝັ້ນທ່ຽງ. ເຊື່ອວ່າການຮ່ວມມືລະຫວ່າງຈີນກັບເຢຍລະມັນຈະສາມາດເສີມຂະຫຍາຍບົດບາດເຂົ້າໃນການຊຸກຍູ້ໃຫ້ທົ່ວໂລກຫຼຸດພົ້ນອອກຈາກສະພາບເສດຖະກິດທີ່ຊຸດໂຊມລົງນັ້ນໂດຍໄວ.
ທ່ານນາງເມີແຄວກ່າວວ່າ: ເຢຍລະມັນເອົາໃຈໃສ່ແຜນການພັດທະນາເສດຖະກິດສັງຄົມທີ່ກອງປະຊຸມສອງສະພາຂອງຈີນຮັບຮອງເອົາແລ້ວ, ຍິນດີຮ່ວມກັນກັບຈີນເຮັດວຽກປ້ອງກັນແລະຄວບຄຸມພະຍາດໃຫ້ດີ ທັງຊຸກຍູ້ການຟື້ນຟູການເຮັດວຽກແລະການຜະລິດ, ສືບຕໍ່ລົງເລິກການຮ່ວມມືດ້ານເສດຖະກິດລະຫວ່າງເຢຍລະມັນ-ຈີນ. ເຢຍລະມັນຍ້ອງຍໍຊົມເຊີຍຢ່າງສູງຕໍ່ທ່ານປະທານສີຈິ້ນຜິງທີ່ໄດ້ປະກາດວ່າ: ຢາວັກແຊງທີ່ຈີນຄົ້ນຄວ້າຜະລິດເອງຈະເປັນຜະລິດຕະພັນສາທາລະນະສຸກທົ່ວໂລກ. ໃນສະພາບການປັດຈຸບັນ, ການເພີ່ມທະວີຄວາມສາມັກຄີສາກົນແລະລັດທິຫຼາຍຝ່າຍມີຄວາມສຳຄັນຫຼາຍຕໍ່ການຕ້ານກັບພະຍາດໃນທົ່ວໂລກ.