ສາມັກຄີ ແລະ ຮ່ວມມືກັນຕ້ານກັບພະຍາດໂຄວິດ-19
ຄືນວັນທີ 17 ມິຖຸນາປີ 2020 ນີ້, ທ່ານສີຈິ້ນຜິງ ປະທານປະເທດຈີນໄດ້ເປັນປະທານຈັກອງປະຊຸມສຸດຍອດສະໄໝພິເສດຈີນ-ອາຟຣິກາເພື່ອສາມັກຄີຕ້ານກັບພະຍາດ ໂດຍໄດ້ກ່າວຄຳປາໄສໃນຫົວຂໍ້ “ສາມັກຄີ ແລະ ຮ່ວມມືກັນຕ້ານກັບພະຍາດໂຄວິດ -19 ”, ບົດປາໄສທັງພາສາຈີນແລະພາສາລາວມີເນື້ອໃນດັ່ງລຸ່ມນີ້:
ສາມັກຄີ ແລະ ຮ່ວມມືກັນຕ້ານກັບພະຍາດໂຄວິດ-19
-ບົດປາໄສຂອງທ່ານສີຈິ້ນຜິງໃນກອງປະຊຸມສຸດຍອດສະໄໝພິເສດຈີນ-ອາຟຣິກາເພື່ອສາມັກຄີຕ້ານກັບພະຍາດ
(ວັນທີ 17 ມິຖຸນາ ປີ 2020, ປັກກິ່ງ)
ທ່ານສີຈິ້ນຜິງ ປະທານປະເທດ ສປ ຈີນ
ຮຽນທ່ານປະທານາທິບໍດີ ຊີຣີນ ຣາມາໂຟຊາ ທີ່ນັບຖື
ຮຽນທ່ານປະທານາທິບໍດີ ແມກກີ ຊອນ ທີ່ນັບຖື
ຮຽນທ່ານປະມຸກລັດ ຫົວໜ້າລັດຖະບານບັນດາປະເທດທີ່ນັບຖື
ຮຽນທ່ານມູຊາຟາກີ ມາຮາມັດ ປະທານຄະນະກຳມະການສະຫະພາບອາຟຣິກາທີ່ນັບຖື
ຮຽນທ່ານອັນໂຕນີໂອ ກູເຕີເຣັສ ເລຂາທິການໃຫຍ່ອົງການສະຫະປະຊາຊາດທີ່ນັບຖື
ຮຽນທ່ານເທໂດຼສ ຜູ້ອຳນວຍການໃຫຍ່ອົງການອະນາໄມໂລກທີ່ນັບຖື
ໃນຂະນະເວລາອັນສຳຄັນທີ່ທົ່ວໂລກຕ້ານກັບພະຍາດໂຄວິດ-19, ພວກເຮົາຈັດກອງປະຊຸມສຸດຍອດສະໄໝພິເສດຈີນ-ອາຟຣິກາຄັ້ງນີ້, ເພື່ອນມິດທັງເກົ່າແລະໃໝ່ທຸກທ່ານທີ່ມາເຕົ້າໂຮມກັນໃນກອງປະຊຸມທາງວີດີໂອເພື່ອ ຮ່ວມກັນປຶກສາຫາລືກ່ຽວກັບແຜນການໃນການສາມັກຄີຮ່ວມກັນຕ້ານກັບພະຍາດ, ທັງທົບທວນຄືນມິດຕະພາບຖານອ້າຍນ້ອງລະຫວ່າງຈີນ-ອາຟຣິກາ. ນະທີ່ນີ້ຂໍສະແດງຄວາມຂອບໃຈຕໍ່ທ່ານປະທານາທິບໍດີຣາມາໂຟຊາ ແລະທ່ານປະທານາທິບໍດີແມກກີ ຊອນ ທີ່ໄດ້ຮ່ວມກັບຂ້າພະເຈົ້າລິເລີ່ມຈັດກອງປະຊຸມຄັ້ງນີ້, ຂອບໃຈບັນດາທ່ານທີ່ເຂົ້າຮ່ວມກອງປະຊຸມຄັ້ງນີ້. ຂ້າພະເຈົ້າຂໍສະແດງຄວາມຢື້ຢາມຖາມຂ່າວທີ່ຈິງໃຈຕໍ່ຜູ້ນຳບັນດາປະເທດອາຟຣິກາທີ່ບໍ່ສາມາດມາເຂົ້າຮ່ວມກອງປະຊຸມຄັ້ງນີ້ໄດ້.
ການແຜ່ລະບາດຂອງພະຍາດຄັ້ງນີ້ເກີດຂຶ້ນຢ່າງກະທັນຫັນ, ໄດ້ສ້າງຜົນກະທົບຢ່າງຮ້າຍແຮງຕໍ່ປະເທດຕ່າງໆໃນໂລກ, ເຮັດໃຫ້ຫຼາຍແສນຄົນເສຍຊີວິດ. ນະທີ່ນີ້, ຂ້າພະເຈົ້າຂໍສະເໜີໃຫ້ພວກເຮົາຮ່ວມກັນສະແດງຄວາມໄວ້ອາໄລຕໍ່ຜູ້ປະສົບເຄາະຮ້າຍຈາກພະຍາດຄັ້ງນີ້, ແລະສະແດງຄວາມເຫັນໃຈຕໍ່ຄອບຄົວຍາດພີ່ນ້ອງຂອງເຂົາເຈົ້າ.
-ເມື່ອຜະເຊີນໜ້າກັບພະຍາດ, ຈີນ ແລະອາຟຣິກາໄດ້ຜ່ານການທົດສອບທີ່ຂ້ຽວຂາດ. ປະຊາຊົນຈີນໄດ້ຜ່ານຈາກຄວາມພະຍາຍາມຢ່າງລຳບາກ,ເສຍສະຫຼະຄ່າຕອບແທນຢ່າງໃຫຍ່ຫຼວງ, ຈຶ່ງສາມາດຄວບຄຸມການແຜ່ລະບາດຂອງພະຍາດໄວ້ໄດ້, ແຕ່ກໍຍັງຜະເຊີນໜ້າກັບຄວາມກົດດັນທີ່ອາດຈະແຜ່ລະບາດຄືນໃໝ່.ລັດຖະບານ ແລະ ປະຊາຊົນບັນດາປະເທດອາຟຣິກາໄດ້ຮ່ວມແຮງຮ່ວມໃຈກັນຜ່ານຜ່າຄວາມຫຍຸ້ງຍາກ, ສະຫະພາບອາຟຣິກາໄດ້ປະສານງານຢ່າງສຸດຄວາມສາມາດ, ໃຊ້ມາດຕະການທີ່ເຂັ້ມແຂງ, ສາມາດຫຼຸດຜ່ອນການແຜ່ລະບາດຂອງພະຍາດຢ່າງມີປະສິດທິຜົນ, ເຊິ່ງເປັນໝາກຜົນທີ່ຍາດມາໄດ້ບໍ່ແມ່ນງ່າຍ.
-ເມື່ອຜະເຊີນໜ້າກັບພະຍາດ, ຈີນ ແລະອາຟຣິກາໄດ້ສະໜັບສະໜູນເຊິ່ງກັນແລະກັນ ແລະ ໄດ້ສູ້ຊົນຄຽງບ່າຄຽງໄຫຼ່ກັນ. ໃນເວລາທີ່ຈີນປະສົບຄວາມຫຸຍ້ງຍາກລຳບາກທີ່ສຸດໃນການຕ້ານກັບພະຍາດ, ອາຟຣິກາໄດ້ໃຫ້ການສະໜັບສະໜູນທີ່ລໍ້າຄ່າແກ່ຈີນ, ພວກເຮົາຈະຈື່ຈຳໄວ້ໃນໃຈ. ຫຼັງຈາກອາຟຣິກາເກີດການແຜ່ລະບາດຂອງພະຍາດແລ້ວ, ຈີນໄດ້ນຳໜ້າກ່ອນໝູ່ໃຫ້ການຊ່ວຍເຫຼືອ, ແລະສະໜັບສະໜູນປະຊາຊົນອາຟຣິກາຢ່າງເດັດດ່ຽວ.
-ເມື່ອຜະເຊີນໜ້າກັບພະຍາດ, ຈີນ ແລະອາຟຣິກາມີຄວາມສາມັກຄີຫຼາຍກວ່າເກົ່າ, ມິດຕະພາບ ແລະ ຄວາມໄວ້ເນື້ອເຊື່ອໃຈກັນມີຄວາມໜັກແໜ້ນກວ່າເກົ່າ. ຂ້າພະເຈົ້າຂໍກ່າວເນັ້ນໜັກອີກເທື່ອໜຶ່ງວ່າ: ຈີນຈະທະນຸຖະໜອມມິດຕະພາບອັນເປັນມູນເຊື້ອລະຫວ່າງຈີນ-ອາຟຣິກາ, ບໍ່ວ່າສະຖານະການສາກົນຈະຜັນແປໄປແນວໃດກໍຕາມ, ຄວາມຕັດສິນໃຈຂອງຈີນທີ່ຈະເພີ່ມທະວີຄວາມສາມັກຄີ ແລະ ການຮ່ວມມືລະຫວ່າງຈີນ-ອາຟຣິກາຈະບໍ່ຫວັ່ນໄຫວຄອນແຄນຢ່າງເດັດຂາດ.
ບັນດາເພື່ອນຮ່ວມງານ!
ປະຈຸບັນ, ພະຍາດໂຄວິດ-19ຍັງຄົງແຜ່ລະບາດໃນທົ່ວໂລກ, ຈີນ ແລະ ອາຟຣິກາລ້ວນແຕ່ຜະເຊີນໜ້າກັບຄວາມຫຍຸ້ງຍາກລຳບາກໃນການຕ້ານກັບພະຍາດ, ຮັກສາຄວາມໝັ້ນຄົງຂອງເສດຖະກິດ, ທັງຮັບປະກັນຊີວິດການເປັນຢູ່ຂອງປະຊາຊົນ. ພວກເຮົາຄວນຍຶດໝັ້ນຫຼັກການທີ່ຖືປະຊາຊົນສຳຄັນທີ່ສຸດ ແລະຖືຊີວິດສຳຄັນທີ່ສຸດ, ຈັດສັນຊັບພະຍາກອນຢ່າງເປັນເອກະພາບກັນ, ສາມັກຄີ ແລະຮ່ວມມືກັນ, ສຸມທຸກຄວາມພະຍາຍາມເພື່ອປົກປ້ອງຄວາມປອດໄພດ້ານຊີວິດ ແລະສຸຂະພາບຮ່າງກາຍຂອງປະຊາຊົນ, ຫຼຸດຜ່ອນຜົນກະທົບຂອງພະຍາດໃຫ້ລົງສູ່ລະດັບຕໍ່າສຸດ.
ໜຶ່ງ, ພວກເຮົາຕ້ອງເດັດດ່ຽວຮ່ວມມືກັນຕ້ານກັບພະຍາດຢ່າງບໍ່ຫວັ່ນໄຫວຄອນແຄນ. ຈີນຈະສືບຕໍ່ສະໜັບສະໜູນວຽກງານຕ້ານກັບພະຍາດຂອງອາຟຣິກາຢ່າງສຸດຄວາມສາມາດຂອງຕົນ, ເລັ່ງລັດຈັດຕັ້ງປະຕິບັດມາດຕະການທີ່ຂ້າພະເຈົ້າໄດ້ປະກາດໃນພິທີເປີດກອງປະຊຸມອະນາໄມໂລກ, ສືບຕໍ່ໃຫ້ການຊ່ວຍເຫຼືອດ້ານວັດຖຸແກ່ປະເທດອາຟຣິກາ, ສົ່ງໜ່ວຍຊ່ຽວຊານແພດໝໍ, ປະສານງານໃຫ້ຝ່າຍຈັດຊື້ຂອງອາຟຣິກາມາຈັດຊື້ອຸປະກອນຕ້ານພະຍາດຢູ່ຈີນ. ຈີນຈະລົງມືກໍ່ສ້າງສຳນັກງານໃຫຍ່ຂອງສູນຄວບຄຸມພະຍາດອາຟຣິກາພາຍໃນປີນີ້ກ່ອນເວລາກຳນົດ, ຮ່ວມກັບຝ່າຍອາຟຣິກາດຳເນີນ “ການເຄື່ອນໄຫວສາທາລະນະສຸກ” ພາຍໃນຂອບເວທີປຶກສາຫາລືການຮ່ວມມືຈີນ-ອາຟຣິກາໃຫ້ດີ, ເລັ່ງລັດສ້າງໂຮງໝໍມິດຕະພາບຈີນ-ອາຟຣິກາ ແລະການຮ່ວມມືຂອງໂຮງໝໍແຮກສ່ຽວລະຫວ່າງຈີນ-ອາຟຣິກາ, ຮ່ວມກັນສ້າງປະຊາຄົມຮ່ວມສາທາລະນະສຸກຈີນ-ອາຟຣິກາ. ຈີນໃຫ້ຄຳໝັ້ນສັນຍາວ່າ, ຫຼັງຈາກສຳເລັດການຄົ້ນຄວ້າຜະລິດຢາວັກແຊງຕ້ານເຊື້ອພະຍາດໂຄວິດ-19 ແລະ ເລີ່ມນຳໃຊ້ແລ້ວ, ບັນດາປະເທດອາຟຣິກາຈະນອນຢູ່ໃນປະເທດທຳອິດທີ່ຈະໄດ້ຮັບຜົນປະໂຫຍດ.
ສອງ, ພວກເຮົາຄວນຊຸກຍູ້ການຮ່ວມມືຈີນ-ອາຟຣິກາຢ່າງເດັດດ່ຽວໜຽວ ແໜ້ນ. ເພື່ອຜ່ານຜ່າຜົນກະທົບຈາກການແຜ່ລະບາດຂອງພະຍາດ, ພວກເຮົາຄວນເພີ່ມທະວີການຮ່ວມມືໃນການສ້າງ “ໜຶ່ງແລວໜຶ່ງເສັ້ນທາງ”, ເລັ່ງລັດຈັດຕັ້ງປະຕິບັດໝາກຜົນຂອງກອງປະຊຸມສຸດຍອດເວທີປຶກສາຫາລືການຮ່ວມມືຈີນ-ອາຟຣິກາຢູ່ນະຄອນຫຼວງປັກກິ່ງ, ແລະໃຫ້ບຸລິມະສິດທີ່ຈຳເປັນທີ່ສຸດຕໍ່ການຮ່ວມມືໃນຂົງເຂດສາທາລະນະສຸກ, ການຟື້ນຟູການຜະລິດ ແລະການເຮັດວຽກ, ແລະປັບປຸງຊີວິດການເປັນຢູ່ຂອງປະຊາຊົນ.
ຈີນຈະຍົກເວັ້ນໜີ້ສິນເງິນກູ້ປອດດອກເບ້ຍໃຫ້ປະເທດອາຟຣິກາທີ່ກ່ຽວຂ້ອງທີ່ຈະໝົດອາຍຸກຳນົດໃນທ້າຍປີ 2020 ພາຍໃນຂອບເວທີປຶກສາຫາລືການຮ່ວມມືຈີນ-ອາຟຣິກາ.ຈີນຍິນດີຮ່ວມກັບປະຊາຄົມໂລກ, ເພີ່ມທະວີການສະໜັບສະໜູນຕໍ່ປະເທດອາຟຣິກາທີ່ມີການແຜ່ລະບາດຂອງພະຍາດຢ່າງຮ້າຍແຮງທີ່ສຸດ ແລະມີຄວາມກົດດັນຫຼາຍທີ່ສຸດ, ເຊິ່ງລວມທັງການເລື່ອນເວລາຊຳລະໜີ້ຕື່ມອີກ ເພື່ອຊ່ວຍເຫຼືອແກ້ໄຂຄວາມຫຍຸ້ງຍາກໃນປະຈຸບັນ. ຈີນສົ່ງເສີມໃຫ້ສະຖາບັນການເງິນທີ່ກ່ຽວຂ້ອງຂອງຈີນພິຈາລະນາຕາມ “ຂໍ້ລິເລີ່ມເລື່ອນເວລາຊຳລະໜີ້ຂອງກຸ່ມG20”, ປືກສາຫາລືກັບປະເທດອາຟຣິກາບົນຈິດໃຈມິດຕະພາບກ່ຽວກັບການຈັດສັນເງິນກູ້ເພື່ອການຄ້າທີ່ລັດຄ້ຳປະກັນໂດຍອີງຕາມຫຼັກການຕະຫຼາດ. ຈີນຈະຮ່ວມກັບສະມາຊິກກຸ່ມG20 ຈັດຕັ້ງປະຕິບັດ“ຂໍ້ລິເລີ່ມເລື່ອນເວລາຊຳລະໜີ້ຂອງກຸ່ມG20”, ທັງຮຽກຮ້ອງໃຫ້ກຸ່ມG20ເລື່ອນເວລາຕື່ມອີກໃນການໄຊ້ໜີ້ໃຫ້ແກ່ປະເທດທີ່ກ່ຽວຂ້ອງເຊິ່ງລວມທັງປະເທດອາຟຣິກາ ບົນພື້ນຖານຂອງການຈັດຕັ້ງປະຕິບັດຂໍ້ລິເລີ່ມເລື່ອນເວລາໄຊ້ໜີ້ໃນປະຈຸບັນ.
ຈີນຫວັງໃຫ້ປະຊາຄົມໂລກ ໂດຍສະເພາະແມ່ນປະເທດທີ່ພັດທະນາແລ້ວ ແລະ ສະຖາບັນການເງິນຫຼາຍຝ່າຍຈົ່ງໃຊ້ມາດຕະການທີ່ເຂັ້ມແຂງກວ່າເກົ່າໃນບັນຫາຫຼຸດຜ່ອນ ຫຼືເລື່ອນເວລາໄຊ້ໜີ້ໃຫ້ແກ່ອາຟຣິກາ. ຈີນຍິນດີຮ່ວມມືກັບອົງການສະຫະປະຊາຊາດ, ອົງການອະນາໄມໂລກ ແລະຄູ່ຮ່ວມມືອື່ນໆໃນການຊ່ວຍເຫຼືອອາຟຣິກາຕ້ານກັບພະຍາດບົນພື້ນຖານທີ່ເຄົາລົບຄວາມປາຖະໜາຂອງອາຟຣິກາ.
ການຊຸກຍູ້ອາຟຣິກາບັນລຸການພັດທະນາແບບຍືນຍົງແມ່ນແຜນໄລຍະຍາວ. ຈີນສະໜັບສະໜູນການສ້າງເຂດການຄ້າເສລີອາຟຣິກາ, ສະໜັບສະໜູນອາຟຣິກາເພີ່ມທະວີການເຊື່ອມຈອດກັນ ແລະ ຮັບປະກັນຕ່ອງໂສ້ອຸດສາຫະກຳ ແລະຕ່ອງໂສ້ການສະໜອງ, ຍິນດີຮ່ວມກັບອາຟຣິກາ, ຮ່ວມກັນເປີດກວ້າງການຮ່ວມມືໃນອຸດສາຫະກຳແບບໃໝ່ ເຊັ່ນ, ເສດຖະກິດດີຈີຕອນ, ຕົວເມືອງອັດສະລິຍະ, ພະລັງງານສະອາດ, 5G ແລະອື່ນໆ, ຊຸກຍູ້ການພັດທະນາ ແລະຄວາມຈະເລີນຮຸ່ງເຮືອງຂອງອາຟຣິກາ.
ສາມ, ພວກເຮົາຄວນປະຕິບັດຕາມລັດທິຫຼາຍຝ່າຍຢ່າງເດັດດ່ຽວໜຽວແໜ້ນ. ຄວາມສາມັກຄີ ແລະ ການຮ່ວມມືແມ່ນອາວຸດທີ່ເຂັ້ມແຂງທີ່ສຸດໃນການຕ້ານກັບພະຍາດ. ຈີນຍິນດີຮ່ວມກັບອາຟຣິກາ, ຮັກສາລະບົບບໍລິຫານໂລກທີ່ຖືອົງການສະຫະປະຊາຊາດເປັນແກນກາງ, ສະໜັບສະໜູນອົງການອະນາໄມໂລກປະກອບສ່ວນຫຼາຍກວ່າເກົ່າເຂົ້າໃນການຕ້ານກັບພະຍາດໃນທົ່ວໂລກ. ພວກເຮົາຄັດຄ້ານການຫັນບັນຫາການແຜ່ລະບາດຂອງພະຍາດເປັນບັນຫາການເມືອງ ຫຼືຕີຄວາມໝາຍວ່າ ເຊື້ອພະຍາດຂຶ້ນກັບປະເທດໃດໜຶ່ງ, ຄັດຄ້ານການຈຳແນກເຊື້ອຊາດຜິວພັນ ແລະ ແນວຄິດອະຄະຕິດ້ານຮູບຖານຈິດສຳນຶກ, ເດັດດ່ຽວປົກປ້ອງຄວາມຍຸຕິທຳ ແລະຄວາມເປັນທຳໃນສາກົນ.
ສີ່, ພວກເຮົາຕ້ອງຊຸກຍູ້ມິດຕະພາບຈີນ-ອາຟຣິກາຢ່າງໝັ້ນໜຽວບໍ່ປ່ຽນແປງ. ປັດຈຸບັນ, ໂລກພວມຢູ່ໃນສະພາບການທີ່ມີການປ່ຽນແປງຢ່າງໃຫຍ່ຫຼວງແບບບໍ່ເຄີຍມີມາກ່ອນໃນໄລຍະຮອບຮ້ອຍປີ. ໂດຍຜະເຊີນໜ້າກັບໂອກາດໃໝ່ແລະສິ່ງທ້າທາຍໃໝ່, ຈີນແລະອາຟຣິກາມີຄວາມຕ້ອງການໃນການເພີ່ມທະວີການຮ່ວມມືຫຼາຍກວ່າເວລາໃດໝົດ. ຂ້າພະເຈົ້າຍິນດີຮັກສາການພົວພັນຢ່າງໃກ້ຊິດກັບບັນດາທ່ານເພື່ອຮັດແໜ້ນມິດຕະພາບແລະຄວາມໄວ້ເນື້ອເຊື່ອໃຈກັນ, ສະໜັບສະໜູນເຊິ່ງກັນແລະກັນໃນບັນຫາທີ່ກ່ຽວພັນເຖິງຜົນປະໂຫຍດໃຈກາງຂອງກັນແລະກັນ, ຮ່ວມກັນຮັກສາຜົນປະໂຫຍດພື້ນຖານຂອງຈີນແລະປະເທດອາຟຣິກາກໍຄືປະເທດທີ່ພວມພັດທະນາ, ຊຸກຍູ້ໃຫ້ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຈີນ-ອາຟຣິກາພັດທະນາຂື້ນສູ່ລະດັບສູງ.
ບັນດາເພື່ອນຮ່ວມງານ!
ພວກເຮົາໄດ້ຕົກລົງຮ່ວມກັນໃນການສ້າງປະຊາຄົມຮ່ວມຊາຕາກຳຈີນ-ອາຟຣິກາທີ່ແໜ້ນແຟ້ນກວ່າເກົ່າໃນກອງປະຊຸມເວທີປຶກສາຫາລືການຮ່ວມມືຈີນ-ອາຟຣິກາທີ່ຈັດຂຶ້ນຢູ່ນະຄອນຫຼວງປັກກິ່ງ. ມື້ນີ້ ພວກເຮົາໄດ້ຈັດກອງປະຊຸມສຸດຍອດສະໄໝພິເສດເພື່ອສາມັກຄີກັນຕ້ານກັບພະຍາດກໍເປັນການປະຕິບັດຕາມຄຳໝັ້ນສັນຍາທີ່ໃຫ້ໄວ້ໃນກອງປະຊຸມເວທີປຶກສາຫາລືດັ່ງກ່າວດ້ວຍການກະທຳຕົວຈິງທັງເປັນການປະກອບສ່ວນເຂົ້າໃນການຮ່ວມມືສາກົນເພື່ອຕ້ານກັບພະຍາດ. ຂ້າພະເຈົ້າເຊື່ອໝັ້ນວ່າ, ມະນຸດເຮົາຈະເອົາຊະນະພະຍາດໃນທີ່ສຸດ, ປະຊາຊົນຈີນແລະປະຊາຊົນອາຟຣິກາກໍຈະມີຊີວິດການເປັນຢູ່ທີ່ດີງາມກວ່າເກົ່າ.
ຂໍຂອບໃຈ.
