ວັນທີ 29 ກໍລະກົດນີ້, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ເປັນປະທານຈັດກອງປະຊຸມປະຈຳຄະນະລັດຖະບານຈີນຢູ່ນະຄອນຫຼວງປັກກິ່ງ ເຊິ່ງໄດ້ວາງແຜນການເພື່ອເປີດກວ້າງການເປີດປະຕູສູ່ພາຍນອກຕື່ມອີກ, ແລະເຮັດໃຫ້ການຄ້າ ແລະການລົງທຶນຂອງຕ່າງປະເທດມີຄວາມໝັ້ນທ່ຽງ, ລວມທັງລົງເລິກປະຕິບັດວຽກງານຈຸດທົດລອງການພັດທະນາ ແລະການປະດິດສ້າງໃໝ່ດ້ານການຄ້າການບໍລິການ.
ກອງປະຊຸມໄດ້ເນັ້ນໜັກວ່າ: ຕ້ອງໃຫ້ອົງການຕົ້ນຕໍໃນການຄ້າກັບຕ່າງປະເທດ, ຕ່ອງໂສ້ອຸສາຫະກຳ ແລະຕ່ອງໂສ້ການສະໜອງມີຄວາມໝັ້ນຄົງ, ສະນັ້ນ, ໜຶ່ງ: ຕ້ອງສະໜັບສະໜູນວິສາຫະກິດການຄ້າກັບຕ່າງປະເທດເພີ່ມທະວີຄວາມສາມາດຕ້ານທານຄວາມສ່ຽງ, ເມື່ອຜະເຊີນກັບບັນຫາທີ່ວິສາຫະກິດມີໃບສັ່ງຈອງສິນຄ້າໜ້ອຍລົງ ແລະບັນຫາພົ້ນເດັ່ນອື່ນໆ ຄວນອອກມາດຕະການຢ່າງມີປະສິດທິຜົນເພື່ອສະໜັບສະໜູນວິສາຫະກິດບຸກເບີກຕະຫຼາດ ແລະເພີ່ມໃບສັ່ງຈອງ. ສອງ: ຕ້ອງຊຸກຍູ້ເຂດພາກກາງ, ພາກຕາເວັນຕົກ ແລະພາກຕາເວັນອອກສຽງເໜືອເສີມຂະຫຍາຍທ່າແຮງ, ຮັບເໝົາການຜະລິດອຸດສາຫະກຳເພື່ອການຄ້າຕ່າງປະເທດທີ່ໃຊ້ແຮງງານຫຼາຍ. ສະໜັບສະໜູນການພັດທະນາຂະແໜງການໃໝ່ ຄື: ການຄ້າເອເລັກໂຕຣນິກຂ້າມຊາດ, ສາງສິນຄ້າຢູ່ຕ່າງປະເທດ, ວິສາຫະກິດການບໍລິການສັງລວມດ້ານການຄ້າຕ່າງປະເທດ ແລະອື່ນໆ, ເປີດກວ້າງການຈຸດທົດລອງກ່ຽວກັບຮູບການການຄ້າເພື່ອຈັດຊື້ສິນຄ້າໃນຕະຫຼາດ ແລະຊຸກຍູ້ການສົ່ງອອກຂອງວິສາຫະກິດຂະໜາດກາງ, ຂະໜາດນ້ອຍ ລະຂະໜາດຍ່ອມ. ສາມ: ຕ້ອງປັບປຸງນະໂຍບາຍດຶງດູດການລົງທຶນຂອງຕ່າງປະເທດໃຫ້ສົມບູນຂຶ້ນ. ສີ່: ຕ້ອງເສີມຂະຫຍາຍບົດບາດຂອງການຄ້າການບໍລິການເພື່ອໃຫ້ການຄ້າ ແລະການລົງທຶນຂອງຕ່າງປະເທດມີຄວາມໝັ້ນຄົງ.