ວັນທີ 7 ກໍລະກົດນີ້, ທ່ານຊຽນໂກຢີ້ ຫົວໜ້າກົມການຄ້າການບໍລິການກະຊວງການຄ້າຈີນກ່າວຢູ່ນະຄອນຫຼວງປັກກິ່ງວ່າ, ຈີນດຳເນີນການຄຸ້ມຄອງບັນຊີ ທາງລົບຕໍ່ການລົງທຶນຂອງນັກທຸລະກິດຕ່າງປະເທດ, ສຳລັບຂົງເຂດທີ່ບໍ່ນອນຢູ່ໃນ “ບັນຊີທາງລົບສຳລັບການລົງທຶນຂອງຕ່າງປະເທດ”, ຈະຄຸ້ມຄອງຕາມຫຼັກການທີ່ໃຊ້ມາດຕະຖານເທົ່າທຽມກັນລະຫວ່າງທຶນພາຍໃນ ແລະ ຕ່າງປະເທດ. ຂະແໜງການບໍລິການພາຍໃນເຮືອນບໍ່ນອນຢູ່ໃນບັນຊີທາງລົບ, ວິສາຫະກິດຕ່າງປະເທດສາມາດຈົດທະບຽນສ້າງວິສາຫະກິດການບໍລິການພາຍໃນເຮືອນຕາມຂັ້ນຕອນທີ່ກ່ຽວຂ້ອງຄືກັນກັບວິສາຫະກິດພາຍໃນປະເທດຈີນ.
ທ່ານຊຽນໂກຢີ້ກ່າວຕື່ມວ່າ, ຄຽງຄູ່ກັບປະເທດຈີນທີ່ມີອັດຕາສ່ວນຜູ້ເຖົ້າເພີ່ມຂຶ້ນ, ແລະ ການອະນຸຍາດໃຫ້ເອົາລູກຜູ້ທີ 2, ຂະບວນການຫັນເປັນຕົວເມືອງແບບໃໝ່ໄດ້ເລັ່ງລັດໄວຂຶ້ນ, ຈຶ່ງມີຄວາມຕ້ອງການດ້ານການບໍລິການພາຍໃນເຮືອນໃນຫຼາຍລະດັບຫຼາຍປະເພດ ເຊັ່ນ: ການເບິ່ງແຍງຜູ້ເຖົ້າ, ການຊ່ວຍຟື້ນຟູສຸຂະພາບ, ການເບິ່ງແຍງເດັກນ້ອຍ, ການແຕ່ງກິນ ແລະ ອະນາໄມເປັນຕົ້ນຈະເພີ່ມຂຶ້ນຢ່າງຕໍ່ເນື່ອງ, ເຊິ່ງຂະແໜງການນີ້ມີກຳລັງບົ່ມຊ້ອນອັນໃຫຍ່ຫຼວງໃນການພັດທະນາ. ຈີນຍິນດີຕ້ອນຮັບວິສາຫະກິດຕ່າງປະເທດມາລົງທຶນໃນຂະແໜງການບໍລິການພາຍໃນເຮືອນຢູ່ຈີນ, ຮ່ວມກັນຊົມໃຊ້ໂອກາດການພັດທະນາໃນຂະແໜງການບໍລິການພາຍໃນເຮືອນຢູ່ຈີນ.