ຫວັງວ່າອາເມຣິກາຈະສາມາດເປັນແບບຢ່າງທີ່ດີໃນການຮັບຮອງຜົນການຕ້ານກັບການແຜ່ລະບາດຂອງພະຍາດໂຄວິດ-19 ຂອງຈີນ
ເວັບໄຊຂ່າວໂທລະພາບມີສາຍຂອງອາເມຣິກາຫຼື CNN ໄດ້ລາຍງານໃນວັນທີ 9 ມິຖຸນານີ້ວ່າ: ກະຊວງການຕ່າງປະເທດອາເມຣິກາໄດ້ເປີດເຜີຍແຜນການວ່າ: ອາດຈະເປີດບໍລິການສະຖານກົງສຸນອາເມຣິກາປະຈຳນະຄອນອູຮັ້ນຂອງຈີນຄືນໃໝ່ໃນວັນທີ 22 ມິຖຸນານີ້, ປັດຈຸບັນກະຊວງດັ່ງກ່າວໄດ້ລາຍງານຕໍ່ລັດຖະສະພາແລ້ວ.
ຍັງຈື່ໄດ້ວ່າໃນ 5 ເດືອນປາຍກ່ອນໜ້ານີ້, ໃນຈຸດເວລາອັນຄັບຂັນເພື່ອຕໍ່ສູ້ຕ້ານກັບການແຜ່ລະບາດຂອງພະຍາດໂຄວິດ-19 ຢູ່ຈີນ, ລັດຖະບານອາເມຣິກາເປັນປະເທດທຳອິດທີ່ໄດ້ຖອນພະນັກງານສະຖານກົງສຸນອອກຈາກນະຄອນອູຮັ້ນ, ເປັນປະເທດທຳອິດທີ່ໄດ້ຮຽກຮ້ອງຖອນພະນັກງານສ່ວນໜຶ່ງຢູ່ສະຖານທູດປະເທດຕົນປະຈຳຈີນອອກໄປ ແລະເປັນປະເທດທຳອິດທີ່ໄດ້ປະກາດຈະໃຊ້ມາດຕະການຈຳກັດຮອບດ້ານຕໍ່ພົນລະເມືອງຈີນທີ່ເດີນທາງເຂົ້າເມືອງອາເມຣິກາ,ທັງໄດ້ເສກສັນປັ້ນແຕ່ງແລະເຜີຍແຜ່ຂ່າວທີ່ມີຄວາມວິຕົກກັງວົນຢ່າງບໍ່ຢຸດຢັ້ງ,ເປັນຕົວຢ່າງທີ່ຊົ່ວຮ້າຍຫຼາຍ.
ຫວ່າງມໍ່ໆມານີ້, ນະຄອນອູຮັ້ນໄດ້ດຳເນີນການກວດນິວຄຼີອິກຫາເຊື້ອໄວຣັດ(nucleic acid)ແບບລວມໝູ່,ໄດ້ມີປະຊາຊົນເກືອບ 9,9 ລ້ານຄົນຕື່ນຕົວເຂົ້າຮ່ວມການກວດຫາເຊື້ອ,ແລະບໍ່ໄດ້ພົບເຫັນຜູ້ຕິດເຊື້ອພະຍາດໂຄວິດ-19 ແມ່ນແຕ່ກໍລະນີດຽວ. ສາມາດເວົ້າໄດ້ວ່າ: ນະຄອນອູຮັ້ນໃນປັດຈຸບັນປອດໄພກວ່າຕົວເມືອງສ່ວນໃຫຍ່ຢູ່ອາເມຣິກາ.
ອາເມຣິກາມີແຜນເປີດບໍລິການສະຖານກົງສຸນໃຫຍ່ອາເມຣິກາປະຈຳນະຄອນອູຮັ້ນຂອງຈີນຄືນໃໝ່ ນີ້ສະແດງໃຫ້ເຫັນໃນລະດັບໜຶ່ງວ່າເປັນຄວາມເຫັນດີນຳຈີນທີ່ໄດ້ປະສົບຜົນສຳເລັດໃນການຕ້ານກັບການແຜ່ລະບາດຂອງພະຍາດໂຄວິດ-19, ເທື່ອນີ້ຫວັງວ່າອາເມຣິກາຈະສາມາດເປັນແບບເປັນຢ່າງທີ່ດີໃນການຮັບຮອງໝາກຜົນດ້ານການຕ້ານກັບການແຜ່ລະບາດຂອງພະຍາດໂຄວິດ-19 ຢູ່ຈີນ.