ຮຽນຊົງຊາຮຽນຈັດດອກໄມ້ເພື່ມສີມື

“ອາຈານ ຂໍຖາມແດ່ວ່ານໍ້າຕານຢູ່ໃສ?”

“ຊາຈີນບໍ່ຕ້ອງໃສ່ນໍ້າຕານ, ຄັ້ງທຳອິດທີ່ເຈົ້າກິນອາດຈະຮູ້ສຶກຂົມໜ້ອຍໜຶ່ງ, ແຕ່ຫຼັງຈາກຊິມດື່ມຢ່າງຕັ້ງໃຈແລ້ວ ຈະສຳຜັດເຖິງກິ່ນຫວານທີ່ມາຕາມຫຼັງ, ນີ້ກໍຄືລົດຊາດຂອງຊາຈີນ.”

ບົດສົນທະນາດັ່ງກ່າວນີ້ແມ່ນເກີດຂຶ້ນໃນຊຸດຝຶກອົບຮົມສີມືສິລະປະການຊົງຊາທີ່ນະຄອນຄຸນໝິງແຂວງຢຸນນານ. ໃນວັນທີ 7 ກໍລະກົດ, ຊຸດຝຶກອົບຮົມພິເສດສຳລັບທັກສະບຸກຄະລາກອນສາກົນທີ່ອ່ວາຍໜ້າສູ່ອາຊີໃຕ້ -ອາຊີອາຄະເນຄັ້ງທີສອງຂອງນະຄອນຄຸນໝິງ ທີ່ກົມຊັບພະຍາກອນມະນຸດ ແລະ ປະກັນສັງຄົມນະຄອນຄຸນໝິງເປັນເຈົ້າພາບ ແລະ ວິທະຍາໄລຄຸນໝິງເປັນ ເຈົ້າການຈັດ ໄດ້ເປີດຫ້ອງຮຽນຂຶ້ນຢູ່ທີ່ຄະນະສາກົນວິທະຍາໄລຄຸນໝິງ. ມີນັກຮຽນທັງໝົດ 50 ຄົນທີ່ມາຈາກ 13 ປະເທດກໍຄື ປະເທດລາວ ບັງຄະລາເທດ ເນປານເປັນຕົ້ນ ໄດ້ແບ່ງກັນເຂົ້າຮ່ວມຫ້ອງຝຶກອົບຮົມການອອກແບບສິລະປະການຈັດດອກໄມ້ຕາມສະຖານທີ່ ແລະ ຫ້ອງຝຶກອົບຮົມສິລະປະການຊົງຊາ, ເພື່ອຮໍ່າຮຽນສືມື ຮັບຮູ້ວັດທະນະທຳແຂວງຢຸນນານ ກໍຄືວັດທະນະທຳຈີນ.

ນາງວັນນະພອນ ຄຳພິລົມ ເປັນນັກສຶກສາລາວຄົນໜຶ່ງທີ່ມາຮຽນຢູ່ວິທະຍາໄລຄຸນໝິງ, ລາວໄດ້ມາຮຽນຢູ່ນະຄອນຄຸນໝິງຕັ້ງແຕ່ເດືອນກັນຍາຂອງປີແລ້ວນີ້, ກໍໄດ້ເຂົ້າຮ່ວມການຝຶກອົບຮົມໃນຄັ້ງນີ້, ເນື້ອໃນທີ່ລາວຮຽນແມ່ນການອອກແບບສິລະປະການຈັດດອກໄມ້ຕາມສະຖານທີ່. “ເນື່ອງຈາກວ່າຂ້ອຍເອງແມ່ນສົນໃຈຕໍ່ວັດທະນະທຳຈີນຫຼາຍ, ຈຶ່ງໄດ້ມາສະໝັກເຂົ້າຮ່ວມກິດຈະກຳນີ້ໂດຍສະເພາະ, ໄດ້ຮັບໝາກຜົນຈາກກິດຈະກຳນີ້ຫຼາຍ.” ນາງວັນນະພອນ ໄດ້ບອກໃຫ້ນັກຂ່າວ ຮູ້ວ່າ, ໂດຍຜ່ານການຮໍ່າຮຽນຄັ້ງນີ້, ລາວໄດ້ຮັບຮູ້ເຖິງຄວາມແຕກຕ່າງກັນລະຫວ່າງສິລະປະດອກໄມ້ຈີນ ກັບ ສິລະປະດອກໄມ້ລາວ, ຕົວຢ່າງວ່າ ສິລະປະດອກໄມ້ຈີນ ເອົາໃຈໃສ່ຕໍ່ຄວາມສວຍງາມ ທຳມະຊາດ ແບບລຽບງ່າຍ ແລະ ຄວາມໝາຍທາງສິລະປະທີ່ເລິກເຊິ່ງ, ສ່ວນຂອງລາວນັ້ນ ເອົາໃຈໃສ່ຕໍ່ການສ້າງບັນຍາກາດຄວາມສວຍງາມທີ່ຫຼູຫຼາກວ່າ, ເຊິ່ງມີແຮງກະທົບໂດຍກົງຕໍ່ດ້ານວິໄສທັດຫຼາຍກວ່າ.

ນາງວັນນະພອນ ເວົ້າວ່າຂັ້ນຕອນທີ່ຍາກທີ່ສຸດໃນການຮໍ່າຮຽນການອອກແບບສິລະປະການຈັດດອກໄມ້ຕາມສະຖານທີ່ແມ່ນຂັ້ນຕອນ “ການອອກແບບ”. “ຍ້ອນວ່າການຈັດດອກໄມ້ບໍ່ພຽງແຕ່ເປັນການຈັດວາງດອກໄມ້ຊື່ໆເທົ່ານັ້ນ, ຍັງຕ້ອງ ຮູ້ວ່າຄວາມໝາຍຂອງດອກໄມ້ເຫຼົ່ານີ້ແມ່ນຫຍັງ, ສຳລັບຂ້ອຍເລື່ອງນີ້ແມ່ນຍາກຫຼາຍ. ແຕ່ເມື່ອເຫັນເຖິງຄວາມຄິດປະດິດສ້າງຂອງຕົນໄດ້ປະກົດຕົວອອກມາໃນທ້າຍທີ່ສຸດແລ້ວ, ກໍເຮັດໃຫ້ເຮົາເກີດມີຄວາມຮູ້ສຶກທີ່ເຕັມປ່ຽມດ້ວຍສຳເລັດຫຼາຍ.” ນາງວັນນະພອນ ເວົ້າຢ່າງຕື່ນເຕັ້ນ.

ອີງຕາມຂໍ້ມູນ, ຄະນະກະສິກຳ ແລະ -ຊີວະວິທະຍາສາດ ຂອງວິທະຍາໄລຄຸນໝິງໄດ້ສະໜອງການສະໜັບສະໜູນຊັບພະຍາກອນທາງດ້ານຄູອາຈານ, ວັດສະດຸ ແລະ ດ້ານອື່ນໆໃຫ້ແກ່ການຝຶກອົບຮົມຄັ້ງນີ້. ເອກະລັກຂອງການຝຶກອົບຮົມທັກສະສະເພາະຂອງປີນີ້ຍິ່ງມີຄວາມພົ້ນເດັ່ນຍິ່ງຂຶ້ນ ເຊັ່ນ: ໃນຫ້ອງຝຶກອົບຮົມສິລະປະການຊົງຊາ, ພວກນັກຮຽນໄດ້ຮຽນສີມື ສິລະປະການຊົງຊາເປັນຊຸດຄົບຖ້ວນຢ່າງເປັນລະບົບທີ່ລວມມີການເລືອກນໍ້າ ການເລືອກເຕົາ ການຊົມຊາ ແລະ ການໃສ່ນໍ້າເປັນຕົ້ນ; ສ່ວນການຝຶກອົບຮົມສິລະປະ ດອກໄມ້ແມ່ນຍິ່ງມີຄວາມເອົາໃຈໃສ່ຕໍ່ກັບການນໍາໃຊ້ດອກໄມ້ໃນສະຖານທີ່ແຫຼ່ງການຄ້າຕ່າງໆເຊັ່ນ ໂຮງແຮມ ແລະ ງານວາງສະແດງເປັນຕົ້ນ. ຄະນະສິດສອນຂອງວິທະຍາໄລຄຸນໝິງໄດ້ແນະນຳວ່າ, ຫວັງວ່າຈະສາມາດຖ່າຍທອດສີມືທັກສະທີ່ສາມາດນຳໃຊ້ໄດ້ຕົວຈິງໃຫ້ພວກນັກຮຽນ, ເພື່ອຊຸກຍູ້ກຳລັງແຮງເຂົ້າໃນການພັດທະນາອາຊີບຂອງເຂົາເຈົ້າໃນອະນາຄົດ.

ນາງ ຈ່າງລີຈວນ ຫົວໜ້າພະແນກ ກໍ່ສ້າງຄວາມສາມາດທາງວິຊາຊີບຂອງກົມຊັບພະຍາກອນມະນຸດ ແລະ ປະກັນສັງຄົມນະຄອນຄຸນໝິງໄດ້ກ່າວວ່າ, ນັບຕັ້ງແຕ່ການຂຶ້ນປ້າຍຂອງ ເຂດທົດລອງການຄ້າເສລີປະເທດຈີນ(ຢຸນນານ)ໃນທ້າຍເດືອນສິງຫາເປັນຕົ້ນມາ, ເຂົາເຈົ້າໄດ້ປະຕິບັດໂຄງການການຝຶກອົບຮົມບຸກຄະລາກອນຫຼາຍຄັ້ງ ລວມທັງ ຊຸດຝຶກອົບຮົມພິເສດສຳລັບບຸກຄະລາກອນສາກົນທີ່ອ່ວາຍໜ້າສູ່ອາຊີໃຕ້- ອາຊີອາຄະເນ , ຈຸດປະສົງແມ່ນເພື່ອສ້າງບຸກຄະລາກອນໃຫ້ແກ່ເຂດທົດລອງການຄ້າເສລີ. ນາງ ຈ່າງລີຈວນ ບອກວ່າ:“ ເຂດທົດລອງການຄ້າເສລີຕ້ອງອ່ວາຍໜ້າສູ່ປະເທດໃກ້ຄຽງ, ບຸກຄະລາກອນສາກົນເປັນທ່າອ່ຽງໃຫຍ່.” ຕໍ່ໄປ, ເຂົາເຈົ້າຍັງຈະຄ່ອຍໆເພີ່ມຕື່ມປະເພດງານການຝຶກອົບຮົມບົນພື້ນຖານທີ່ມີໃນປັດຈຸບັນ, ໂດຍອີງຕາມຄວາມຕ້ອງການຕໍ່ບຸກຄະລາກອນວິຊາສະເພາະຂອງປະເທດອາຊີໃຕ້ ແລະ ປະເທດອາຊີອາຄະເນ, ເພື່ອດຳເນີນການຝຶກອົມຮົມບຸກຄະລາກອນທີ່ມີທັກສະລະດັບສາກົນຢ່າງມີລັກສະນະກົງກັບເປົ້າໝາຍກວ່າ.

ນັກຂ່າວ ລົວຈີຢຸ ລີເຫີງເຊັງ ບົວໃສ