ການພົບປະລະຫວ່າງຜູ້ນຳຈີນ-ສະຫະພາບເອີຣົບຄັ້ງທີ 22 ໄດ້ຈັດຂຶ້ນໃນວັນທີ 22 ມິຖຸນານີ້ໃນຮູບແບບຜ່ານວິດີໂອ. ທ່ານຫຼີເຄີ້ສຽງ ນາຍົກລັດຖະມົນຕີຈີນ , ທ່ານຊາເລສ ມີແຊເອີຣົບ ແລະ ທ່ານເອີຊູລາ ວັນ ເດີ ເລເຢນ ປະທານຄະນະກຳມາທິການສະຫະພາບເອີຣົບໄດ້ຮ່ວມກັນເປັນປະທານໃນກອງປະຊຸມ ເຊິ່ງແມ່ນການພົບປະທາງການຄັ້ງທຳອິດລະຫວ່າງຜູ້ນຳຈີນແລະຜູ້ນຳສະຫະພາບເອີຣົບຊຸດໃໝ່.
ໃນການພົບປະທີ່ຈັດຂຶ້ນຕາມຫຼັງ, ທ່ານສີຈິ້ນຜິງ ປະທານປະເທດຈີນກ່າວເນັ້ນວ່າ, ຈີນ ແລະ ສະຫະພາບເອີຣົບຕ້ອງເປັນສອງກຳລັງຕົ້ນຕໍໃນການປົກປັກຮັກສາສັນຕິພາບແລະສະຖຽນລະພາບຂອງໂລກ, ເປັນສອງຕະຫຼາດໃຫຍ່ທີ່ຊຸກຍູ້ການພັດທະນາແລະຄວາມຈະເລີນຮຸ່ງເຮືອງຂອງໂລກ. ສອງຝ່າຍຄວນຮ່ວມກັນສະໜັບສະໜູນການຟື້ນຟູການຜະລິດແລະການເຮັດວຽກຄືນໃໝ່ ຕາມຫຼັກວິທະຍາສາດ, ຮັກສາຄວາມສະໝ່ຳສະເໝີ ແລະ ຄວາມສະດວກໃຫ້ແກ່ຕ່ອງໂສ້ອຸດສາຫະກຳທົ່ວໂລກ, ຄວນຮັກສາການເປີດຕະຫຼາດເຊິ່ງກັນແລະກັນ. ຈີນສະແດງຄວາມຊົມເຊີຍຕໍ່ສະຫະພາບເອີຣົບທີ່ຍຶດໝັ້ນລັດທິຫຼາຍຝ່າຍ, ຍິນດີຮ່ວມກັບສະຫະພາບເອີຣົບເພີ່ມທະວີການປະສານສົມທົບ ແລະ ການຮ່ວມມືກັນກ່ຽວກັບບັນຫາສາກົນ ແລະ ພາກພື້ນທີ່ສຳຄັນ, ເພີ່ມທະວີການສົນທະນາ ແລະ ການຮ່ວມມືໃນການບໍລິຫານດ້ານສາທາລະນະສຸກຂອງໂລກ ແລະ ຊຸກຍູ້ການສ້າງປະຊາຄົມຮ່ວມຊາຕາກຳດ້ານສາທາລະນະສຸກຂອງມວນມະນຸດ.
ທ່ານຊາເລສ ມີແຊນ ແລະ ທ່ານເອີຊູລາ ວັນ ເດີ ເລເຢນກ່າວວ່າ: ສະຫະພາບເອີຣົບຍິນດີເພີ່ມທະວີການສົນທະນາທາງຍຸດທະສາດກັບຈີນຢ່າງເປີດອົກເປີດໃຈ; ຍິນດີເພີ່ມທະວີການຮ່ວມມືກັບຈີນໃນດ້ານການຄົ້ນຄວ້າຜະລິດຢາວັກແຊັງ ແລະ ຟື້ນຟູການຜະລິດແລະການເຮັດວຽກ, ເປີດກວ້າງຂະໜາດການຄ້າລະຫວ່າງສອງຝ່າຍ, ບັນລຸການລົງນາມໃນສັນຍາການລົງທຶນລະຫວ່າງສະຫະພາບເອີຣົບ-ຈີນໂດຍໄວ, ສຸມຄວາມພະຍາຍາມຮ່ວມກັນ ເພື່ອເອົາຊະນະການແຜ່ລະບາດຂອງພະຍາດໂຄວິດ-19 ແລະ ຊຸກຍູ້ໃຫ້ເສດຖະກິດໂລກຟື້ນຕົວຄືນ.