ວັນທີ 17 ມິຖຸນານີ້, ທ່ານວາງຢີ້ ທີ່ປຶກສາແຫ່ງລັດທັງເປັນລັດຖະມົນຕີກະຊວງການຕ່າງປະເທດຈີນໄດ້ສົນທະນາກັບທ່ານສຈາຍຊັນກາ ລັດຖະມົນຕີກະຊວງການຕ່າງປະເທດອິນເດຍຜ່ານທາງໂທລະສັບ.
ທ່ານວາງຢີ້ກ່າວວ່າ: ຕອນຄ່ຳວັນທີ 15 ມິຖຸນານີ້, ໃນໄລຍະທີ່ສະພາບການຂອງເຂດຮ່ອມພູກາເລວານພວມມີຄວາມໝັ້ນທ່ຽງ, ກອງທັບປ້ອງກັນຊາຍແດນອິນເດຍໄດ້ຂ້າມຜ່ານເສັ້ນຄວບຄຸມອີກຄັ້ງໜຶ່ງ ແລະເຈດຕະນາດຳເນີນການທ້າທາຍເກາະຜິດ, ຍິ່ງໄປກວ່ານັ້ນ ຍັງໄດ້ໂຈມຕີນາຍແລະພົນທະຫານຈີນທີ່ໄປປຶກສາແກ້ໄຂບັນຫານັ້ນດ້ວຍຄວາມຮຸນແຮງ ແລ້ວເຮັດໃຫ້ເກີດການປະທະກັນຢ່າງຮຸນແຮງ ເຊິ່ງພາໃຫ້ມີຄົນບາດເຈັບແລະເສຍຊີວິດ. ການກະທຳທີ່ສ່ຽງໄພຂອງກອງທັບອິນເດຍໄດ້ລະເມີດສັນຍາລະຫວ່າງສອງປະເທດກ່ຽວກັບບັນຫາຊາຍແດນຢ່າງໜັກໜ່ວງ, ໄດ້ລະເມີດກົດລະບຽບພື້ນຖານຂອງການພົວພັນສາກົນຢ່າງໜັກໜ່ວງ, ຈີນສະແດງການຕໍ່ວ່າທັກທ້ວງຢ່າງຮຸນແຮງຕໍ່ອິນເດຍອີກຄັ້ງໜຶ່ງ. ພວກຂ້າພະເຈົ້າຮຽກຮ້ອງໃຫ້ອິນເດຍສືບສວນເຫດການດັ່ງກ່າວຢ່າງເຖິງຖອງ, ລົງໂທດຜູ້ຮັບຜິດຊອບຢ່າງເຂັ້ມງວດ, ຄຸ້ມຄອງກອງທັບແນວໜ້າຢ່າງເຂັ້ມງວດ, ຢຸດຕິການກະທຳທ້າທາຍເກາະຜິດທຸກຢ່າງໃນທັນທີ. ອິນເດຍບໍ່ຄວນມີການວິນິດໄສທີ່ພິດພາດຕໍ່ສະພາບການໃນປະຈຸບັນ, ບໍ່ຄວນເບິ່ງຕ່ຳມານະຈິດທີ່ເດັດດ່ຽວໜຽວແໜ້ນໃນການປົກປັກຮັກສາອະທິປະໄຕທາງດິນແດນຂອງຈີນ.
ທ່ານສຈາຍຊັນກາກ່າວວ່າ: ອິນເດຍຍິນດີພິຈາລະນາສະພາບລວມແຫ່ງການພົວພັນລະຫວ່າງສອງປະເທດ, ຜ່ານການເຈລະຈາໂດຍສັນຕິເພື່ອແກ້ໄຂຄວາມຂັດແຍ້ງກັນຢູ່ເຂດຊາຍແດນ, ຜ່ອນຄາຍສະພາບການເຄັ່ງຕຶງຢູ່ເຂດຊາຍແດນ. ສອງຝ່າຍເຫັນດີແກ້ໄຂເຫດການທີ່ຮ້າຍແຮງທີ່ເກີດຂຶ້ນຢູ່ເຂດຮ່ອມພູກາເລວານ ແລະຈະອີງຕາມສັນຍາລະຫວ່າງສອງປະເທດທີ່ໄດ້ເຊັນກັນໃນປັດຈຸບັນ, ຮັກສາສັນຕິພາບແລະຄວາມສະຫງົບຢູ່ເຂດຊາຍແດນ.