ວັນທີ 23 ກໍລະກົດນີ້, ກອງປະຊຸມກົນໄກສົນທະນາຂອງພັກຄອງອຳນາດຈີນ-ຣັດເຊຍຄັ້ງທີ8ໄດ້ຈັດຂຶ້ນທາງວິດີໂອ. ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ປະທານປະເທດຈີນ ແລະ ທ່ານວະລາດີເມຍ ປູຕີນ ປະທານາທິບໍດີຣັດເຊຍຕ່າງກໍໄດ້ສົ່ງສານຊົມເຊີຍໄປຍັງກອງປະຊຸມຄັ້ງນີ້.
ໃນສານຊົມເຊີຍ ທ່ານສີຈິ້ນຜິງໄດ້ສະແດງຄວາມຊົມເຊີຍຢ່າງສຸດໃຈຕໍ່ການຈັດກອງປະຊຸມຄັ້ງນີ້. ທ່ານກ່າວວ່າ,ນັບແຕ່ພະຍາດໂຄວິດ19ແຜ່ລະບາດເປັນຕົ້ນມາ,ຈີນ-ຣັດເຊຍຕ່າງກໍໄດ້ຊ່ວຍເຫຼືອກັນຜ່ານຜ່າຄວາມຫຍຸ້ງຍາກ,ທຸກສຸດຮ່ວມກັນ, ຄັດຄ້ານການແຊກແຊງຈາກພາຍນອກ,ເພີ່ມເນື້ອໃນຍຸດທະສາດໃໝ່ແຫ່ງການຮ່ວມມືລະຫວ່າງສອງປະເທດ,ສະແດງໃຫ້ເຫັນເຖິງໄມຕີຈິດມິດຕະພາບອັນເລິກເຊິ່ງລະຫວ່າງປະຊາຊົນຈີນ-ຣັດເຊຍຢ່າງເຕັມທີ່,ທັງສ່ອງແສງໃຫ້ເຫັນເຖິງການພົວພັນຈີນ-ຣັດເຊຍໃນຍຸກໃໝ່ທີ່ມີລະດັບສູງແລະລັກສະນະພິເສດ.
ທ່ານສີຈິ້ນຜິງຊີ້ໃຫ້ເຫັນວ່າ,ພະຍາດໂຄວິດ19ໄດ້ແຜ່ລະບາດໃນທົ່ວໂລກ ເຊິ່ງສະແດງໃຫ້ເຫັນອີກຄັ້ງໜຶ່ງວ່າ,ມວນມະນຸດເປັນປະຊາຄົມຮ່ວມຊາຕາກຳທີ່ຕ້ອງຮ່ວມທຸກຮ່ວມສຸກນຳກັນ,ບັນດາປະເທດຄວນສາມັກຄີຮ່ວມມືກັນເພື່ອຮັບມືພ້ອມກັນ.
ໃນສານຊົມເຊີຍ ທ່ານປູຕີນກ່າວວ່າ,ການພົວພັນຣັດເຊຍ-ຈີນໄດ້ພັດທະນາສູ່ລະດັບສູງທີ່ບໍ່ເຄີຍມີມາກ່ອນ,ໄດ້ເປັນແບບຢ່າງດ້ານການຮ່ວມມືປະສານງານລະຫວ່າງຊາດໃນໂລກປັດຈຸບັນ.ເຊື່ອວ່າກອງປະຊຸມຄັ້ງນີ້ຈະດຳເນີນການປຶກສາຫາລືທີ່ມີຜົນປະໂຫຍດອັນອຸດົມສົມບູນ,ສະເໜີ ແນວຄິດໃໝ່ຂໍ້ລິເລີ່ມໃໝ່,ຊຸກຍູ້ການພົວພັນຄູ່ຮ່ວມຍຸດທະສາດຮອບດ້ານຣັດເຊຍ-ຈີນໃຫ້ໝັ້ນຄົງຕື່ມອີກ.