ວັນທີ 8 ສິງຫານີ້ ວົງການຕ່າງໆໃນສັງຄົມຮົງກົງກ່າວວ່າ, ກະຊວງການເງິນອາເມຣິກາດຳເນີນອັນວ່າການຂວ້ຳບາດຕໍ່ຜູ້ຮັບຜິດຊອບອົງການວຽກງານກ່ຽວກັບຮົງກົງຂອງລັດຖະບານຈີນ ແລະເຈົ້າໜ້າທີ່ເຂດບໍລິຫານພິເສດຮົງກົງ ແມ່ນໄຮ້ເຫດຜົນຈັກເມັດ ແລະ ເປັນການເຮັດຕະພຶດຕະພືຕາມລຳພັງໃຈ, ເຊິ່ງມີເຈດຕະນາປັ້ນແຕ່ງເລື່ອງບັນຫາຮົງກົງແລະຢາກແຊກແຊງວຽກງານພາຍໃນຂອງຈີນ. ພວກເຂົາເຈົ້າ ໄດ້ກ່າວປະນາມຢ່າງຮູນແຮງຕໍ່ການກະທຳຊົ່ວຮ້າຍຂອງລັດຖະບານອາເມຣິກາ.
ສະຫະພັນສ້າງສາປະຊາທິປະໄຕຮົງກົງອອກຖະແຫຼງການໂດຍກ່າວວ່າ, ລັດຖະບານອາເມຣິກາຕິຕຽນເຈົ້າໜ້າທີ່ກ່ຽວຂ້ອງນັ້ນ ແມ່ນບໍ່ມີເຫດຜົນຈັດເມັດແລະເປັນການເຮັດຕະພຶດຕະພືຕາມລຳພັງໃຈ. ວົງການຕ່າງໆແລະຊາວເມືອງອັນໄພສານຂອງຮົງກົງ ຊົມເຊີຍສູນກາງທີ່ສ້າງກົດໝາຍວ່າດ້ວຍຄວາມໝັ້ນຄົງແຫ່ງຊາດຢູ່ຮົງກົງ, ທັງຢັ້ງຢືນຄວາມຕັດສິນໃຈຂອງລັດຖະບານກາງແລະອົງການປົກຄອງເຂດບໍລິຫານພິເສດຮົງກົງທີ່ຈະສາມາດປະຕິບັດທິດທາງ “ປະເທດດຽວສອງລະບອບ” ໄດ້ຢ່າງຕໍ່ເນື່ອງ ໝັ້ນທ່ຽງແລະຍາວນານ.
ສະຫະພັນກຳມະບານຮົງກົງອອກຖະແຫຼງການ ໂດຍກ່າວປະນາມຢ່າງເຂັ້ມງວດຕໍ່ລັດຖະບານອາເມຣິກາທີ່ແຊກແຊງວຽກງານພາຍໃນຂອງຈີນຢ່າງຮ້າຍກາດ. ກົດໝາຍວ່າດ້ວຍຄວາມໝັ້ນຄົງແຫ່ງຊາດຢູ່ຮົງກົງ ໄດ້ສະກັດກັ້ນເຫດການຄວາມຮຸນແຮງຂອງຝ່າຍມືດຮົງກົງຢ່າງທັນເວລາແລະບັງເກີດຜົນ, ເຮັດໃຫ້ສັງຄົມຟື້ນຟູຄວາມເປັນລະບຽບຮຽບຮ້ອຍ, ຄວາມປອດໄພຂອງຊາວຮົງກົງ ກໍໄດ້ຮັບການຮັບປະກັນ, ເຮັດໃຫ້ອົງການປົກຄອງເຂດບໍລິຫານພິເສດຮົງກົງແລະຊາວຮົງກົງ ສາມາດເຮັດວຽກງານປ້ອງກັນພະຍາດໂຄວິດ 19 ຢ່າງສຸດໃຈໄດ້.
ສະຫະພັນທຸລະກິດແລະຊີວິດການເປັນຢູ່ຂອງປະຊາຊົນຮົງກົງ ອອກຖະແຫຼງການໂດຍຊີ້ອອກວ່າ, ປະເທດຈີນໄດ້ສ້າງແລະປະຕິບັດກົດໝາຍວ່າດ້ວຍຄວາມໝັ້ນຄົງແຫ່ງຊາດຢູ່ຮົງກົງ ໄດ້ຕາບຈູນຊ່ອງໂຫວ່ດ້ານລະບຽບການຂອງຮົງກົງໃນການປ້ອງກັນຄວາມໝັ້ນຄົງແຫ່ງຊາດ, ໄດ້ປົກປັກຮັກສາລະບຽບສັງຄົມຂອງຮົງກົງຢ່າງມີປະສິດທິຜົນ, ເຮັດໃຫ້ຊີວິດການເປັນຢູ່ຂອງຊາວເມືອງຮົງກົງສາມາດກັບຄືນສູ່ປົກກະຕິໄດ້. ອັນວ່າການຂວ້ຳບາດຂອງອາເມຣິກາ ເປັນການກະທຳແບບມະຫາອຳນາດທັງນັ້ນ.