ວັນທີ 8 ກໍລະກົດນີ້, ທ່ານຈ້າວລີ້ຈ່ຽນ ໂຄສົກກະຊວງການຕ່າງປະເທດຈີນກ່າວຢູ່ນະຄອນຫຼວງປັກກິ່ງວ່າ: ຈີນຈະເພີ່ມທະວີການຮ່ວມມືກັບຝ່າຍຕ່າງໆ, ເພື່ອຊຸກຍູ້ໃຫ້ອົງການຮ່ວມມືຊຽງໄຮປະກອບສ່ວນຫຼາຍກວ່າເກົ່າເຂົ້າໃນການຮັກສາຄວາມປອດໄພດ້ານສາທາລະນະສຸກຂອງພາກພື້ນກໍຄືຂອງໂລກ.
ຕາມຂ່າວແຈ້ງວ່າ, ກອງປະຊຸມສຳມະນາທາງວີດີໂອກ່ຽວກັບການປ້ອງກັນ ແລະ ຄວບຄຸມພະຍາດໂຄວິດ-19ຄັ້ງທຳອິດລະຫວ່າງຈີນ-ອົງການຮ່ວມມືຊຽງໄຮໄດ້ຈັດຂຶ້ນຢ່າງສຳເລັດຜົນ. ໃນກອງປະຊຸມຂ່າວທີ່ຈັດຂຶ້ນໃນວັນທີ 8 ກໍລະກົດນີ້, ທ່ານຈ້າວລີ້ຈ່ຽນກ່າວວ່າ : “ກອງປະຊຸມຄັ້ງນີ້ມີຫົວຂໍ້ວ່າ ຊ່ວຍເຫຼືອເຊິ່ງກັນແລະກັນ ຮ່ວມກັນຜ່ານຜ່າຄວາມຫຍຸ້ງຍາກ”, ກອງປະຊຸມນີ້ໄດ້ຖ່າຍທອດສົດຕໍ່ທົ່ວໂລກທາງອອນລາຍ ແລະ ອອຟລາຍ. ຊ່ຽວຊານຈາກສະຖາບັນການແພດຫຼາຍແຫ່ງຂອງຈີນ ແລະ ຊ່ຽວຊານ200 ກວ່າທ່ານທີ່ມາຈາກສະຖາບັນການແພດເກືອບ 40 ແຫ່ງທີ່ຂອງປະເທດສະມາຊິກອົງການຮ່ວມມືຊຽງໄຮ ປະເທດຜູ້ສັງເກດການ ແລະ ປະເທດຄູ່ເຈລະຈາໄດ້ລົງເລິກປຶກສາຫາລືກ່ຽວກັບການບົ່ງມະຕິ ແລະ ປິ່ນປົວພະຍາດໂຄວິດ-19 ແລະ ຫົວຂໍ້ອື່ນໆ. ໃນຫຼາຍອາທິດຂ້າງໜ້ານີ້, ກອງປະຊຸມທາງວີດີໂອທີ່ກ່ຽວຂ້ອງຍັງຈະຈັດຂຶ້ນຕິດຕໍ່ກັນ, ເຊື່ອວ່ານີ້ຈະສົ່ງຜົນດີຕໍ່ພະນັກງານການແພດຂອງປະເທດຕ່າງໆທີ່ເຂົ້າຮ່ວມກອງປະຊຸມເພື່ອຍົກສູງລະດັບວິຊາການ, ຊ່ວຍເຫຼືອປະເທດຕ່າງໆກອບກູ້ຊີວິດໃຫ້ຫຼາຍກວ່າເກົ່າໃນການຕ້ານກັບພະຍາດໂຄວິດ-19.