ຕາມຂ່າວCRI：ຫວ່າງກ່ອນນີ້ບໍ່ດົນ, ທ່ານໂທງ ຊາວ ຮຸຍ, ຜູ້ຊ່ຽວຊານໃນຄະນະພົວພັນກົນໄກການປ້ອງກັນແລະຄວບຄຸມຮ່ວມກັນຂອງລັດຖະບານຈີນ, ຮອງຜູ້ອຳນວຍການໂຮງໝໍຊາວຢາງປັກກິ່ງກ່າວວ່າ: ຄະນະພົວພັນຕົນໄດ້ຢັ້ງຢືນຢ່າງຈະແຈ້ງວ່າ: ຄ່າໃຊ້ຈ່າຍປິ່ນປົວສຸຂະພາບຂອງຜູ້ເປັນພະຍາດໂຄວິດ-19 ຢູ່ແຂວງຫູເປີຍບໍ່ຕ້ອງຮັບຜິດຊອບດ້ວຍຕົນເອງ.
ທ່ານໂທງ ຊາວ ຮຸຍກ່າວວ່າ,ກ່ຽວກັບບັນຫາຄ່າໃຊ້ຈ່າຍໃນການປິ່ນປົວຜູ້ເປັນພະຍາດ, ຕ້ອງມີການຊີ້ນຳຈາກລັດຖະບານແລະການສະໜັບສະໜູນຈາກກຳລັງທາງສັງຄົມ, ເຮັດໃຫ້ຜູ້ເປັນພະຍາດສາມາດປິ່ນປົວສຸຂະພາບໂດຍບໍ່ມີຄວາມກັງວົນໃດໆ. ກ່ອນນີ້ໄດ້ຮັບຊາບຂໍ້ມູນຈາກໂຮງໝໍນະຄອນອູຮ້ານວ່າ: ທີ່ຈິງແລ້ວມີຜູ້ເປັນພະຍາດຈຳນວນໜຶ່ງມີຄວາມກັງວົນຕໍ່ບັນຫາຄ່າໃຊ້ຈ່າຍ, ຈຶ່ງບໍ່ຢາກມາໂຮງໝໍຫຼືວ່າບໍ່ຢາກມາປິ່ນປົວສຸຂະພາບຢູ່ໂຮງໝໍ, ສະນັ້ນ, ຄະນພົວພັນຕົນຈຶ່ງໄດ້ໄປນະຄອນອູຮ້ານເພື່ອປະຕິບັດໜ້າທີ່ແກ້ໄຂບັນຫາດັ່ງກ່າວ. ພວກເຮົາໄດ້ກ່າວຢ່າງຈະແຈ້ງວ່າ: ຄ່າໃຊ້ຈ່າຍໃນການປິ່ນປົວສຸຂະພາບຂອງຜູ້ເປັນພະຍາດໂຄວິດ-19 ບໍ່ຕ້ອງຮັບຜິດຊອບດ້ວຍຕົນເອງ.
ທ່ານໂທງ ຊາວ ຮຸຍກ່າວຕື່ມວ່າ, ຍ້ອນນະໂຍບາຍທີ່ຈະແຈ້ງຕໍ່ຜູ້ເປັນພະຍາດໂດຍບໍ່ຕ້ອງຈ່າຍຄ່າປິ່ນປົວ, ກໍສາມາດເຮັດໃຫ້ຜູ້ເປັນພະຍາດຈຳນວນໜຶ່ງໄປປີ່ນປົວຢູ່ໂຮງໝໍໂດຍໄວ, ນີ້ແມ່ນມາດຕະການທີ່ເລັ່ງລັດໃຫ້ຜູ້ເປັນພະຍາດໂຄວິດ-19 ສາມາດປິ່ນປົວໃຫ້ຫາຍຂາດຢູ່ພາຍໃນແຂວງຫູເປີຍ, ກໍຄືນະຄອນອູຮ້ານໄດ້ກັບຄືນສູ່ສັງຄົມຢ່າງເປັນປົກກະຕິໂດຍໄວ.