ວັນທີ 16 ມີຖຸນານີ້, ທ່ານນາງຮວ້າຊຸ່ນຢິງ ໂຄສົກກະຊວງການຕ່າງປະເທດຈີນກ່າວວ່າ, ທ່ານສີຈິ້ນຜິງ ປະທານປະເທດຈີນຈະເປັນປະທານຈັດກອງປະຊຸມສຸດຍອດສະໄໝພິເສດຈີນ-ອາຟຣິກາເພື່ອຮ່ວມມືກັນຕ້ານກັບພະຍາດ ເຊິ່ງຈະຈັດຂຶ້ນຢູ່ປັກກິ່ງໃນວັນທີ 17 ມີຖຸນານີ້, ແລະຈະກ່າວຄຳປາໄສສຳຄັນ.
ກອງປະຊຸມສຸດຍອດສະໄໝພິເສດຄັ້ງນີ້ລິເລີ່ມໂດຍຝ່າຍຈີນ, ປະເທດອາຟຣິກາໃຕ້ ເຊິ່ງເປັນປະເທດປະທານໝູນວຽນຂອງສະຫະພາບອາຟຣິກາກັບປະເທດເຊເນການ ປະເທດປະທານຮ່ວມຂອງເວທີປຶກສາຫາລືການຮ່ວມມືຈີນ-ອາຟຣິກາ, ກອງປະຊຸມຄັ້ງນີ້ຈັດໃນຮູບແບບວິດີໂອ. ຜູ້ນຳຂອງປະເທດສະມາຊິກຄະນະປະທານກອງປະຊຸມສຸດຍອດສະຫະພາບອາຟຣິກາ, ປະເທດປະທານໝູນວຽນອົງການຈັດຕັ້ງອະນຸພາກພື້ນສຳຄັນຢູ່ອາຟຣິກາແລະປະທານຄະນະກຳມະການສະຫະພາບອາຟຣິກາຈະເຂົ້າຮ່ວມຕາມຄຳເຊີນ. ທ່ານເລຂາທິການໃຫຍ່ສະຫະປະຊາຊາດ, ຜູ້ອຳນວຍການໃຫຍ່ອົງການອະນາໄມໂລກຈະເຂົ້າຮ່ວມກອງປະຊຸມໃນຖານະເປັນແຂກພິເສດ.