ວັນທີ 16 ກໍລະກົດນີ້, ອົງການສະຖິຕິແຫ່ງຊາດຈີນໄດ້ເປີດເຜີຍຕົວເລກການເຄື່ອນໄຫວດ້ານເສດຖະກິດໃນໄຕມາດທີສອງ ແລະ 6 ເດືອນຕົ້ນປີນີ້. ໃນໄຕມາດທີສອງ, GDP ຂອງຈີນໄດ້ເພີ່ມຂຶ້ນ 3.2% ເມື່ອທຽບໃສ່ໄລຍະດຽວກັນຂອງປີຜ່ານມາ, ໃນ 6 ເດືອນຕົ້ນປີນີ້, ເສດຖະກິດຈີນໄດ້ຕົກຕ່ຳລົງ ກ່ອນຈະພິກກັບມາເພີ່ມຂຶ້ນ, ການເຄື່ອນໄຫວດ້ານເສດຖະກິດຂອງຈີນໄດ້ຟື້ນຄືນໃໝ່ຢ່າງໝັ້ນທ່ຽງ, ການຄາດຄະເນຕໍ່ຕະຫຼາດໄດ້ຫັນໄປໃນແງ່ດີໂດຍລວມ, ສະພາບລວມໃນການພັດທະນາເສດຖະກິດ-ສັງຄົມກໍໝັ້ນທ່ຽງ. ມີຕົວເລກທາງເສດຖະກິດທີ່ດີແລະມີທ່າອ່ຽງຂອງການພັດທະນາທີ່ດີ, ນີ້ໄດ້ສະແດງໃຫ້ເຫັນເຖິງຄວາມເຂັ້ມແຂງແລະຄວາມມີຊີວິດຊີວາຂອງເສດຖະກິດຈີນຕື່ມອີກ, ທັງໄດ້ເສີມສ້າງຄວາມໝັ້ນໃຈແລະເຊີດຊູກຳລັງໃຈໃຫ້ທົ່ວສັງຄົມຕື່ມອີກ.
ຄຽງຄູ່ກັບພະຍາດໂຄວິດ-19 ແຜ່ລະບາດຢ່າງຕໍ່ເນື່ອງໃນທົ່ວໂລກ, ອົງການກອງທຶນເງິນຕາສາກົນ ຫຼື IMF ແລະ ທະນາຄານໂລກໄດ້ປັບຫຼຸດການຄາດຄະເນຕົວເລກດ້ານການເຕີບໂຕຂອງເສດຖະກິດໂລກໃນປີນີ້ອີກຄັ້ງໜຶ່ງ, ກຸ່ມເສດຖະກິດທີ່ພັດທະນາແລ້ວຈຳນວນໜຶ່ງອາດຈະຕົກສູ່ສະພາບເສດຖະກິດຊຸດໂຊມລົງຢ່າງເລິກເຊິ່ງ, ແຕ່ສຳລັບຈີນແລ້ວ ໄດ້ບັນລຸການເຕີບໂຕດ້ານເສດຖະກິດໃນໄຕມາດທີສອງຢ່າງເກີນຄາດໝາຍ. ເສດຖະກິດຈີນໄດ້ຜ່ານພົ້ນຈາກຜົນກະທົບຢ່າງໜັກໜ່ວງຂອງການແຜ່ລະບາດຂອງພະຍາດ, ຄວາມຈິງດັ່ງກ່າວໄດ້ສະແດງໃຫ້ເຫັນເຖິງຄວາມເຂັ້ມແຂງແລະກຳລັງບົ່ມຊ້ອນຂອງເສດຖະກິດຈີນ, ທັງສາມາດສະແດງໃຫ້ເຫັນວ່າ: ທ່າອ່ຽງຂອງການພັດທະນາເສດຖະກິດໄປໃນທາງທີ່ດີທ່າມກາງສະພາບຄວາມໝັ້ນທ່ຽງ ແລະພັດທະນາໄປໃນທາງທີ່ດີເປັນໄລຍະຍາວນັ້ນບໍ່ມີການປ່ຽນແປງ ແລະກໍຈະບໍ່ປ່ຽນແປງ.
ແຕ່ໃນຂະນະດຽວກັນນັ້ນກໍຄວນເບິ່ງວ່າ: ເຖິງວ່າເສດຖະກິດຈີນໄດ້ພັດທະນາດີຂຶ້ນໃນໄຕມາດທີສອງກໍຕາມ, ແຕ່ໃນ 6 ເດືອນຕົ້ນປີນີ້, ດັດຊະນີຕົ້ນຕໍເຊັ່ນ: GDP, ອຸດສາຫະກຳ, ຂະແໜງການບໍລິການ, ການບໍລິໂພກ ແລະການລົງທຶນເປັນຕົ້ນຍັງຢູ່ໃນລະດັບທີ່ຕົກຕ່ຳ, ສະນັ້ນຈຶ່ງເຫັນວ່າ: ເຖິງວ່າເສດຖະກິດຈີນສາມາດຟື້ນຄືນໃໝ່ໄດ້ໃນໄຕມາດທີສອງ ແຕ່ກໍຍັງເປັນການເຕີບໂຕແບບຟື້ນຄືນໃໝ່ເທົ່ານັ້ນ.