ມື້ທຳອິດທີ່ທ່ານສຳຫຼວດກວດກາວຽກງານຢູ່ເຂດນິງເຊ້ຍ, ສ່ອງແສງເຖິງຄວາມເອົາໃຈໃສ່ຢ່າງເຕັມປ່ຽມ
ວັນທີ 8 ມິຖຸນານີ້, ທ່ານສີຈິ້ນຜິງໄດ້ໄປສຳຫຼວດກວດກາວຽກງານຢູ່ເຂດປົກຄອງຕົນເອງເຜົ່າຫຸຍນິງເຊ້ຍ. ນີ້ແມ່ນທ່ານສຳຫຼວດກວດກາວຽກງານພາຍໃນປະເທດເປັນຄັ້ງທຳອິດຫຼັງຈາກກອງປະຊຸມສອງສະພາປີນີ້, ກໍແມ່ນທ່ານອອກໄປສຳຫຼວດກວດກາວຽກງານຢູ່ນອກນະຄອນຫຼວງປັກກິ່ງເທື່ອທີ 6 ໃນປີນີ້. ການສຳຫຼວດໃນມື້ທຳອິດໄດ້ສຸມໃສ່ນະຄອນອູຈົ່ງຢູ່ພາກກາງຂອງເຂດນິງເຊ້ຍ. ທ່ານສີຈິ້ິນຜິງໄດ້ໄປສຳຫຼວດບ້ານໜຶ່ງ, ແມ່ນໍ້າສາຍໜຶ່ງ ແລະ ເຂດຊຸມຊົນແຫ່ງໜຶ່ງ, ເຊິ່ງແຕ່ລະບ່ອນລ້ວນແຕ່ສ່ອງແສງເຖິງຄວາມເອົາໃຈໃສ່ຢ່າງເລິກເຊິ່ງຂອງທ່ານ.
ບ້ານໜຶ່ງ: “ຕິດຕາມກວດກາ” ສະໜາມຮົບຕົ້ນຕໍໃນບັ້ນລຶບລ້າງຄວາມທຸກຍາກ
ແຕ່ທ້າຍສະຕະວັດທີ 20 ເປັນຕົ້ນມາ, ເຂດຫົງຊື້ປູໄດ້ກາຍເປັນສະຖານທີ່ສຳຄັນຂອງໂຄງການຊົນລະປະທານເພື່ອຫຼຸດຜ່ອນຄວາມທຸກຍາກ. ໂດຍນຳໃຊ້ສະຖານີສູບນໍ້າຫຼາຍຂັ້ນ, ນໍ້າຈາກແມ່ນໍ້າເຫຼືອງໄດ້ຖືກສົ່ງຂຶ້ນໄປສູ່ດິນແດນຮົກເຮື້ອທາງພາກກາງຂອງເຂດນິງເຊ້ຍ. ຊາວກະສິກອນຢູ່ເຂດພູດອຍທາງພາກກາງໄດ້ຍົກຍ້າຍມາຕັ້ງຖິ່ນຖານຢູ່ແຫ່ງນີ້, ໄດ້ສິ້ນສຸດການດຳລົງຊີວິດທີ່ທຸກຍາກລຳບາກແລະ ຂາດນໍ້າ . ໃນຊຸມປີມໍ່ໆມານີ້, ຢູ່ເຂດຫົງຊື້ປູໄດ້ບຸກເບີກດິນປູກຝັງ ເກືອບ 5 ໝື່ນເຮັກຕາ, ຈັດສັນປະຊາຊົນຜູ້ຍົກຍ້າຍ 233.000 ກວ່າຄົນ.
ບ່ອນທຳອິດທີ່ທ່ານສີຈິ້ນຜິງສຳຫຼວດຢູ່ນະຄອນອູຈົ່ງ ກໍແມ່ນບ້ານຫົງເຕີທີ່ແມ່ນບ້ານຈັດສັນຊາວຍົກຍ້າຍແຫ່ງໜຶ່ງຂອງເຂດຫົງຊື້ປູ. ປະຈຸບັນໃນບ້ານມີ 1699 ຄອບຄົວ ທັງໝົດ 7013 ຄົນ.
ປີກາຍນີ້ ຊາວບ້ານຫົງເຕີໄດ້ຫຼຸດພົ້ນອອກຈາກຄວາມທຸກຍາກທັງໝົດ, ແມ່ນໄດ້ຮັບຜົນປະໂຫຍດຈາກເສັ້ນທາງລຶບລ້າງຄວາມທຸກຍາກ ຄື: ໄດ້ໂອນທີ່ດິນທັງໝົດຂອງທົ່ວບ້ານໃຫ້ແກ່ວິສາຫະກິດເພື່ອພັດທະນາກະສິກຳທີ່ມີເອກະລັກພິເສດ, ສ້າງໂຮງງານເພື່ອຫຼຸດຜ່ອນຄວາມທຸກຍາກ ແລະ ອື່ນໆ. ປີຜ່ານມາ, ລາຍຮັບທີ່ຈັບຈ່າຍໄດ້ສະເລ່ຍຕໍ່ຫົວຄົນຂອງບ້ານຫົງເຕີຫຼາຍກວ່າ 8000 ຢວນ.
ນີ້ແມ່ນຄັ້ງທີ 4 ທີ່ທ່ານສີຈິ້ນຜິງໄປສຳຫຼວດກວດກາວຽກງານຢູ່ເຂດນິງເຊ້ຍ, ທ່ານໄດ້ເອົາໃຈໃສ່ການລຶບລ້າງຄວາມທຸກຍາກຂອງເຂດແດນດິນເຫຼືອງແຫ່ງນີ້ມາໂດຍຕະຫຼອດ.
ແມ່ນໍ້າສາຍໜຶ່ງ: ຍຸດທະສາດແຫ່ງຊາດພວມໄດ້ຮັບການຈັດຕັ້ງປະຕິບັດໃຫ້ເປັນຮູບປະທຳ
ບ່ອນທີ2ໃນການສຳຫຼວດກວດກາວຽກງານຂອງທ່ານສີຈິ້ນຜິງ, ແມ່ນໄດ້ໄປຮັບຮູ້ສະພາບການອະນຸລັກລະບົບນິເວດແມ່ນໍ້າເຫຼືອງຢູ່ຕອນເທສະບານນະຄອນອູຈົ່ງ.
ໃນຈຳນວນ 9 ເຂດແຂວງທີ່ຢູ່ລຽບຕາມແມ່ນໍ້າເຫຼືອງ,ມີພຽງເຂດນິງເຊ້ຍເຂດດຽວທີ່ມີເນື້ອທີ່ທັງໝົດນອນຢູ່ໃນລ້ອມແມ່ນ້ຳເຫຼືອງ. ແມ່ນໍ້າເຫຼືອງແມ່ນຈຸດສຸມໃນການສຳຫຼວດວຽກງານພາຍໃນປະເທດຂອງທ່ານສີຈິ້ນຜິງໃນຊຸມປີຜ່ານມາ. ໃນເດືອນສິງຫາປີ 2019ຜ່ານມາ, ທ່ານສີຈິ້ນຜິງໄປສຳຫຼວດວຽກງານຢູ່ແມ່ນໍ້າເຫຼືອງຕອນນະຄອນລານໂຈ່ແລ້ວກ່າວເນັ້ນວ່າ, ຮ່ວມກັນກຳແໜ້ນການອະນຸລັກໂດຍລວມ, ປະສານສົມທົບກັນຊຸກຍູ້ການປັບປຸງໂດຍລວມ, ຊຸກຍູ້ເຂດລ້ອງແມ່ນໍ້າເຫຼືອງໃຫ້ພັດທະນາດ້ວຍຄຸນນະພາບສູງ. ຫຼັງຈາກນັ້ນໜຶ່ງເດືອນ, ທ່ານໄດ້ໄປສຳຫຼວດວຽກງານຢູ່ຫໍພິພິທະພັນແມ່ນໍ້າເຫຼືອງ ແລະ ແມ່ນໍ້າເຫຼືອງຕອນນະຄອນເຈີ້ງໂຈ່, ທັງເປັນປະທານຈັດກອງປະຊຸມ, ໂດຍກຳນົດຢ່າງຈະແຈ້ງເປັນຄັ້ງທຳອິດວ່າ “ການອະນຸລັກສິ່ງແວດລ້ອມນິເວດ ແລະ ການພັດທະນາດ້ວຍຄຸນນະພາບສູງຂອງເຂດລ້ອງແມ່ນໍ້າເຫຼືອງ” ແມ່ນຍຸດທະສາດແຫ່ຊາດທີ່ສຳຄັນ. ເດືອນເມສາປີນີ້, ທ່ານສີຈິ້ນຜິງໄດ້ໄປສຳຫຼວດກວດກາວຽກງານຢູ່ແຂວງສ້ານຊີ່ໂດຍກ່າວເນັ້ນວ່າ, ຕ້ອງຊຸກຍູ້ໃຫ້ຫັນຈາກການບຸກເບີກ ແລະ ການນຳໃຊ້ຫຼາຍເກີນໄປ ກາຍເປັນການຟື້ນຟູແບບທຳມະຊາດ. ເດືອນພຶດສະພາປີນີ້, ໃນເວລາໄປສຳຫຼວດວຽກງານຢູ່ແຂວງສ່ານຊີ່, ທ່ານສີຈິ້ນຜິງໄດ້ໄປສຳຫຼວດກວດເບິ່ງແມ່ນໍ້າເຟີນເຫີທີ່ເປັນສາຂາໃຫຍ່ອັນດັບ 2 ຂອງແມ່ນໍ້າເຫຼືອງ.
ເຂດຊຸມຊົນແຫ່ງໜຶ່ງ: ກຳລັງຂອງເຮືອຂຶ້ນຢູ່ກັບໃບເຮືອ ກຳລັງຂອງຄົນຂຶ້ນຢູ່ກັບຈິດໃຈ
ຢູ່ເຂດນິງເຊ້ຍມີ 40 ກວ່າຊົນເຜົ່າສ່ວນໜ້ອຍ ເຊັ່ນ: ເຜົ່າຫຸຍ ເຜົ່າແມນຈູ ເຜົ່າມົງໂກນ ເຜົ່າຈ້ວງ ແລະອື່ນໆ, ແມ່ນເຂດຕັ້ງຖິ່ນຖານໃຫຍ່ທີ່ສຸດຂອງເຜົ່າຫຸຍໃນທົ່ວປະເທດຈີນ, ປະຊາກອນເຜົ່າຫຸຍກວມເອົາ 36,69%. ວັນທີ8 ມິຖຸນານີ້, ທ່ານສີຈິ້ນຜິງໄດ້ໄປສຳຫຼວດກວດກາວຽກງານຢູ່ເຂດຊຸມຊົນຈິ່ນຮວ່າຢວນຕາແສງຈິ່ນຊິ່ງເມືອງລີ້ທົ່ງ ນະຄອນອູຈົ່ງ. ໃນປີ 2019, ໃນງານປະກວດຄັ້ງໜຶ່ງເຂດຊຸມຊົນແຫ່ງນີ້ໄດ້ຖືກຮັບຮອງໃຫ້ເປັນ “ລວມໝູ່ຄະນະທີ່ເປັນແບບຢ່າງສົ່ງເສີມຄວາມກ້າວໜ້າສາມັກຄີລະຫວ່າງຊົນເຜົ່າລະດັບຊາດ”.
ຢູ່ເຂດຊຸມຊົນຈິ່ນຮວ່າຢວນ, ມີຜູ້ເຖົ້າຜູ້ໜຶ່ງຊື່ ຫວາງລານຮວ່າ ເກີດໃນປີທີ່ສະຖາປະນາສປຈີນ. ຫຼັງຈາກບຳນານແລ້ວ, ເພິ່ນໄດ້ສ້າງຕັ້ງ “ສະມາຄົມອາສາສະໝັກລານຮວ່າ”, ໂດຍໃຫ້ການຊ່ວຍເຫຼືອໄກ່ເກ່ຍຄວາມຂັດແຍ່ງລະຫວ່າງປະຊາຊົນ, ແລະຊ່ວຍເບິ່ງແຍງຜູ້ເຖົ້າທີ່ລູກບໍ່ໄດ້ຢູ່ນຳ ແລະ ເດັກນ້ອຍທີ່ພໍ່ແມ່ໄປເຮັດວຽກຢູ່ຕ່າງຖິ່ນ. ປີ 2014, ປ້າຫວາງລານຮວ່າໄດ້ຮັບນາມະຍົດ “ບຸກຄົນທີ່ເປັນແບບຢ່າງສົ່ງເສີມຄວາມກ້າວໜ້າສາມັກຄີລະຫວ່າງຊົນເຜົ່າລະດັບຊາດ”. ໃນເວລາໄປສຳຫຼວດກວດກາວຽກງານ, ທ່ານສີຈິ້ນຜິງໄດ້ໂອ້ລົມກັບເພິ່ນຢ່າງສະໜິດສະໜົມ. ທ່ານສີຈິ້ນຜິງກ່າວວ່າ: ບົດຮຽນຂອງພວກເຈົ້າດີຫຼາຍ, ນີ້ສະແດງໃຫ້ເຫັນເຖິງຫຼັກການທີ່ວ່າ ການກະທຳຕົວຈິງດີກວ່າປາກເປົ່າຢ່າງແທ້ຈິງ. ສັງຄົມນິຍົມມາຈາກການເຮັດແທ້ທຳຈິງ, ປະຊາຊົນບັນດາເຜົ່າຈະສຸມທຸກຄວາມພະຍາຍາມຮ່ວມກັນ, ອາສາສະໝັກຕ້ອງເສີມຂະຫຍາຍບົດບາດຢ່າງເຕັມສ່ວນ, ຂອບໃຈຄວາມພະຍາຍາມ ແລະການປະກອບສ່ວນຂອງພວກທ່ານ.
ຢູ່ເຂດຊຸມຊົນຈິ່ນຮວ່າຢວນ, ທ່ານສີຈິ້ນຜິງກ່າວວ່າ: ການລຶບລ້າງຄວາມທຸກຍາກ ຄວາມອິ່ມໜຳສຳລານຢ່າງຮອບດ້ານ ການຫັນເປັນທັນສະໄໝ ຈະບໍ່ປະຖິ້ມຊົນເຜົ່າໃດຢ່າງເດັດຂາດ, ພວກເຮົາເກາະແຂນກັນກ້າວໄປໜ້າພ້ອມກັນ. ນີ້ໄດ້ສ່ອງແສງໃຫ້ເຫັນເຖິງອະລິຍະທຳປະຊາຊາດຈີນ 5000 ປີ, ທັງສ່ອງແສງເຖິງຄວາມໂດດເດັ່ນຂອງລະບອບສັງຄົມນິຍົມທີ່ມີສີສັນພິເສດຂອງຈີນ.”
