5 ມາດຕະການໃຫຍ່ຂອງຈີນກ່ຽວກັບການເປີດປະຕູສູ່ພາຍນອກທີ່ທ່ານສີຈິ້ນຜິງປະກາດໃນ 1 ປີກ່ອນນັ້ນໄດ້ຮັບການຈັດຕັ້ງປະຕິບັດໃຫ້ເປັນຮູບປະທຳ
ວັນທີ 28 ມິຖຸນາປີ 2019, ທ່ານສີຈິ້ນຜິງໄດ້ເຂົ້າຮ່ວມກອງປະຊຸມສຸດຍອດກຸ່ມ G20 ຄັ້ງທີ 14 ທີ່ໄດ້ຈັດຂຶ້ນຢູ່ນະຄອນໂອຊະກາປະເທດຍີ່ປຸ່ນແລະໄດ້ປະກອບຄຳເຫັນສຳຄັນທີ່ມີຫົວຂໍ້ວ່າ: “ຮ່ວມມືກັນກ້າວເດີນໄປໜ້າ, ຮ່ວມກັນສ້າງເສດຖະກິດໂລກທີ່ ມີຄຸນນະພາບສູງ” ໂດຍໄດ້ປະກາດວ່າ: ຈີນຈະໃຊ້ 5ມາດຕະການໃຫຍ່ກ່ຽວກັບການເປີດປະຕູສູ່ພາຍນອກຕື່ມອີກຄື: ເປີດກວ້າງຕະຫຼາດຕື່ມອີກ, ເປີດກວ້າງການນຳເຂົ້າຢ່າງເປັນເຈົ້າການ, ສືບຕໍ່ປັບປຸງສະພາບແວດລ້ອມການດຳເນີນທຸລະກິດໃຫ້ດີຂຶ້ນ,ປະຕິບັດມາດຕະການໃຫ້ສິດເທົ່າທຽມກັນຢ່າງຮອບ ດ້ານ, ອອກແຮງຊຸກຍູ້ການເຈລະຈາດ້ານເສດຖະກິດການຄ້າ.
ຫຼັງຈາກນັ້ນ1ປີ, ໃນສະພາບການທີ່ເສດຖະກິດໂລກຊຸດໂຊມລົງພ້ອມກັນ ແລະການແຜ່ລະບາດຂອງພະຍາດໂຄວິດ-19ມີສະພາບການທີ່ຍັງຂ້ຽວຂາດຄືເກົ່າ, 5ມາດຕະການໃຫຍ່ດັ່ງກ່າວໄດ້ຮັບການຈັດຕັ້ງປະຕິບັດໃຫ້ເປັນຮູບປະທຳຕາມລຳດັບ, ຈີນໄດ້ປະຕິບັດຕາມຄຳໝັ້ນສັນຍາຂອງຕົນຢ່າງແທ້ຈິງແລ້ວ!
ໃນໜຶ່ງປີຜ່ານມາ ຈີນໄດ້ເລັ່ງລັດບາດກ້າວໃນການເປີດກວ້າງຕະຫຼາດໃຫ້ໄວຂື້ນຢ່າງຕໍ່ເນື່ອງ
ຫຼັງຈາກກອງປະຊຸມສຸດຍອດໂອຊະກາບໍ່ເທົ່າໃດມື້, ຈີນກໍໄດ້ເຜີຍແຜ່ບັນຊີດ້ານລົບສຳລັບການລົງທຶນຂອງນັກທຸລະກິດຕ່າງປະເທດ, ແລະ ບັນຊີດ້ານລົບສຳລັບການລົງທຶນຂອງຕ່າງປະເທດຢູ່ເຂດທົດລອງການຄ້າເສລີສະບັບປີ 2019. ວັນທີ 24 ມິຖຸນາປີນີ້, ຈີນກໍໄດ້ປະກາດບັນຊີດ້ານລົບ 2 ສະບັບດັ່ງກ່າວສຳລັບປີ 2020, ເຊິ່ງໄດ້ຍົກສູງລະດັບການເປີດກວ້າງຂອງຂະແໜງການບໍລິການ, ຂະແໜງການອຸດສາຫະກຳການຜະລິດ, ແລະຂົງເຂດກະສິກຳຕື່ມອີກ. ພ້ອມກັນນັ້ນ, ການສ້າງສເຂດທົດລອງການຄ້າເສລີກໍໄດ້ດຳເນີນໄປຢ່າງເຄັ່ງຮ້ອນ.
ໜຶ່ງປີຜ່ານມາ, ຄຳໝັ້ນສັນຍາຂອງຈີນທີ່ເປັນເຈົ້າການເປີດກວ້າງການນຳເຂົ້າກໍໄດ້ຮັບການຈັດຕັ້ງປະຕິບັດຢ່າງບໍ່ຢຸດຢັ້ງ.
ເລີ່ມແຕ່ວັນທີ 1 ມັງກອນປີ 2020ເປັນຕົ້ນໄປ, ຈີນໄດ້ປັບຫຼຸດພາສີສຳລັບສິນຄ້ານຳເຂົ້າຈຳນວນໜຶ່ງ, ໂດຍໄດ້ປະຕິບັດອັດຕາພາສີຊົ່ວຄາວຕໍ່ສິນຄ້ານຳເຂົ້າ 850 ກວ່າຢ່າງ ດ້ວຍອັດຕາພາສີທີ່ຕໍ່າກວ່າອັດຕາພາສີສຳລັບປະເທດທີ່ໄດ້ຮັບສິດທິພິເສດ ນີ້ໄດ້ສ້າງຜົນປະໂຫຍດໃຫ້ແກ່ຫຼາຍຂົງເຂດທີ່ພົວພັນເຖິງເສດຖະກິດແຫ່ງຊາດ ແລະຊີວິດການເປັນຢູ່ຂອງປະຊາຊົນ.
ໃນໜຶ່ງປີຜ່ານມາ,ຈີນໄດ້ສືບຕໍ່ປັບປຸງສະພາບແວດລ້ອມການດຳເນີນທຸລະກິດໃຫ້ດີຂຶ້ນຢ່າງໜັກແໜ້ນບໍ່ປ່ຽນແປງ
ວັນທີ1ມັງກອນປີ2020, ກົດໝາຍວ່າດ້ວຍການລົງທຶນຂອງຕ່າງປະເທດຂອງສປ ຈີນພ້ອມດ້ວຍກົດລະບຽບວ່າດ້ວຍການປະຕິບັດກົດໝາຍດັ່ງກ່າວໄດ້ຮັບການປະຕິບັດຢ່າງເປັນທາງການ ເຊິ່ງເປັນການຮັບປະກັນດ້ານກົດໝາຍໃຫ້ແກ່ການຊຸກຍູ້ການເປີດປະຕູສູ່ພາຍນອກໃຫ້ມີລະດັບສູງກວ່າເກົ່າ. ບົດລາຍງານສະພາບການດຳເນີນທຸລະກິດຂອງໂລກປີ 2020 ຂອງທະນາຄານໂລກໄດ້ລະບຸວ່າ: ໃນການຈັດອັນດັບສະພາບແວດລ້ອມການດຳເນີນທຸລະກິດຂອງທັງໝົດ 190 ກຸ່ມເສດຖະກິດ, ຈີນຖືກຈັດໃຫ້ຢູ່ໃນອັນດັບທີ 31 ເຊິ່ງໄດ້ຖືກຍົກສູງຂຶ້ນຢ່າງຫຼວງຫຼາຍເມື່ອທຽບໃສ່ປີຜ່ານມາທີ່ຢູ່ໃນອັນດັບທີ 46.
ໃນໜຶ່ງປີຜ່ານມາ, ຈີນບໍ່ເຄີຍລົດລະໃນການສຸມຄວາມພະຍາຍາມເພື່ອປະຕິບັດສິດເທົ່າທຽມກັນຢ່າງຮອບດ້ານ
ຕົ້ນປີ2020, ຈີນໄດ້ປະກາດກົດລະບຽບວ່າດ້ວຍການປະຕິບັດກົດ ໝາຍວ່າດ້ວຍການລົງທຶນຂອງຕ່າງປະເທດ ໂດຍໄດ້ກຳນົດຢ່າງຈະແຈ້ງວ່າ: ລັດແລະພາກສ່ວນທີ່ກ່ຽວຂ້ອງຄວນປະຕິບັດຕໍ່ວິສາຫະກິດທຶນຕ່າງປະເທດແລະວິສາຫະກິດພາຍໃນຢ່າງສະເໝີພາບກັນ. ແຕ່ເດືອນມັງກອນຫາເດືອນພຶດສະພາປີ2020ນີ້, ນັກທຸລະກິດຕ່າງປະເທດໄດ້ລົງທຶນກວາດຊື້ວິສາຫະກິດຢູ່ຈີນໃນມູນຄ່າເຖິງ9ຕື້ໂດລາສະຫະລັດ, ນີ້ເປັນຄັ້ງທຳອິດທີ່ມູນຄ່າການກວາດຊື້ຫຼາຍກວ່າມູນຄ່າການລົງທຶນຂອງວິສາຫະກິດຈີນທີ່ກວາດຊື້ວິສາຫະກິດຢູ່ຕ່າງປະເທດໃນໄລຍະ 10ປີຜ່ານມາ.
ໃນໜຶ່ງປີຜ່ານມາ,ຈີນໄດ້ອອກແຮງຊຸກຍູ້ການເຈລະຈາດ້ານເສດຖະກິດການຄ້າຢ່າງສະເໝີຕົ້ນສະເໝີປາຍ
ເດືອນພະຈິກປີ2019, ການເຈລະຈາກ່ຽວກັບສັນຍາການພົວພັນຄູ່ຮ່ວມມືເສດຖະກິດຮອບດ້ານໃນພາກພື້ນຫຼືRCEPໄດ້ຮັບຄວາມຄືບໜ້າສຳຄັນ, 15ປະເທດສະມາຊິກໄດ້ສິ້ນສຸດການເຈລະຈາກ່ຽວກັບເອກະສານທັງໝົດແລະການເຈລະຈາທັງໝົດກ່ຽວກັບການອະນຸຍາດໃຫ້ເຂົ້າເຖິງຕະຫຼາດຢ່າງເປັນຮູບປະທຳ. ເດືອນມິຖຸນາປີນີ້, ກອງປະຊຸມລະດັບລັດຖະມົນຕີRCEPທາງວິດີໂອໄດ້ຈັດຂຶ້ນ, ບັນດາຝ່າຍທີ່ເຂົ້າຮ່ວມກອງປະຊຸມໄດ້ຕົກລົງວ່າຈະສຸມກຳລັງເຂົ້າໃນການລົງນາມໃນສັນຍາພາຍໃນປີນີ້.
ໃນກອງປະຊຸມຜູ້ນຳຈີນ-ເອີຣົບຄັ້ງທີ22 ທີ່ຈັດຂຶ້ນໃນຫວ່າງກ່ອນນີ້ບໍ່ດົນ，ຜູ້ນຳຈີນແລະເອີຣົບໄດ້ກ່າວເນັ້ນອີກຄັ້ງໜຶ່ງວ່າຈະສຸມກຳລັງເຂົ້າໃນການເຊັນສັນຍາການລົງທຶນຈີນ-ເອີຣົບໃນປີ2020, ໂດຍເຫັນດີຈະສຸມຄວາມພະຍາຍາມຈົນສຸດຄວາມສາມາດເພື່ອບັນລຸຄວາມເຫັນເປັນເອກະພາບກັນກ່ຽວກັບກະຕິກາໃນດ້ານການແຂ່ງຂັນຢ່າງຍຸຕິທຳໂດຍໄວ.
ຮອງຮັບໂອກາດການພັດທະນາດ້ວຍທ່າທີເປີດກວ້າງກວ່າເກົ່າ, ສະແຫວງຫາການທີ່ຕ່າງຝ່າຍຕ່າງໄດ້ຮັບຜົນປະໂຫຍດນຳກັນດ້ວຍການຮ່ວມມືທີ່ດີກວ່າເກົ່າ. ການເປີດປະຕູແລະການຮ່ວມມືເຊິ່ງເປັນຄຳໝັ້ນສັນຍາຂອງຈີນ, ຍິ່ງເປັນການເຄື່ອນໄຫວຕົວຈິງຂອງຈີນ.