ວັນທີ 7 ມິຖຸນານີ້, ທ່ານສີຈິ້ນຜິງ ເລຂາທິການໃຫຍ່ຄະນະກຳມະກນສູນກາງພັກກອມມູນິດຈີນ, ປະທານປະເທດຈີນ, ປະທານຄະນະກຳມະການການທະຫານສູນກາງຈີນໄດ້ສົ່ງສານຊົມເຊີຍມະຫາວິທະຍາໄລອຸດສາຫະກຳຮາບິນສ້າງຕັ້ງຂຶ້ນຄົບຮອບ 100 ປີ ແລະສະແດງຄວາມຊົມເຊີຍຢ່າງສຸດໃຈຕໍ່ພະນັກງານ, ຄູອາຈານ ແລະນັກສຶກສາ ກໍຄືອະດີດນັກສຶກສາຂອງມະຫາວິທະຍາໄລແຫ່ງນີ້.
ສານຊົມເຊີຍຂອງທ່ານສີຈິ້ນຜິງລະບຸວ່າ: ມະຫາວິທະຍາໄລອຸດສາຫະກຳຮາບິນມີປະຫວັດສາດຍາວນານ. ນັບແຕ່ສປ ຈີນສະຖາປະນາຂຶ້ນເປັນຕົ້ນມາ, ພາຍໃຕ້ການນຳພາຂອງພັກກອມມູນິດຈີນ, ມະຫາວິທະຍາໄລອຸດສາຫະກຳຮາບິນໄດ້ຕັ້ງຫຼັກປັກຖານຢູ່ເຂດພາກຕາເວັນອອກສຽງເໜືອຂອງປະເທດຊາດ, ຮັກຊາດ, ອຸທິດຕົນ ແລະບາກບັ່ນສູ້ຊົນດ້ວຍຄວາມທໍລະຫົດອົດທົນໃນການພັດທະນາພາລະກິດການສຶກສາ, ປະດິດສ້າງອຸປະກອນທີ່ສຳຄັນຂອງຊາດ, ບຳລົງສ້າງຜູ້ມີຄວາມຮູ້ຄວາມສາມາດທີ່ໂດດເດັ່ນຢ່າງຫຼວງຫຼາຍ ເຊິ່ງໄດ້ປະກອບສ່ວນອັນສຳຄັນເພື່ອພັກ ແລະປະຊາຊົນ.
ທ່ານສີຈິ້ນຜິງຫວັງວ່າ: ມະຫາວິທະຍາໄລອຸດສາຫະກຳຮາບິນຈະເລີ່ມຈາກຈຸດເລີ່ມຕົ້ນໃໝ່ຍຶດໝັ້ນທິດທາງສັງຄົມນິຍົມ, ປິ່ນອ້ອມໜ້າທີ່ພື້ນຖານທີ່ບຳລົງສ້າງຜູ້ມີຄວາມຮູ້ຄວາມສາມາດທີ່ມີຄຸນສົມບັດທີ່ດີ, ໃນວຽກງານການສຶກສາ ແລະການຄົ້ນຄວ້າວິທະຍາສາດ ແລະອື່ນໆ, ປະຕິຮູບ ແລະປະດິດສ້າງໃໝ່, ບຸກບືນສູ້ຊົນ, ສະແຫວງຫາຜົນງານອັນໂດດເດັ່ນຢ່າງບໍ່ຢຸດຢັ້ງ, ພະຍາຍາມປະກອບສ່ວນໃໝ່່ໃຫຍ່ຫຼວງກວ່າເກົ່າເຂົ້າໃນການບັນລຸເປົ້າໝາຍສູ້ຊົນ “2 ເຫດການປະຫວັດສາດສຳຄັນ 100 ປີ” ແລະຄວາມໃຝ່ຝັນຂອງຈີນທີ່ຟື້ນຟູຄວາມຈະເລີນຮຸ່ງເຮືອງທີ່ຍິ່ງໃຫຍ່ຂອງປະຊາຊາດຈີນຄືນໃໝ່.
ມະຫາວິທະຍາໄລອຸດສາຫະກຳຮາບິນສ້າງຕັ້ງຂຶ້ນໃນປີ 1920, ໃນປີ 1954 ໄດ້ເຂົ້າສູ່ຖັນແຖວມະຫາວິທະຍາໄລທີ່ສຳຄັນແຫ່ງຊາດຊຸດທຳອິດຈຳນວນ 6 ແຫ່ງທີ່ລັດສຸມໃສ່ພັດທະນາ. ໃນຫຼາຍປີມານີ້, ມະຫາວິທະຍາໄລອຸດສາຫະກຳຮາບິນໄດ້ສ້າງໃຫ້ມີສີສັນພິເສດໃນດ້ານການບຳລົງສ້າງຜູ້ມີຄວາມຮູ້ຄວາມສາມາດທີ່ “ມີພື້ນຖານອັນໝັ້ນແກ່ນ, ເອົາໃຈໃສ່ພຶດຕິກຳຕົວຈິງ, ເຂັ້ມງວດໃນຂະບວນການບຳລຸງສ້າງ ແລະສະແຫວງຫາການປະດິດສ້າງໃໝ່” ເຊິ່ງໄດ້ບຳລົງສ້າງຜູ້ມີຄວາມຮູ້ຄວາມສາມາດທີ່ດີເດັ່ນຈຳນວນຫຼາຍ.