ວັນທີ 7 ມິຖຸນານີ້, ຫ້ອງການຖະແຫຼງຂ່າວລັດຖະບານຈີນໄດ້ເຜີຍແຜ່ປື້ມປົກຂາວທີ່ມີຫົວຂໍ້ວ່າ “ການເຄື່ອນໄຫວຂອງຈີນເພື່ອຕ້ານກັບພະຍາດໂຄວິດ-19” ເຊິ່ງເປັນເອກະສານສຳຄັນທີ່ໄດ້ບັນທຶກຂະບວນການຕ້ານກັບພະຍາດທີ່ລຳບາກຂອງຈີນຕາມສະພາບຕົວຈິງ, ມີໂຕໜັງສືປະມານ 37,000 ໂຕ.
ປື້ມປົກຂາວດັ່ງກ່າວລະບຸວ່າ: ພະຍາດໂຄວິດ-19ແມ່ນພະຍາດທີ່ແຜ່ລະບາດຢ່າງໃຫຍ່ໃນທົ່ວໂລກທີ່ໄດ້ສ້າງຜົນກະທົບທີ່ກວ້າງຂວາງທີ່ສຸດໃຫ້ແກ່ມວນມະນຸດ ເຊິ່ງບໍ່ເຄີຍມີມາກ່ອນໃນເກືອບ 100 ປີ. ໂດຍຜະເຊີນໜ້າກັບພະຍາດທີ່ເກີດຂຶ້ນຢ່າງກະທັນຫັນແລະຮ້າຍແຮງ, ຈີນໄດ້ເປີດບັ້ນປ້ອງກັນແລະຄວບຄຸມພະຍາດຢ່າງເດັດຂາດ. ຈີນໄດ້ໃຊ້ທຸກມາດຕະການ, ຍອມເສຍສະຫຼະທຸກສິ່ງຢ່າງ ເພື່ອປິ່ນປົວຄົນເຈັບແລະກອບກູ້ຊີວິດ.
ນັບມາຮອດວັນທີ 31 ພຶດສະພາປີ 2020 ນີ້, ອັດຕາປິ່ນປົວໃຫ້ຫາຍຂາດຂອງຜູ້ຖືກບົ່ງມະຕິເປັນພະຍາດໂຄວິດ-19 ພາຍໃນປະເທດຈີນມີເຖິງ 94,3%. ຂ່າວແຈ້ງວ່າ: ການຢາແລະແພດແຜນຈີນໄດ້ເສີມຂະຫຍາຍບົດຍາດສຳຄັນໃນການຕ້ານພະຍາດຄັ້ງນີ້. ນັບມາຮອດໄລຍະກາງເດືອນເມສາ, ສະຖາບັນແພດແຜນຈີນແຫ່ງຕ່າງໆໄດ້ສົ່ງຊ່ຽວຊານແພດໝໍ 4900 ຄົນໄປສະໜັບສະໜູນແຂວງຫູເປີຍ, ການຢາແລະແພດແຜນຈີນໄດ້ມີສ່ວນຮ່ວມໃນການປິ່ນປົວຄົນເຈັບໄດ້ກວມເຖິງ 92%.
ປື້ມປົກຂາວຍັງລະບຸວ່າ: ຈີນຍຶດໝັ້ນທັດສະນະປະຊາຄົມຮ່ວມຊາຕາກຳຂອງມວນມະນຸດຢ່າງສະເໝີຕົ້ນສະເໝີປາຍ, ແບກຫາບໜ້າທີ່ຮັບຜິດຊອບຂອງປະເທດໃຫຍ່ ໂດຍສູ້ຊົນແບບຄຽງບ່າຄຽງໄຫຼ່ກັບປະເທດອື່ນເພື່ອຮ່ວມກັນຜ່ານຜ່າຄວາມຫຍຸ້ງຍາກ. ນັບມາຮອດປັດຈຸບັນ, ຈີນໄດ້ໃຫ້ການຊ່ວຍເຫຼືອຫຼືກຳລັງໃຫ້ການຊ່ວຍເຫຼືອເພື່ອຕ້ານກັບພະຍາດແກ່ 150 ປະເທດ ແລະ 4 ອົງການຈັດຕັ້ງສາກົນ.